Македонија
Народниот правобранител: Затворениците спијат меѓу бубашваби и лебарки
Затворениците во речиси сите затвори во Македонија се жртви на нехуман и деградирачки третман. Ова е заклучокот на народниот правобранител.
Во затворот „Идризово“ затвореници спијат меѓу бубашваби и лебарки, на под. Во истражниот затвор „Скопје“ има посериозен проблем, а тоа е немањето вода во сите простории, кој останува нерешен од 2013 година кога објектот е отворен. Затворската полиција не успева да превенира ниту тепачки. Народниот правобранител добил информации дека службеници се вклучени во коруптивни дејства, како и дека затвореници плаќаат за да бидат префрлени во институции со подобри услови.
„Веќе со години состојбата во КП ‘Идризово’ е повеќе од загрижувачка и под сите минимални стандарди. Во оваа установа се наоѓа речиси половина од популацијата што издржува казна затвор, со што овој проблем уште повеќе е сериозен. При увидот во оваа установа увидовме дека се сместуваат и по 16 лица во една просторија. Во 16 квадратни метри, со 8 кревети, имаше 16 осудени лица. Во друга просторија, од 19 квадрати, имаше 12 лица. Во голем дел од просториите условите се неадекватни, а се сместуваат повеќе од 9 лица. Поради несоодветните материјални услови, не се врши сместување во 2., 5. и во 8. крило. Условите не се подобри ниту во просториите што се користат. Просториите во кои се сместени лицата од отвореното одделение и т.н. амбулантско одделение може да се опишат како нехумани и деградирачки. Осудените лица сместени во овој оддел беа затекнати како спијат на подот, на сунѓери, во ходници, во импровизирани кревети, ставени еден врз друг на три ката. Хигиената e на ниско ниво, а просториите се полни со инсекти, како лебарки, бубашваби, тафтабити и слично. Осудените лица се жалат дека немаат пристап ниту до топла вода. Лошите материјални услови и недостигот на активности директно влијаат врз тензичната атмосфера, која ја има меѓу осудените лица“, рече народниот правобранител, Насер Зибери.
Посебен проблем се несоодветното однесување и деградирачкиот третман од вработените кон затворениците. Во три казнено-поправни установи народниот правобранител добил информации дека затворениците биле заплашувани со физичко малтретирање.
„Во затворот ‘Скопје’ се користат простории кои се лоши, а за кои Националниот превентивен механизам и минатата година укажа дека треба да бидат затворени и да не се користат. Притворениците се сместени во простории со мувла на ѕидовите, каде што има стар инвентар, ниско ниво на хигиена, со расипани чешми. Притворениците се жалат на пристапот до вода, кој не е решен, и тие складираат вода во пластични шишиња“, додава Зибери.
Само во затворот во Тетово инфраструктурата е подобрена. Но, и тука има проблем, а тоа е изведувањето на воспитно-образовниот процес. Народниот правобранител додава: „Дури 58 отсто од децата во поправниот дом се на психијатриска дијагноза, проблемот е дотолку поголем што децата се прегледуваат од установи надвор од домот, во присуство на затворска полиција, што го ограничува чувството на доверба на овие штитеници со психијатар“.
„Во другите казнено-поправни установи увидено е дека се преземени активности за подобрување на инфраструктурата. Но, за жал, поради невнимателно нивно користење во затворот во Струмица и КП домот во Штип, просториите се руинирани. Како посебен проблем се појавува и прашањето на условите во кои се сместени лицата, како и здравствената заштита, процесот на ресоцијализација и воспитниот процес кај малолетните лица. Прекубројноста особено е изразена во КП „Идризово“, во Штип, во Прилеп, во затворот „Скопје“, во Битола и во Прилеп“, констатира народниот правобранител.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Штипјанец и скопјанец фатени како ги фотографираат гласачките ливчиња, а жител на Бучим му го покажал ливчето на набљудувач
Од отворањето на гласачките места досега имаме регистрирано две фотографирања на гласачко ливче, едно во Скопје, а едно во Штип. Покрај тоа, во Бучим, Радовишко, има едно лице што го покажало гласачкото ливче на набљудувач, изјави портпаролот на МВР, Тони Ангеловски.
Тој додаде дека досега МВР нема регистрирано посериозни нарушувања на јавниот ред и мир при гласањето, односно гласањето се одвива мирно и без проблеми.
Ангеловски дополни и дека димна бомба има на гласачко место, а пријавени се и летоци врз паркирани автомобили во Чаир и графити.
До 11 часот е пријавено дека на гласање излегле 229.473 граѓани и одѕивот од 3,85, колку што беше до 9 часот, се искачи на 12,78 отсто.
Македонија
Димна бомба на гласачко место, летоци врз паркирани автомобили во Чаир и графити пријавени во МВР
Портпаролот на МВР, Тони Ангеловски, информира за текот на изборниот процес од отворањето на избирачките места.
„Досега МВР нема регистрирано посериозни нарушувања на јавниот ред и мир при гласањето, тоа се одвива мирно, без проблеми. Од отворањето на гласачките места досега имаме регистрирано две фотографирања на гласачко ливче, едно во Скопје, а едно во Штип. Покрај тоа, во Бучим, Радовишко, има едно лице што го покажало гласачкото ливче на набљудувач.
За сите овие настани, како што вели тој, се преземаат мерки за расчистување на случаите.
„Покрај тоа, на територијата на општина Чаир се забележани летоци, кои биле оставени на паркирани возила, а исто така се испишани и два графита. На едно гласачко место во Скопје, покрај испишаниот графит, од страна на претседател на избирачки одбор е пријавено дека во 6.30 часот во ходникот е пронајдена димна бомба. Веднаш се преземени мерки и активности и на ова место гласањето се одвива непречено“, додава Ангеловски.
Апелира до граѓаните и учесниците на изборите – во текот на гласањето, до завршувањето, да се воздржат од какви било инциденти.
Македонија
На 12,78 отсто се искачи одѕивот до 11 часот, најголем во Демир Капија – 23,99 отсто
До 11 часот на гласање излегле 229.473 граѓани и одѕивот од 3,85, колку што беше до девет часот, се искачи на 12,78 отсто.
Најголем е одѕивот во Демир Капија – 23,99 отсто, каде што од вкупно 3.208 граѓани до 11 часот гласале 769.
На седмите претседателски избори во земјата право на глас имаат 1.814.317 граѓани на 3.480 избирачки места.