Македонија
Левица предлага наставата во училиштата целосно да се одвива онлајн
Од политичката партија Левица велат дека се згрозени од постојаните пазарења и калкулации со животите на децата и предлагаат наставата целосно да се одвива онлајн.
Велат дека политичките игри и уцени мора да имаат граница кога станува збор за здравјето на децата.
„Тука нема да ја коментираме способноста на министерот, кој инсистира на настава во училиште а притоа и самиот бил заразен од Ковид-19, да изнајде соодветен модел на организација за заштита на децата“, велат од Левица.
Додаваат дека МОН имал повеќе од пет месеци време да изнајде соодветна сеопфатна платформа за онлајн едукација, како и да организира обуки за наставниците и родителите, но не го сторило тоа. Затоа тие ги предлагаат бесплатните платформи Microsoft Teams, Google Classroom и G Suite Education. Велат дека со оглед на тоа што почетокот на училишната година се одложува, сè’ уште има доволно време да се организираат обуки за истите.
„Што се однесува до мерките и насоките, ги имаме следните предлози:
1. Обезбедување настава на отворено во помали групи за првачињата, а во случај на временска непогода да бидат обезбедени простории – во училиштата или други соодветни простории кои се во владение на општината или одложување на започнувањето на училишната година за првоодделенчињата со можност истата да се одвива по скратена наставна програма од 1 февруари до 20 јуни;
2. Наставата да се одвива онлајн, преку видеоврска, а тестирањатада се одвиваат во живо, во групи од 4-5 ученици и со запазување на сите мерки на претпазливост, најмалку на секои три месеца, со можност учениците да имаат и консултации со физичко присуство во утврдени термини;
3. Обезбедување на задолжителна акредитација за G Suite Education за сите образовни институции со цел да се премине на онлајн настава од 2 до 9 одд. во основните училишта и средните училишта;
4. Обезбедување потребна техника од страна на МОН за учениците кои не се во можност да ја обезбедат самите;
5. Задолжителна едукација на наставниот кадар и учениците за G Suite Education и Google classroom;
6. Препорака за факултетите да ги прилагодат своите капацитети за практична настава, со формирање на повеќе помали групи на студенти, со запазување на протоколите за заштита од Ковид-19;
7. Ангажирање на образовните асистенти за децата со ПОП, со целосен опфат на децата од таа категорија, а со цел да им се помогне во совладување на онлајн наставните содржини;
8. Обезбедување (дополнителна ) ТВ-настава (на пример, да се адаптираат МРТВ 3, 4 или 5) за ученици од 1 до 5 одд., а наставниците кои ќе се пријават за тоа да бидат стимулирани со поголема плата;
9. Педагошката евиденција да биде водена само електронски;
10. Еден на еден настава во уметничките училишта, со запазување на мерките за претпазливост;
11. Да се обврзат наставниците по физичко образование да организираат активности на отворено, со држење на препорачаната дистанца“, предлага политичката партија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Во Куманово не се гласа на три избирачки места, на едното се изгубил печатот
Прекин на гласањето има на три места во Куманово, информираше претседателот на Државната изборна комисија (ДИК), Александар Даштевски.
Како што појасни, на едното бил изгубен печатот. На останатите две, биле направени обиди да се замени уредот за биометриска верификација, пришто гласањето во едниот случај продолжило па прекинало, а во вториот не продолжило.
„Тоа се трите места за коишто имаме добиено писмено известување. Ќе видиме вечер за што точно се работи и ќе одлучиме“, рече Даштевски, одговарајќи на новинарски прашања.
Од ДИК појаснуваат дека се работи за прекин за повеќе од три часа, додека онаму каде што имало помали прекини, гласањето ќе се продолжи за онолку време колку што било прекинато.
На сите останати гласачки места, гласањето тече нормално и мирно, додаваат.
Пред полноќ се очекува да бидат обработени над 50 отсто од гласовите и ДИК да ги објави првичните неофицијани резултати.
Во однос на информациите за починати луѓе на избирачкиот список од ДИК обазложија дека оние коишто ќе починат 30 дена пред гласњето ги има на избирачкиот список, бидејќи тој е веќе заклучен. Велат дека списокот се ажурира неколкупати годишно во координација со Управа за водење на матични книги.
Македонија
Одѕивот до 17 часот изнесува 44,18 отсто – за околу 9 проценти повеќе во споредба со претходните претседателски избори
До 17 часот во првиот круг од претседателските избори, своето право на глас го оствариле 397.612 избирачи, или 44,18 отсто.
Како што соопшти претседателот на Државната изборна комисија (ДИК), Александар Даштевски, засега најголема е излезноста во Новаци, каде гласале 67,19 отсто, а најмала во Пласница – 15,5 отсто.
Засклучокот е дека гласањето се одвива мирно.
Во споредба со првиот круг од претседателските избори во 2019 година, до 17 часот, излезноста е поголема за околу 9 отсто.
Досега до ДИК се доставени 308 приговори, од кои 85 се усвоени, 27 отфрлени како неуредни, а 38 се одбиени. Останатите се во процес на обработка.
Македонија
Петмина си ги фотографирале гласачките ливчиња, полицијата ги фати
Пет лица во периодот од 11 до 14 часот, биле фатени од страна на полицијата оти ги фотографирале своите гласачки ливчиња додека го остварувале своето право на глас, објави МВР.
-Во 11.10 часот е пријавено дека во село Коџалија, општина Радовиш на избирачко место број 1602 С.А. од с.Коџалија го фотографирал гласачкото ливче. Се преземаат мерки за расчистување на случајот, по што ќе биде поднесен соодветен поднесок.
-Околу 12.15 часот е пријавено дека на избирачко место број 2683/1 во Скопје А.С. (40) од Скопје го фотографирал гласачкото ливче. Се преземаат мерки за расчистување на случајот, по што ќе биде поднесен соодветен поднесок.
-Околу 12.15 часот е пријавено дека А.И.(48) од Охрид на избирачко место број 1271 во Охрид го фотографирал гласачкото ливче. А.И. е приведен во полициска станица и по документирање на на случајот ќе биде поднесен соодветен поднесок.
-Во 12.35 часот е пријавено дека на избирачко место бр.0006 во Берово, Д.Т.(42) го фотографирал гласачкото ливче. Д.Т. е приведен во полициска станица и по документирање на на случајот ќе биде поднесен соодветен поднесок.
-Во 13.57 часот е пријавено дека на избирачко место 2555 во Скопје С.С. го фотографирала гласачкото ливче. Се преземаат мерки за расчистување на случајот, по што ќе биде поднесен соодветен поднесок, се наведува во извештајот на МВР.