Македонија
Нема договор меѓу партиите за формирање влада, се чека Хан
Пред утрешната посета на еврокомесарот Јоханес Хан, кој треба да се сретне со претставниците на парламентарните политички партии, во среда се очекува засилување барем на внатрепартиските консултации за евентуално формирање влада.
Реториката од партијата чиј лидер Никола Груевски го доби мандатот за формирање влада и во тоа не успеа во законски предвидениот рок, откако доскорешниот коалициски партнер од албанскиот блок партии ДУИ, не се договори за продолжување на соработката, деновиве се заостри.
По средбата на највисокото раководство на ВМРО-ДПМНЕ со амбасадорката на ОБСЕ, Нина Соумалаинен, на чело со лидерот Никола Груевски, во соопштението имаше заканувачки пораки во случај владата да биде формирана од партии кои не победиле на изборите, односно без ВМРО-ДПМНЕ.
„Секоја партија која носи одлука за формирање коалиција без партијата која добила најмногу гласови и најголема поддршка од народот на изборите, треба да знае дека во исто време носи одлука да се соочува со проблеми во иднина својствени на ситуации кога се игнорира волјата на мнозинството граѓани“, соопшти ВМРО-ДПМНЕ.
Во соопштението се наведува и дека принципот за коалицирање победник со победник не смее да биде прекршен. Груевски упати и порака до довчерашниот коалициски партнер, Али Ахмети.
„Доколку сега се отстапи од тој принцип, и свесно се прекрши, секој еден кој во иднина кога ќе се сменат околностите, ќе помисли да дојде и повторно да се обиде да не убедува да го воспоставуваме тој принцип, треба да знае дека без дискусија ќе биде избркан од штабот на партијата, а партијата ќе коалицира со кого ќе оцени дека е најдобро за самата партија и земјата, како што е и во другите држави“, велат од ВМРО- ДПМНЕ.
Претседателите на СДСМ и на ДУИ, Зоран Заев и Али Ахмети во партиските седишта на Бихаќчка и во Мала Речица имаат внатрепариски консултации по состанокот на двете партиски делегации, пред два дена, на која немало конкретни дискусии по специфични политички прашања и за евентуална поделба на ресори.
Иако, протекоа информации дека од СДСМ имало конкретен предлог, прво да се договори парламентарно мнозинство и да се соберат 61 потпис за да се добие мандатот од претседателот Ѓорѓе Иванов, а потоа да се премине на разговори за идната Влада.
Потпретседателката на ДУИ, Теута Арифи по средбата со претставниците на СДСМ рече дека на маса ги доставиле нивните барања. Не сакаше да каже ништо повеќе во врска со средбата единствено кажа дека имале конструктивни разговори и дека сепак последниот збор го има претседателството.
Шефот на кабинетот на Али Ахмети, Артан Груби, пак, изјави дека ако СДСМ ја прифаќа заедничката платформа на албанските партии, во која е и официјализирање на албанскиот јазик, ќе нема друга пречка за формирање коалиција.
„Не гледам причина зошто да не прифатат (СДСМ –з.р). Верувам дека тоа ќе го сторат и не гледам причина зошто ниту еден Македонец да не ја прифаќа оваа платформа која помага за социјална кохезија, за граѓанска еднаквост и е добра за Република Македонија. Преговорите ќе завршат брзо, доколку се прифати овој конструктивен дух и ако постои подготвеност да се рефлектираат овие потреби“, изјави Артан Груби
Секако, со доаѓањето на еврокомесарот за проширување Јоханес Хан во Скопје, лидерите ќе мора да разговараат за политичката состојба.
Портпаролот на СДСМ, Петре Шилегов, рече дека очекува посетата на еврокомесарот Хан, да ја потврди изборната волја за промени.
„Од посетата на Хан очекуваме да се потврди дека Македонија, по изборите на 11-ти декември, треба да добие политичка влада која ќе ги спроведе неопходните реформи“, вели Шилегов.
Европската унија очекува Влада со широка поддршка во парламентот за да остане земјата на евроатлантскиот пат, порака од Брисел што ја повтори и евроамбасадорот Самуел Жбогар.
„Тоа зависи од партиите во парламентот да решат каква коалиција ќе формираат, ние немаме став за тоа. Она што е во интерес е силна коалиција во поширока смисла, што значи и владата и опозицијата да ја поддржат европската агенда. Во тој контекст гледаме една силна Влада која ќе притиска и ќе работи на ЕУ агендата и ќе направи напредок. Таква агенда ќе и треба широка поддршка, не само од партиите во владината коалиција, туку и од опозицијата“, изјави Жбогар.
Само ВМРО- ДПМНЕ останува на ставот за нови парламентарни избори, што би значело нови трошоци, а за да се избегне двоен трошок , тие би можеле да се организираат заедно со локалните избори што треба да се случат пролетва./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Таравари од централниот митинг во Струга: Зголемување на минималната плата до 800 евра за борба против имиграцијата
Кандидатот за претседател од редовите на ВЛЕН, Арбен Таравари, ја изрази својата заложба за борба против имиграцијата преку зголемување на минималната плата во нашата земја. Во рамките на идната влада се планира зголемување на платите и до 800 евра, со што ќе се создадат нови можности младите мажи и жени да останат и да придонесат за развојот на државата.
Преку грантови за технологија и иновации, Таравари рече дека владата има за цел да ги поддржи нивните креативни идеи, фокусирајќи се на развојот на земјата како атрактивна алтернатива за младите.
„Иселувањето кај нас е над секоја норма, бројките се алармантни. Не можеме да останеме рамнодушни на оваа ситуација. Така како следна влада на ВЛЕН ќе донесеме одлука за покачување на платите. Ќе се заложиме минималната плата до крајот на нашиот прв владејачки мандат да биде 800 евра. Преку грантови за технологија и иновации, ќе ги поддржиме младите мажи и жени со нивните креативни идеи, кои првенствено служат за нашиот развој како држава. Ова ќе биде дополнителна причина да ја гледаат иднината овде со нас, недалеку од нивните домови, недалеку од нивниот роден град“, рече Арбен Таравари на централниот митинг во Струга.
Македонија
(Видео) Силјановска -Давкова: На 9 мај ќе го славиме Денот на победата над фашизмот и Денот на Европа, но ќе славиме и за Македонија
„На 9-ти мај ќе го прославуваме Денот на победата над фашизмот и Денот на Европа! На 9-ти мај, ќе ја славиме Македонија како твоја и Македонија како горда! Ви ветуваме дека ќе докажеме дека нема да ве срамиме, дека нема да ги заборавиме државните и нациолнални интереси, кои тие не само што ги заборавија, туку и ги погазија! Молам за доверба!“, рече Горданa Силјановска -Давкова, кандидат за претседател на Македонија.
„Верувајте ми, има моменти во историјата! А таков е овој, кога мора да сме заедно! Кога како никогаш досега, потребна ни е вашата поддршка! Без вас не може да направиме единство! Без вас Македонија не може да биде ниту твоја, ниту горда! Без вас не може да дојдеме до победа! Вие го имате првиот и последниот збор! Ви веруваме!
Денес е Денот на светското културно наследство. Охрид е незаменлив и ценет, драгоцен дел од него. Охрид е споменик и дом на европското христијанство! Да го чуваме! Не заборавајте: Без Охрид, Македонија нема да биде почитувана!
Час поскоро, активирајте го универизтетот на Плаошник! Оваа власт не знае што е култура, за неа културата е бизнис. Ако започна изградбата во времето на ВМРО-ДПМНЕ, мора да доврши.
Во насока на јакнење на културниот туризам ќе покренам организирање на меѓународен форум – Плаошник форум, на кој ќе се дискутира соработката на цивилизациите, религиите и културите. Сето ова во соработка со УНЕСКО и Министерството за култура! Упатувам порака дека: Плаошник може да биде центар на дијалог на цивилизациите! Дијалог на религиите! Центар на културен дијалог! Затоа сум горда на него!“, додаде Горданa Силјановска -Давкова.
Македонија
Мицкоски: Повикувам на обезбедување на македонско национално единство, обзнанувам мораториум и запирање на сите напади кон партиите Левица и ЗНАМ
Нашето име е ВМРО-ДПМНЕ, ВМРО – демократска партија за македонско национално единство. Тоа е многу силно име, кое не само заради историското ВМРО и континуитетот на кој се повикуваме како идеја и организација која ја славиме и која е нераскинлив дел од македонското национално движење и можеби најзначајна за македонскиот национален идентитет, туку истовремено и поради обврската и одговорноста која и вториот дел од името ја носи со себе, рече претседателот на ВМРО-ДПМНЕ, Христијан Мицкоски од големиот народен митинг во Охрид, од каде што традиционално ВМРО-ДПМНЕ ја почнува кампањата за парламентарните избори.
Мицкоски посочи дека долго време таа обврска и одговорност како да се одбегнуваше, а понекогаш и се занемаруваше и никогаш како сега не било важно како сега да се случи обединување, да се обезбеди национално единство.
„Мојата прва иницијатива за обезбедување на македонско национално единство ќе ја започнам со тоа што сакам да обзнанам мораториум во нападите кон партиите Левица и ЗНАМ. Ова го чувствувам како потреба на македонскиот народ но, и како моја обврска да се обидам да ја реализирам идејата за национално единство во моменти кога таа и е најпотребна на Македонија“, рече Мицкоски.
Додаде дека со Левица и ЗНАМ, ВМРО-ДПМНЕ има свои разлики по повеќе прашања и од идеолошка но и од принципиелна природа, но смета дека во моментов, најважно за Македонија е да се фокусираат на оние кои што ја киднапираа државата од граѓаните.
„Но, ценам дека во моментов најклучно за иднината на земјата е да се фокусираме на оние кои ја киднапираа Македонија од рацете на граѓаните. Разидувањата сигурно ќе продолжат, но мора да наоѓаме заеднички јазик без разлика на лични и партиски суети и интереси. Од нив не очекувам да го направат истото. Дури можеби и ќе ме нападнат за овој гест, можеби некои оправдано ќе кажат дека задоцнет, но и покрај тоа, како и да се однесуваат споменатите партии, ние како партија ќе опстоиме на нашиот збор“, порача Мицкоски.