Македонија
Маричиќ: Евроинтеграциите не се само стратешки приоритет, туку и дел од домашната развојна стратегија
Заменик-претседателот на Владата задолжен за европски прашања и национален ИПА-координатор, Бојан Маричиќ, денеска имаше обраќање на тематската владина седница за ИПА на кое ги информираше министрите за почетокот на процесот на изработка на ИПА-програмата за 2023 година, при што Владата ја разгледа и ja усвои Информацијата за почеток на програмирање на Акциската програма во рамките на ИПА 3.
„Покажавме капацитет за реализација на проекти финансирани од грантовите на ЕУ, но и учество во бројни заеднички секторски политики на ЕУ. Евроинтеграциите не се само стратешки приоритет, туку и дел од домашната развојна стратегија“, рече на седницата вицепремиерот Маричиќ.
Вицепремиерот и национален ИПА-координатор Маричиќ го објасни процесот на „созревање“ на проектите, како и правилата и условите за искористување на поддршката од ИПА на ефикасен начин со цел да се избегне губење средства. Тој потсети дека целта на спроведувањето проекти финансирани преку ИПА е да се подобри животот на граѓаните, но и да се отворат нови работни места и затоа е клучно да се реализираат навремено и плански.
„Република Северна Македонија во моментов ги спроведува програмите преку Инструментот за претпристапна помош ИПА 2014-2020, а од средината на 2020 година започна со подготовка на програмските документи за спроведување на Инструментот за претпристапна помош 2021-2027 кои таргетираат одредени сектори како што се транспорт, животна средина, земјоделство“, рече вицепремиерот Маричиќ, посочувајќи дека преку овие проекти се обезбедува остварување на националните и секторските стратешки приоритети, кои воедно претставуваат приоритети на Европската Унија за земјата во делот на поврзувањето на транспортната инфраструктура, заштита на животна средина и спроведување на приоритети од Зелената агенда, како и поддршката на земјоделството и руралниот развој.
Од Акциската програма во рамките на ИПА 3 се очекува да се утврдат приоритетите за финансирање на владините програми и проекти од овој инструмент за претпристапна помош на Европската Унија и во таа насока вицепремиерот Маричиќ за следната недела го најави состанокот на Програмската мисија ИПА 2023, на кој ќе бидат присутни и делегати од Европска комисија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
„Рекет“ не е расчистен, барам фер шанса за да ја докажам својата невиност, Заев беше човекот што комуницира директно со сите, вели Бојан Јовановски
Бојан Јовановски, денеска, во Кривичниот суд предаде барање за повторување на кривичната постапка за предметот „Рекет“, во кој како првообвинет беше осуден на казна затвор од девет години.
Оваа одредба, како што појасни тој, ја користи врз основа на прибавување нови докази.
Барањето, како што рече, е поднесено поради нови околности и докази што не биле употребени во доказната постапка.
„Случајот ‘Рекет’ не е расчистен. Тој случај треба целосно да се расчисти, сите инволвирани да одговараат, а јавноста, конечно, да дознае што точно се случувало и каде се парите. Затоа, денеска, официјално, во Основниот кривичен суд поднесувам барање за повторување на кривичната постапка со името ‘Рекет’“, истакна тој.
Рече дека поседува цврсти докази, кои набргу ќе ги приложи, посочувајќи го експремиерот Зоран Заев дека е човекот што комуницирал директно со сите лица што биле кривично засегнати со постапките на СЈО.
„Обвинителката Вилма Русковска презентира само две-три пораки што сум ги разменил јас со тогашниот премиер Зоран Заев, а токму од тие две-три пораки излегува дека Зоран Заев знаел за случајот ‘Рекет’, но во една позитивна афирмативна смисла, односно дека тој е човекот што го бранел законот. А јас ќе ви кажам дека тој е сè, само не е човекот што го бранел законот. Значи, Зоран Заев беше човекот што комуницира директно со сите лица што беа кривично засегнати во постапките на специјалното јавно обвинителство. Зоран Заев беше човекот што од позиција на моќ имаше реален авторитет и можеше да влијае врз многу постапки и влијаеше врз многу постапки“, посочи Јовановски.
Појасни дека зад случајот „Рекет“ стоела една политичка консталација на притисоци.
„Јас сум единствениот цивилен граѓанин во ова општество што е суден за кривично дело што е предвидено за лица што вршат службена положба. Досега се судени Сашо Мијалков и Никола Груевски, третиот суден по ова кривично дело сум јас, но разликата е тоа што тие вршеле службена положба, а јас сум бил цивилен граѓанин“, изјави тој.
„Барам да ми биде дадена шанса во фер постапка, а не искривоколчена и избрзана, да ги докажеме материјалната вистина и фактичката состојба, т.е. што навистина со случувало во фамозниот ‘Рекет’, случај зад кој стоеше цела констелација на политички притисоци“, додаде Боки 13.
Тој истакна дека притисоци му биле вршени и во пресрет на денешната прес-конференција, но, како што рече, воопшто не се плаши и ќе продолжи и понатаму да зборува.
Македонија
Бојмацалиев: Една година ФРОНТЕКС – прв договор потпишан на македонски јазик со ЕУ
Дополнителниот заменик-министер за внатрешни работи, Митко Бојмацалиев, заедно со директорот на Бирото за јавна безбедност, Сашо Тасевски, и државната секретарка, Магдалена Несторовска, оствари работна средба со раководството на Регионалниот центар за гранични работи „Југ“ по повод одбележувањето една година од почетокот на мисијата на ФРОНТЕКС во Република Северна Македонија, а со цел промоција на соработката помеѓу претставниците на ФРОНТЕКС во локалниот координативен центар и одговорните старешини од РЦ за ГР ЈУГ, како и промовирање на европскиот пристап на координирање на сите заеднички активности и справување со предизвиците.
„Одбележуваме една година од работата на макеоднската полиција заедно со ФРОНТЕКС, со цел да ги одбраниме нашите и границите на ЕУ од прилив на мигранти. Тоа успешно го правиме од 2015 до денеска. Договорот е од историска важност, тогашниот министер Оливер Спасовски ја имаше честа да го потпише со Европската Унија и ја отвори вратата за поинтензивна оперативна соработка заснована на доверба и меѓусебно почитување“, истана Бојмацалиев во изјава за медиумите заблагодарувајќи се до Тасевски и Несторовска за напорите што ги направија договорот да биде на македонски јазик и успешно да функционира во нашата држава.
„Со тоа уште еднаш покажуваме дека македонската полиција е рамо до рамо со европските полиции, заедно работиме и од неодамна имаме барање од други полиции да вршиме обуки на нивните службеници како се справуваме со миграцијата. Од земја што бараше помош од другите држави за справување со миграцијата, сега нудиме помош“, рече Бојмацалиев.
Македонија
Ковачки ги повика неопределените да гласаат: „ Да се обединиме за идејата ‘Македонија повторно твоја’“
Народот е подготвен и обединет за промени, приклучете се кон ВМРО-ДПМНЕ за да ја поразиме оваа ненародна и криминална влада на СДС и ДУИ, порача Драган Ковачки, член на ИК на ВМРО-ДПМНЕ и носител на изборна единица 3.
„Денеска сме во Кратово, Ранковце и Крива Паланка. Тука сме да презентираме проекти од Платформата 1198, ќе поразговараме со сите граѓани. Ги повикувам сите граѓани кои сеуште не се определиле и кои што ја чувствуваат позитивната енергија која што доаѓа од ВМРО-ДПМНЕ, да се обединиме околу идејата за Македонија повторно твоја, да се обединиме околу проблемите“, рече Ковачки.
Како што додаде вчерашниот митинг во Охрид покажал дека народот е подготвен и обединет за промени, а ВМРО-ДПМНЕ е партија за македонско национално единство.