Македонија
Лидија Димова не дојде на првото судење за злоупотреби, судијката реагира
Разрешената директорка на Националната агенција за европски образовни програми и мобилност, Лидија Димова, не дојде на првото судење, каде што треба да ѝ се суди за злоупотреби. Судењето експресно се одложи и бидејќи обвинителката Сузана Мирческа-Кузмановска пет минути пред почетокот на рочиштето известила дека има други службени обврски, па не може да дојде.
Судијката Фанка Јанчулева-Михаиловска рече дека не ѝ се допаѓа ваквиот почеток на судскиот процес.
„Се бара одлагање поради влошена здравствена состојба на Лидија Димова“, изјави судијката Јанчулева-Михаиловска, а адвокатката Миа Ношпал-Чорак рече: „Не сум стапила во контакт, ја испрати лекарската потврда, не се чувствува добро, мисли дека е корона. Не сум се видела зашто не сакам и јас да си го загрозам здравјето“.
Судијката е децидна дека потврдата што Димова ја доставила не е доволна за одлагање на рочиштето: „Не гледам дека има какви било други анализи. Потврдата е од 9.11.2022 година. Само чисто домашно лекување? Или има анализи?“, а адвокатката одговори: „Веројатно се правени анализи“.
„Доставете ги за да нема погрешна слика. Ова за мене не е доволно за одлагање на рочиштето. Освен што ќе има предлог за одлагање, мора да има и докази прифатливи за судот за да се одложи рочиштето“, укажа Јанчулева-Михаиловска.
По ова, беше презентиран и допис од Сузана Мирческа-Кузмановска, обвинителката што ги гони обвинетите. Таа исто барала одлагање поради неодложни обврски.
„Не ми се допаѓа ваквиот почеток на постапката. Се надевам ќе се коригира“, рече судијката Јанчулева-Михаиловска.
Димова се гони за направена штета од 20 милиони денари со злоупотреби.
Според Обвинителството, средствата што се злоупотребени се на европската заедница. Заедно со Димова се гонат и Александар Гочев и благајничката Ана Павлиду.
Гочев одговара за подигнување авансни пари од Агенцијата без соодветна документација. Павлиду одговара бидејќи му ги издала парите, а не смеела.
Според Обвинителството, Димова сторила две кривични дела, и тоа злоупотреба на службената положба и овластувањето и измама на штета на европската заедница. Гочев сторил само едно дело, измама на штета на европската заедница. Павлиду се гони за несовесно работење во службата.
Случајот го суди судијката Фанка Јанчулева-Михаиловска, која ги застапува и предметите против ексгенералниот секретар Драги Рашковски, а ќе суди и на случајот во кој обвинет е Мухамед Зеќири.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
„Властите во Бугарија продолжија да негираат регистрација на етничко-македонски активистички групи“, се наведува во извештајот на Стејт департментот
Министерот за правда ги затвори бугарските културни клубови „Цар Борис Трети“ и „Иван (Ванчо) Михајлов“, повикувајќи се на законот од 2022 година, со кој се бара од организациите именувани по поддржувачи или соработници на фашизмот да ги променат своите имиња, се наведува во извештајот на Стејт департментот.
„Во февруари, по препорака на Комисијата за антидискриминација, обвинителството во Битола отвори прелиминарна истрага за клубот „Иван (Ванчо) Михајлов“ поради говор на омраза. Претседателот на клубот беше обвинет за поттикнување етничка и расна омраза и нетолеранција и ширење расизам и ксенофобија. Две лица се обвинети за нанесување тешки телесни повреди на Христијан Пендиков, кој се саморегистрирал како Бугарин, по национална и етничка основа на омраза“, се вели во извештајот.
Во однос на слобода на здружување во Бугарија, во извештајот се наведува дека Законот предвидува право на слобода на здружување и владата генерално го почитувала.
„Властите продолжија да негираат регистрација на етничко-македонски активистички групи како што се Обединета македонска организација-Илинден, Друштвото на угнетените Македонци во Бугарија-жртви на комунистичкиот терор, Здружението за заштита на основните индивидуални човекови права 2023 година и Македонскиот културен клуб „Никола Вапцаров“ и покрај бројните претходни одлуки на Европскиот суд за човекови права дека негирањето ја нарушува слободата на здружување на групите.
Во февруари, Окружниот суд во Пловдив ја потврди одлуката на Агенцијата за регистрација со која се одбива регистрацијата на Обединетата македонска организација Илинден-Пловдив со образложение дека целите на групата, вклучително и официјалното признавање на македонското етничко малцинство, биле насочени кон поделба на нацијата и ќе создадат услови за етнички конфликт. Во мај, Апелацискиот суд во Пловдив ја потврди одлуката на понискиот суд“, нотира извештајот.
Македонија
Недоверба кон судството, насилства кон ЛГБТ-и заедницата и поткопана слобода на изразување, забележа Стејт департментот во извештајот за човекови права во Македонија
Сериозна владина корупција, сериозни ограничувања на слободата на изразување и слободата на медиумите, насилство и закани за насилство насочени кон ЛГБТ-и заедницата се само дел од забелешките во извештајот на Стејт департментот за состојбата со човековите права во Северна Македонија во 2023 година.
Извештајот меѓудругото нотира значителни „одложувања во судењата кои вклучуваат сериозна корупција, при што само неколку беа завршени до септември, вклучително и оние против поранешни владини функционери. Уставот предвидува независно судство, но владата не секогаш ја почитувала судската независност и непристрасност, вели извештајот.
„Веродостојните извештаи за неоправдано судско несоодветно однесување, непотребен политички и деловен притисок врз судиите, непотизам, клиентелизам, долготрајна правда, несоодветно финансирање, отпор кон користење на законски задолжителна технологија и недоволен кадар, ја попречија судската ефикасност и влијаеше на довербата на јавноста во владеењето на правото“.
Анкетите покажале силна недоверба на јавноста кон судството.
„Унапредување под политичко влијание без заслуга или транспарентност се случи во судството и обвинителството. Во јануари, Судскиот совет утврди дека двајца судии на Апелациониот суд во Скопје свесно ги одложиле одлуките за да ги истуркаат обвинетите да го поминат рокот на застареност. На 26 април, Судскиот совет го разреши својот претседател, потег што критичарите тврдеа дека укажува на политичко мешање. Двајца членови поднесоа оставки од Судскиот совет како одговор, а неколку истакнати граѓански организации побараа целосна оставка на Советот“.
Слободата на изразување била поткопана од неефикасноста на правосудниот систем, недостатокот на транспарентност во однос на медиумското рекламирање од страна на државните институции, несоодветното однесување во име на јавните службеници во нивната интеракција со новинарите, притисокот врз новинарите кои истражуваат корупција, дезинформациите, говорот на омраза во онлајн и социјалните медиуми, и самоцензура.
Македонија
Одрони на неколку патни правци
ЦУК извести дека преку единствениот број за Итни повици Е-112 добиена е дојава за одрон на патот кај Калиманци, на регионалниот пат Македонска Каменица-Виница, 5 километри пред влезот на Македонска Каменица.
За настанатата состојба известени се ЈП за оддржување на регионалните и магистралните патни правец и екипите се излезени на терен за да го саниррат одронот, додаваат од ЦУК.
Исто така добиена е дојава за одрон на патен правец село Удово-Демир Капија.
„Точната локација е 2-3 километри после село Удово во правец спрема Демир Капија. За настанатата состојба известени се ЈП за оддржување на регионалните и магистралните патни правец и екипите се излезени на терен за да го санираат одронот“, соопшти ЦУК.