Македонија
Завршен ден на билатералната вежба со војската на Црна Гора во артилериско гаѓање на полигонот „Криволак“
Началникот на Генералштабот на Армијата на Република Северна Македонија, генерал-потполковник Васко Ѓурчиновски, и заменик-министерот на одбрана, Башким Хасани, заедно со началникот на Генералштабот на Војската на Црна Гора (ВЦГ), бригаден генерал Милутин Ѓуровиќ, денес присуствуваа на завршниот ден на билатералната вежба со бојно гаѓање, која се реализира на армискиот полигон „Криволак“.
Генералите Ѓурчиновски и Ѓуровиќ по завршување на вежбата беа задоволни од прикажаното и од интероперабилноста на постапките, согласно стандардите на НАТО, кое ја отсликува соработката помеѓу Армиите на Република Северна Македонија и Црна Гора.
Генералот Ѓурчиновски во своето обраќање пред учесниците им изрази признание на учесниците за постигнатите резултати, високото ниво на обученост и меѓусебната координираност кои се одлична можност за понатамошно интензивирање на ваков вид заедничка обука која се организира и реализира за краток временски период.
Началникот на Генералштабот на ВЦГ, генерал Ѓуровиќ, заблагодарувајќи се за севкупната помош и поддршка, која овозможи реализација на активноста истакна дека вежбата е уште една потврда дека можеме заеднички да продолжиме и да ги збогатуваме формите на воена соработка.
Заменик-министерот Башким Хасани во своето обраќање порача дека оваа заедничка вежба е уште една потврда за одличната меѓусебна соработка, а служи и како патоказ за реализација на уште поголеми и посложени вежби и обука.
„Само со заедничка обука и вежби, ќе обезбедиме ефикасно и заедничко учество на обучени, професионални војници и офицери во операции за успешно справување со комплексни предизвици“, рече заменик-министерот.
Хасани истакна дека полигонот „Криволак“ нуди големи можности и капацитети и претставува место каде што се развиваат знаењата и вештините на нашите питомци, идни командири и команданти.
Воедно на крајот од вежбата на питомците од четврта година, меѓу кои има и питомци од Црна Гора, им беа врачени сертификати за успешно завршен курс за командири на водови.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Пендаровски: Ја вративме слободата, изградивме еднакво општество, имаме силна поддршка од најмоќните демократски држави
Кандидатот за претседател, Стево Пендаровски вчерашниот ден од изборната кампања го заокружи со граѓански митинг во Гостивар.
Пред присутните Пендаровски потсети на резултатите постигнати во изминатите пет години како враќањето на слободата и демократијата, градењето модерно општество на еднакви граѓани и напредокот во евроинтегративниот процес.
Пендаровски посочи дека по членството во НАТО, се случи напредок и во процесот на интеграција кон ЕУ, кој сега е блокиран поради блокадите на ВМРО-ДПМНЕ и нивниот однос кон меѓународните договори што ја гарантираат евроатлантската интеграција на државата.
„Што нуди ВМРО-ДПМНЕ во однос на договорите што нѐ вратија во нормалниот цивилизиран свет? Нудат поништување. Кога ќе ги прашате што после тоа поништување, велат повторно ќе почнеме да преговараме. Имаат ли гаранции дека некој од надвор од големите сили ве поддржува за тоа повторно да го преговарате и да го доведете до исход кој е добар за народот и државата? Немаат. Немаат еден докажан пријател, партнер од големите сили, како што имавме ние. Сите овие договори што ги споменувам и со Грција и со Бугарија и со Европа се направени со огромна поддршка и помош од Америка, од Германија, Франција, од големите меѓународни сили. Тие немаат ниту еден и затоа кога доаѓаат пред вас ви кажуваат дајте ни власт па од 9 мај ќе ви кажеме кои се нашите планови. Тоа е крајно несериозно“ порача Пендаровски.
Затоа, додаде тој, уште на 24 април потребна е масовна мобилизација и заокружување на бројот еден со што напредокот на државата ќе продолжи.
Пендаровски во своето обраќање пред граѓаните порача и дека е крајно време за да се испита потеклото на имот на сите судии и обвинители, но и на политичарите, почнувајќи од него, а оние за кои ќе се утврди дека за време на нивниот мандат несразмерно го зголемиле својот имот прво да ги вратат парите а потоа и да се соочат со затворски казни.
Македонија
СДСМ: Мицкоски и ДПМНЕ немаат план ниту визија, со нив нема членство во ЕУ
„Мицкоски и ДПМНЕ немаат план, ниту визија за иднината, кристално е јасно дека со нив нема членство во ЕУ.
Мицкоски и ДПМНЕ како иднина, на граѓаните им нудат враќање во минатото, во изолација, режим, неизвесност.
Граѓаните сакаат напред, сакаат членство во ЕУ, повисок животен стандард, поголеми плати и пензии, сакаат да живеат во европска Македонија.
Затоа, на изборите ќе го дадат својот глас за европска иднина со СДСМ и Димитар Ковачевски“.
Соопштение на СДСМ
Македонија
ВМРО-ДПМНЕ: Овие избори се последна шанса за Македонија
„СДС ја фрли Македонија во хаос. Институциите се парализирани, апатија и разочараност ги тиштат граѓаните.
Корупцијата е распространета во секоја пора на општеството. Во Македонија со СДС услугите кои треба да ги пружи државата на граѓанинот станаа мисловна именка. Лотариска среќа е ако може некој да извади пасош и лични документи, пациентите не се сигурни каква терапија добиваат, се заработува бескрупулозно на грбот на најранливите, непотизам насекаде, правда никаде, не само младите туку и сѐ повозрасни размислуваат да ја напуштат земјата не гледајќи веќе ниту систем, ниту ред, СДСМ е сведена на измеќар и соучесник во сите скандали, се срамиме од нивните недостоинствени настапи низ светот, иднината и подобриот живот се далечен.
На врвот на листите на корупција, мизерија и немаштија сме. За 7 години колку што се на власт СДС и ДУИ ја презадолжија државата, го урнисаа системот и криминалот го направија столб на своето функционирање.
Ова не е Македонија што народот ја сака и ја заслужува. Овие избори се последна шанса за спас. Шанса во која може да се верува, избор во кој мора сите граѓани да учевствуваат. Македонија е едноставно одземена. Но, промените се можни и се на дофат.
Промените се во твои раце! Македонија повторно ќе биде твоја!“.
Соопштение на ВМРО-ДПМНЕ