Македонија
Милошоски: Само пренесував информации објавени во повеќе медиуми
По објавениот демант од страна на Почесниот конзулат на Белорусија во Скопје во врска со информациите што Антонијо Милошоски ги изнесе вчера на собраниската говорница, на „Фејсбук“ се огласи пратеникот на ВМРО-ДПМНЕ, кој објасни дека наводите што ги презентирал претходно биле пренесени од најмалку 5 медиуми и дека станува збор за прашање од јавен интерес.
„Сосема легитимно за секој пратеник е до Владата да постави прашање од јавен интерес дали тие медиумски наводи за барање рекет на фирмите што работат во РЕК ‘Битола’ се точни“, пишува Милошоски во својата објава на „Фејсбук“, со која се обраќа до почесниот конзул на Белорусија, Борче Марковски, за кој забележува дека е сопственик на „Марковски компани“ од Битола.
Пратеникот Милошоски на вчерашната седница на Собранието, посветена на пратенички прашања, истакна дека во кабинетот на премиерот Заев дошол белорускиот амбасадор за да разреши спор во врска со случај во кој на бизнисмен од Битола, познајник на амбасадорот, му бил побаран рекет од 250 илјади евра.
Тврдењето беше демантирано од премиерот Заев, а денеска следуваше и демант од Почесниот конзулат на Белорусија во Скопје, од каде што порачаа дека се работи за лажни вести и најавија протестна нота во врска со изјавата.
Меѓутоа, Милошоски смета дека секој пратеник има должност да коментира и изнесува теми што медиумите ги објавиле и се од јавен интерес, така што поради демантот дека како пратеник изнел лажни вести, се закани со тужба до почесниот конзул на Белорусија. Претеникот на ВМРО-ДПМНЕ пишува дека ваквите обвинувања не одговараат на вистината и ги смета за навреда и клевета со која му се нанесува штета на угледот во работата и извршувањето на неговите обврски како пратеник.
„Вие сте одлучиле со известување во име на Почесниот конзулат, без претходно да побарате информација од мене, без претходно јавно да реагирате до медиумите што пренеле наводи за барање рекет на фирми во РЕК ‘Битола’ како тема од јавен интерес, да тврдите дека ‘од страна на пратеник се извадени лажни вести’, што не одговара на вистината и го сметам за навреда и клевета со која му се нанесува штета на угледот во работата и извршувањето на моите обврски како пратеник. Дали Вие ќе полемизирате или ќе ги демантирате медиумите што дојавуваат дека на приватни фирми им се бара рекет за тендери, не Ви се мешам, тоа е Ваша лична одлука и како почесен конзул и како стопанственик со ‘Марковски компани’. Повеќе детали и објаснување на оваа тема ќе добиете на Вашата официјална имејл-адреса од страна на мојот адвокат“, наведува Милошоски во објавата упатена до почесниот конзул на Белорусија, Борче Марковски, и бара од него да објави извинување и повлекување на неговата изјава, а во спротивно пратеникот најави дека ќе ги преземе преостанатите законски можности.
Во прилог како доказ на неговите тврдења пратеникот од редовите на ВМРО-ДПМНЕ приложува и линк од неговиот настап во Собранието, во кој, како што вели, може да се чуе прашањето упатено до премиерот за тоа дали се точни информациите и наводите што ги пренесуваат медиумите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
„Властите во Бугарија продолжија да негираат регистрација на етничко-македонски активистички групи“, се наведува во извештајот на Стејт департментот
Министерот за правда ги затвори бугарските културни клубови „Цар Борис Трети“ и „Иван (Ванчо) Михајлов“, повикувајќи се на законот од 2022 година, со кој се бара од организациите именувани по поддржувачи или соработници на фашизмот да ги променат своите имиња, се наведува во извештајот на Стејт департментот.
„Во февруари, по препорака на Комисијата за антидискриминација, обвинителството во Битола отвори прелиминарна истрага за клубот „Иван (Ванчо) Михајлов“ поради говор на омраза. Претседателот на клубот беше обвинет за поттикнување етничка и расна омраза и нетолеранција и ширење расизам и ксенофобија. Две лица се обвинети за нанесување тешки телесни повреди на Христијан Пендиков, кој се саморегистрирал како Бугарин, по национална и етничка основа на омраза“, се вели во извештајот.
Во однос на слобода на здружување во Бугарија, во извештајот се наведува дека Законот предвидува право на слобода на здружување и владата генерално го почитувала.
„Властите продолжија да негираат регистрација на етничко-македонски активистички групи како што се Обединета македонска организација-Илинден, Друштвото на угнетените Македонци во Бугарија-жртви на комунистичкиот терор, Здружението за заштита на основните индивидуални човекови права 2023 година и Македонскиот културен клуб „Никола Вапцаров“ и покрај бројните претходни одлуки на Европскиот суд за човекови права дека негирањето ја нарушува слободата на здружување на групите.
Во февруари, Окружниот суд во Пловдив ја потврди одлуката на Агенцијата за регистрација со која се одбива регистрацијата на Обединетата македонска организација Илинден-Пловдив со образложение дека целите на групата, вклучително и официјалното признавање на македонското етничко малцинство, биле насочени кон поделба на нацијата и ќе создадат услови за етнички конфликт. Во мај, Апелацискиот суд во Пловдив ја потврди одлуката на понискиот суд“, нотира извештајот.
Македонија
Недоверба кон судството, насилства кон ЛГБТ-и заедницата и поткопана слобода на изразување, забележа Стејт департментот во извештајот за човекови права во Македонија
Сериозна владина корупција, сериозни ограничувања на слободата на изразување и слободата на медиумите, насилство и закани за насилство насочени кон ЛГБТ-и заедницата се само дел од забелешките во извештајот на Стејт департментот за состојбата со човековите права во Северна Македонија во 2023 година.
Извештајот меѓудругото нотира значителни „одложувања во судењата кои вклучуваат сериозна корупција, при што само неколку беа завршени до септември, вклучително и оние против поранешни владини функционери. Уставот предвидува независно судство, но владата не секогаш ја почитувала судската независност и непристрасност, вели извештајот.
„Веродостојните извештаи за неоправдано судско несоодветно однесување, непотребен политички и деловен притисок врз судиите, непотизам, клиентелизам, долготрајна правда, несоодветно финансирање, отпор кон користење на законски задолжителна технологија и недоволен кадар, ја попречија судската ефикасност и влијаеше на довербата на јавноста во владеењето на правото“.
Анкетите покажале силна недоверба на јавноста кон судството.
„Унапредување под политичко влијание без заслуга или транспарентност се случи во судството и обвинителството. Во јануари, Судскиот совет утврди дека двајца судии на Апелациониот суд во Скопје свесно ги одложиле одлуките за да ги истуркаат обвинетите да го поминат рокот на застареност. На 26 април, Судскиот совет го разреши својот претседател, потег што критичарите тврдеа дека укажува на политичко мешање. Двајца членови поднесоа оставки од Судскиот совет како одговор, а неколку истакнати граѓански организации побараа целосна оставка на Советот“.
Слободата на изразување била поткопана од неефикасноста на правосудниот систем, недостатокот на транспарентност во однос на медиумското рекламирање од страна на државните институции, несоодветното однесување во име на јавните службеници во нивната интеракција со новинарите, притисокот врз новинарите кои истражуваат корупција, дезинформациите, говорот на омраза во онлајн и социјалните медиуми, и самоцензура.
Македонија
Одрони на неколку патни правци
ЦУК извести дека преку единствениот број за Итни повици Е-112 добиена е дојава за одрон на патот кај Калиманци, на регионалниот пат Македонска Каменица-Виница, 5 километри пред влезот на Македонска Каменица.
За настанатата состојба известени се ЈП за оддржување на регионалните и магистралните патни правец и екипите се излезени на терен за да го саниррат одронот, додаваат од ЦУК.
Исто така добиена е дојава за одрон на патен правец село Удово-Демир Капија.
„Точната локација е 2-3 километри после село Удово во правец спрема Демир Капија. За настанатата состојба известени се ЈП за оддржување на регионалните и магистралните патни правец и екипите се излезени на терен за да го санираат одронот“, соопшти ЦУК.