Македонија
Макрадули: Скопје во грејната сезона троши онолку дрва колку што има на Водно
На иницијатива на Светската банка, во соработка со Министерството за животна средина и просторно планирање, денеска во Скопје се одржува регионална конференција „Управување со квалитетот на воздухот (AQM) во регионот на Западен Балкан – прашања, решенија и можности за финансирање“.
На конференцијата, на која со свои обраќања настапија министерот за животна средина и просторно планирање, Насер Нуредини, министерот за животна средина на Република Косово, Фатмир Матоши, директорот на Светска банка за Северна Македонија и Косово во рамките на регионот на Европа и Централна Азија, Марко Мантованели, и заменик-министерот за животна средина и просторно планирање, Јани Макрадули, воведничарите се осврнаа на потребата од заедничко дејствување, за изнаоѓање механизми за имплементација на најдобрите начини за борба против аерозагадувањето.
Министерот Нуредини поздравувајќи ги учесниците, изрази уверување дека дискусиите ќе бидат конструктивни и корисни за справување со најголемиот предизвик во нашата земја и регионот, а тоа е присуството на штетни ПМ-честички.
„Знаеме дека едно од најголемите причини е затоплувањето на домовите и начинот на којшто се грееме. Во зимскиот период ова влијае на квалитетот на воздухот, а патниот сообраќај е уште една причина загадувањето, како и старите и лошо одржувачите возила, за кои знаеме статистички дека се речиси 60 проценти под стандардот Еуро 4. Енергетското производство и индустријата исто така имаат свое влијание на квалитетот на воздухот, како и намалувањето на зелените површини“, рече министерот за животна средина и просторно планирање, потенцирајќи дека Министерството презема активности за следење и подобрување на квалитетот на воздухот за развивање на краткорочни и долгорочни мерки.
Заменикот-министер Макрадули подетално пред присутните презентираше податоци за загадувањето, задржувајќи се на проблемите, решенијата и финансиските аспекти.
„Кога се зборува за загаденоста кај нас, зборуваме дека таква во 90 проценти штетните материи доаѓаат од греењето на дрва, за жал, и од греењето на пластика, гуми, од пожарите, користењето на јаглен. За жал, Скопје, во една зимска сезона троши 317 илјади тони дрва, онолку колку што има на планината Водно. Имаме мала енергетска ефикасност на објектите, многу возила, околу 30.000 доаѓаат во Скопје, за жал, се палат почвите и отпадот, и во зимската сезона не се сите градежни активности се согласно стандардите“, рече заменик-министерот за животна средина и просторно планирање.
Тој додаде дека во наредниот период ќе се имплементираат мерките од Планот за чист воздух, донесен од Владата, каде се внесени препораките од Светската здравствена организација за борба со овој проблем и за кој за првпат има одвоено средства во буџетот.
„Тој беше препознаен од страната на Европската комисија и за првпат, како што вели Комисијата – има план и средства кои не се многу и затоа бараме заедничка помош со сите“, подвлече Макрадули правејќи споредба дека слични проекти предвидени во Планот за чист воздух имаат и многу земји како Полска, Чешка, Словачка, Бугарија, каде што се стимулира замената на нееколошки извори.
Заменик-министерот Макрадули најави дека со поддршка на Светската банка Министерството покренува заедничка иницијатива со земјите од регионот за формирање Работна група којашто ќе се справува со заедничките проблеми кои го создаваат аерозагадувањето, како во делот на активностите така и во делот на мобилизирање на финансиски средства за справување со проблемите и изворите на загадување.
Директорот на Светска банка за Северна Македонија и Косово во рамките на регионот на Европа и Централна Азија Марко Мантованели, се задржа на податоците дека аерозагадувањето е поширок проблем и дека 4,2 милиони луѓе во светот секоја година умираат од аерозагадувањето, додавајќи дека заболувањата од загадувањето на воздухот се сериозен проблем и за земјите од Западен Балкан и од тие причини Светската банка помага во напорите на локалните влади да преминат од анализи на состојбите кон конкретни решенија.
Регионалната конференција денеска ќе резултира со Заедничка декларација за чист воздух во регионот на Западен Балкан, со која ќе се повика на заедничка имплементација на сите активности и мерки на земјите, со оглед на тоа што загадувањето на воздухот не познава физички граници.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Сервисни информации
Променливо облачно со повремени врнежи од дожд, а на планините со повремен снег
Времето денеска ќе биде, променливо облачно со повремени врнежи од дожд, а на планините со повремен снег.
Локално, врнежите ќе бидат поројни, проследени со појава на ретки грмежи. Ќе дува слаб до умерен ветер од северозападен правец. Минималната температура ќе биде во интервал од 5 до 10, а максималната ќе достигне од 11 до 18 степени.
Во Скопје променливо облачно со повремени врнежи од дожд. Кон крајот на денот врнежите ќе престанат. Ќе дува слаб до умерен ветер од северен правец. Минималната температура ќе се спушти до 8, а максималната ќе достигне до 15 степени.
Од петок следува период на претежно стабилно и потопло време со пораст на температурите на воздухот.
Скопје
Осум скопски општини денеска без струја
Според добиеното известување од ЕВН Македонија АД, Регионалниот центар за управување со кризи-Град Скопје, информира дека, поради планирани технички зафати во електро дистрибутивната мрежа, денеска без електрична енергија ќе останат неколку скопски општини.
· Во периодот од 08:30 до 14:00 часот, дел од корисниците на ул.Максим Горки, реон Дом на градежници (општина Центар).
· Во периодот од 09:00 до 14:00 часот, поголемиот дел од потрошувачите на ул.Ринхини.(општина Ѓорче Петров)
· Во периодот од 09:00 до 10:30 часот, корисниците од с.Визбегово, дел од с.Мирковци, Бразда, Глуво, Чардак, Оризари.(општините Бутел, Шуто Оризари и Чучер Сандево)
· Во периодот од 09:00 до 15:00 часот, корисниците од ул.Кавалска.(општина Кисела Вода)
· Во периодот од 09:00 до 12:00 часот, корисниците на пат за Долно Лисиче, од Кодакопласт, кон Паци Петрол до реката, од Св.Петар и Павле по патот кон Долно Лисиче.(Аеродром)
· Во периодот од 09:00 до 10:00 часот, корисниците од дел од ул. 4031, село Марино.(општина Илинден)
· Во периодот од 09:00 до 13:00 часот, корисниците на дел од бул.Борис Трајковски (од Техноскоп до кружниот тек пред Драчево).(општина Кисела Вода)
· Во периодот од 10:30 до 12:00 часот, корисниците од с.Сандево, Бањане, Горњане, Дел од с.Мирковци.(општина Чучер Сандево)
· Во периодот од 13:00 до 15:00 часот, дел од корисниците на ул. Исаија Мажовски и Воин Драшкоци.(општина Ѓорче Петров)
Македонија
Димитриевски до Пендаровски: Разликата е огромна, откажете се од оваа битка и оставете нè да победиме во вториот круг
Денеска ЗНАМ заедно со сите свои пддржувачи ја испишува новата политичка историја на македонската политичка сцена, рече вечерва претседателскиот кандидат на ЗНАМ, Максим Димитриевски. Иако е јасно дека не влегува во вториот круг, Димитриевски првиот круг од изборите го смета за голем успех.
„Можам да потврдам дека се роди третата политичка сила во македонскиот политички блок во државата која што имаме намера во следниот период дополнително да ја потврдиме и надградиме, со цел еден ден граѓаните да имаат можност да изберат нешто ново“, рече Димитриевски.
На противкандидатите им честиташе за успехот и се заблагодари на можноста да води кампања за која рече дека не била еднаква за сите оти законот кој е во сила не дава еднаква можност за медиумско претставување на сите партии.
Рече дека е горд на секој глас што го добиле како партија регистрирана пред само три месеци.
„Факт е дека јас како кандидат и ЗНАМ освоивме повеќе од 80.000 гласови. Регистриравме субјект кој постои нешто повеќе од три месеци и со граѓанската поддршка се етаблираше на трето место во политичкиот блок. Сметам дека тоа е одличен појдовен резултат за понатамошна борба. Јас не се сеќавам дека во историјата на плурална Македонија имало вакви примери, да имате партија со некаде три и пол илјади членови, а да освоите над 80.000 гласови. Искрено сум горд на секој тој еден глас што дојде, како поддршка за мене и ЗНАМ. И покрај тоа што трендовите се тие, десницата добива, а левицата губи, единствено десницата доживеа пораз во бастионот на асномска Македонија, а тоа е Куманово“, рече Димитриевски.
Порача на сите политичари дека треба да учат од овие избори оти граѓаните дале јасна насока каде сакаат да се движи државата, а посебна порака упати до Стево Пендаровски, кој освои повеќе 100.000 гласови помалку од Гордана Сиљановска-Давкова.
„Почитуван мој претседателе, разликата е огромна. Доколку сакате да опстане централната и левата идеја во државата, откажете се од оваа битка и оставете не да победиме во име на граѓаните во вториот круг“, порача Димитриевски.
Кога ќе завршат парламентарните избори, Димитриевски е уверен дека ЗНАМ ќе биде политички фактор за стабилност во државата без кој нема да може да се формира идната влада. Најави дека кога ќе ги почнат преговорите за формирање парламентарно мнозинство, на сите политички партии ќе им ги испорачаат нивните предлози за црвените линии на македонскиот народ.