Македонија
Лапе побара конфискација на партиското седиште и штабовите на ВМРО-ДПМНЕ и затвор за Божиновски и Груевски
Затворски казни побара обвинителот Љубомир Лапе за обвинетите Никола Груевски кој беше претседател на ВМРО-ДПМНЕ и Кирил Божиновски кој беше генерален секретар на партијата, а за предметот „Талир 2“ кој е за изградбата на седиштето на партијата. Лапе кажа дека двајцата партијата ја третирале како трговско друштво. Тој тврди дека докажал дека ДГ Бетон го изградиле објектот за да добиваат приходи од јавни набавки односно пари од државата, а на ВМРО-ДПМНЕ целта им била да ги избегнат законските ограничувања за финансирање на политичките партии, а не да изградат деловен објект. Лапе од судот побара конфискација на целиот имот и осудителни пресуди.
„Предлагам истите да бидат прогласени за виновни и да им биде изречена санкција. За обвинетиот Никола Груевски преовладуваат отежителните околности, тој бил свесен за противправните дејствија, а за да избегне одговорност се даде во бегство. Високиот степен на криминалната намера, лукративните побуди односно стекнување на луксузен објект се отежителни околности. Како особено отежителна околност да се цени и тоа што Никола Груевски е веќе осуден за ваков вид кривични дела. Единствена оправдана санкцијна е ефективна казна затвор од погорните граници“, кажа Лапе.
Обвинителот посочи дека кај Кирил Божиновски нема олеснителни околности за да му се одреди поблага казна од затворска. Тоа значи дека според Лапе, ако Божиновски биде огласен за виновен, тој не треба да добие условна казна.
„Имајќи во предвид дека Обвинителството докажа дека имотот на ВМРО-ДПМНЕ предлагам на судот да го одзеде недвижниот имот, односно деловниот објект детално опишан во имотниот лист. Во однос на привремената мерка за обезбедување односно земјиштето под објектот, предлагам на судот истата да ја стави вон сила, бидејќи во текот на главната расправа произлезе дека тоа не е дел од кривичното дело. Обвинителството докажа дека обвинетите со кривичното дело оствариле корист од 132.573.852 илјади денари, неспорно се докажа дека паричните средства биле искористени за плаќање на недвижен имот и купување на недвижните имоти“, рече Лапе.
Според обвинителот, треба да се конфискуваат и партиски седишта во повеќе градови.
„Сметам дека исполнети се условите за конфискација од трети лица, предлагам да се конфискува имотната корист на ВМРО-ДПМНЕ и судот да го конфискува недвижниот имот во Берово, Велес, Струмица, Кавадарци, Кисела Вода, Таринци, две недвижности во Кисела Вода 2, Виница, Радовиш, Штип, Охрид, Пехчево, Демир Хисар, Пробиштип, Лозово, Делчево, Кочани, Струга, Неготино, Петровец, Гевгелија, Богданци, Градско, Каменица, Новаци за кои се веќе определени привремени мерки со решенија на овој суд“, кажа Лапе.
Обвинителот кажа дека корупцијата во овој случај е присутна и кај ВМРО-ДПМНЕ и кај ДГ Бетон.
„Корупцијата речиси без исклучок е во двете страни и ретко кога генерира директни докази. Поради тоа докажувањето на коруптивното однесување е тешко и е поврзано со индиректни докази кои сведочат на големата слика на правните акти, свесно искористување на правните моменти. Компанијата која спроведува државно спонзорирани проекти и гради ново луксузно партиско седиште, а за возврат добива државно спонзорирани проекти кои кога не се директно ги добива како под изведувач. Политичките влијанија се присутни постојано од измените на ДУП, паркинг места, градежна дозвола се до давање на. Останува на вас суде да ги препознаете овие коруптивни моменти и да испратите порака дека коруптивните моменти не поминуваат неказнето“, кажа Лапе.
Конфискацијата на имотот на ВМРО-ДПМНЕ која ја бара Лапе значи во корист на државата да се заплени и целата опрема како што се теписоните од 20.000 евра, камини од 20.000 евра, лустерите од 20.000 евра, паркетот од 90.000 евра, плочките од 100.000 евра. Тука спаѓаат и послужавниците вредни 156.124 денари, шестте сета ножеви вредни 106.930 денари, вазната вредна 180 илјади евра, четирите чинии за супа за кои беше кажано дека вредат 57.996. Меѓу другото, ако биде прифатен предлогот за конфискација, ќе се одземе и опремата од фитнес салата која чинела 65 илјади евра.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Таткото на Вања ќе оди во куќен притвор, Врховниот суд му ја уважи жалбата
Врховниот суд ја уважи жалбата на таткото на убиената Вања Ѓорчевска. Со тоа, укинат му е притворот и определена е мерка куќен притвор и мерка на претпазливост.
„Врховниот суд ја извести јавноста дека по одржаната јавна седница, Советот за казниви дела донесе Решение со кое жалбата на обвинетиот А. Ѓ., изјавена преку неговиот бранител Владимир Туфегџиќ, адвокат од Скопје, ја уважи, a решението на Апелационен суд Скопје КСЖ-320/24 од 02.04.2024 година, го преиначи на начин што определената мерка притвор против обвинетиот А.Ѓ. ја укина и за обвинетиот определи мерка куќен притвор и мерка на претпазливост“, велат од Врховниот суд.
Претходно денес, бранителот на осомничениот Ѓорчевски, адвокатот Владимир Туфегџиќ, на седницата рече дека решението со кое е продолжена мерката притвор е донесено без доволно образложенија во кои не се наведува ниту еден доказ со кој се докажува зошто овој човек би требало да остане во притвор. Дополни дека осомничениот не може да се даде во бегство затоа што важноста на патната исправа му истекла и дека тој активно учествува во истрагата.
Ѓорѓиевски истакна дека е обвинуван за некои работи кои и ден денес не ги разбира.
„Бев прикажувани екстремно спротивно од тоа што сум како родител и татко. Сакам и јас да знам што точно се случува затоа што и јас водев истрага, знам парченца од тие делови. Би сакал да го дочекам моментот кога ќе го дознам идентитетот на тие луѓе, сите се подеднакво криви“, рече тој.
Четиринаесетгодишната Вања Ѓорчевска, која беше пријавена за исчезната на 27 ноември, беше пронајдена мртва на 3 декември. За делата „грабнување“ и „убиство на свиреп начин“ првообвинет е Љубомир Палевски Палчо, за кого се чека екстрадиција од Турција. Таткото е осомничен дека помагал во грабнувањето.
Македонија
Висок функционер од НАТО се сретна со Џафери: „Вие сте ценета членка во алијансата“
Џафери – Лапсли: Северна Македонија е ценета членка на алијансата, која посветено ги развива одбранбените капацитети
Техничкиот премиер Талат Џафери вчера попладне се сретна со помошникот на генералниот секретар на НАТО за одбранбена политика и планирање, Ангус Лапсли, во рамките на неговата посета на Скопје.
Џафери му посака срдечно добредојде на помошникот на генералниот секретар Лапсли и воедно го потврди придонесот на Северна Македонија во НАТО, кој во континуитет се зацврстува. Достигнувањето на 2,05 % од БДП во буџетот на одбраната, од кои 30 % се за модернизација на Армијата, се силен индикатор за тој придонес.
Воедно, со учеството во колективната безбедност преку мултинационалните сили на алијансата во Романија, во Бугарија и во Латвија, како и во мисијата на НАТО во Косово, КФОР и во операцијата на ЕУ во Босна и Херцеговина, АЛТЕА, земјата дополнително се позиционира и како еден од столбовите на регионалната стабилност.
На средбата двете делегации имаа можност да разговараат за самитот на НАТО во Вашингтон во духот на 75-годишнината на алијансата, како и за актуелните одбранбени планови имајќи ја предвид глобалната безбедносна состојба во Европа и светот.
Воедно, двете делегации ја потврдија и поддршката што земјите членки, вклучително и Северна Македонија, ја даваат за Украина.
Од страна на помошникот на генералниот секретар Лапсли беше истакнато дека Северна Македонија е ценета членка во алијансата имајќи го предвид целокупниот придонес што досега го има дадено. Алијансата е пообединета и посилна од кога било во својата историја, а со зачленувањето на Финска и Шведска, НАТО станува гарант на безбедноста на над 1 милијарда граѓани од демократскиот свет.
Македонија
Ангелов за ДУИ: Со пушка дојдоа на власт, со пенкало да ги отераме на буништето на историјата
Колку и да е убедлива, победата нема да биде комплетна доколку ДУИ не биде срушена од власт, вели претседателот на Достоинство, Стојанче Ангелов по првиот круг од претседателските избори.
„Затоа е потребна општа мобилизација за уште посилна победа на коалицијата “Твоја Македонија” предводена од ВМРО ДПМНЕ. Граѓаните ги отпишаа СДСМ, да запнеме сите заедно да ги отпишеме и ДУИ. Овојпат ДУИ мора да падне! Со пушка дојдоа на власт, со пенкало да ги отераме на буништето на историјата!“, порача Анеглов.
Ангелов пред еден месец соопшти дека неговата партија излегува од коалицијата предводена од СДСМ.
Тој со години се залагаше воените инвалиди и семејства на загинатите бранители да бидат обештетени, но немаше слух од своите коалициони партнери. Како што самиот рече, добивал поддршка од премиерот Димитар Ковачевски и министерката за одбрана Славјанка Петровска, но поради противењето на ДУИ тоа не се случило.