Македонија
Николовски: Со платформата за интероперабилност не може да се чуваат и кријат предмети во фиоки
Реализацијата на мерките од планот за борба против корупцијата е во напредна фаза, веќе се работи на нови системски мерки, кои ќе бидат имплементирани во новиот план за борба против корупцијата, порача на денешниот брифинг со новинарите заменикот на претседателот на Владата задолжен за борба против корупцијата и криминалот, одржлив развој и човечки ресурси, Љупчо Николовски.
Вицепремиерот Николовски посочи дека интензивно се работи на измени и дополнувања на потребните закони за дигитализација на процесите за од 1 јули 2022 години овој процес да биде комплетиран и да се применува. Користењето на платформата за интероперабилност значи дека институциите ќе ги разменуваат сите информации и документи по електронски пат.
„Тоа значи дека не може да се чуваат и кријат предмети во фиоки на институциите што имаат истражни дејства, нема да чекаат со месеци за одредени дописи од друга институција сѐ со цел да се забрзаат постапките. Првите шест закони од МВР, а кои се клучни оти таму се законите за лични карти, живеалишта и други, се веќе во собраниска процедура, а уште 129 закони Владата ги разгледа, тие се изготвени и ќе го поминат владиниот филтер и на тоа се надополнуваат законите во делот на правосудството. Со тоа ќе имаме над 250 закони што ќе стапат во сила на 1 јули 2022, со што веќе го имаме правниот дел закоружен. Се надевам дека сите политички фактори ќе дадат максимална поддршка и нема да има кочници за овој најсериозен процес преку кој граѓаните ќе може електронски, дигитално, да ги добиваат услугите и сите сервиси“, рече вицепремиерот Николовски.
На брифингот вицепремиерот Николовски потенцира дека веќе се ставени во функција системот за е-инспектор, како и системот за поднесување претставки за непостапувања по предмети. Подготвена е нацрт-верзијата на предлог-законот за потекло на имот и донесена е стратегија за зајакнување на капацитетите на институциите за водење финансиски истраги и конфискација на имот. Воедно, во согласност со планот за борба против корупцијата се намалува бројот на членови на управни и надзорни одбори во јавни претпријатија и јавни установи, се зајакнуваат капацитетите на јавните обвинителства, се ставаат во функција истражните центри, во функција е одлуката за ограничување угостителски услуги за работни состаноци на функционерите и за ограничување користење на службените возила, а институциите назначуваат лица за внатрешно пријавување, објавуваат антикорупциски програми, интерни процедури за јавни набавки.
Воедно, Николовски потенцира дека се работи и на нови системски мерки, кои ќе бидат дел од новиот план за борба против корупцијата, како што е регистарот на цени на стоки и услуги.
Во напредна фаза е подготовката на модулите за спецификација на стоки и услуги за техничките документации, очекувам кон средината на месецот да бидат усвоени техничките спецификации, кои ќе бидат унифицирани за сите институции. Една од клучните мерки е подготовката на регистар на цени на стоки и услуги, кој ќе биде воспоставен во првата половина на 2022 година. Заедно со модулите на техничките спецификации и регистарот на цени на стоки и услуги ќе биде сериозно ограничување на можостите за корупција при јавните набавки. Тие претставуваат една сериозна контрола, отвореност, транспарентност и институциите ќе мораат да ги користат овие цени што ќе ги има во самиот регистар и кои постојано ќе се обновуваат“, рече вицепремирот Николовски.
Како дел од новите мерки, вицепремиерот Николовски го посочи воведувањето аудио и видеонадзор за начинот на преземање на службените дејства од страна на царинските службеници, даночните инспектори и даночните контролори, како и проектот Mystery shopper, кој практично значи теренска проверка на институции за утврдување на неажурно, неефикасно и потенцијално коруптивно однесување.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Бојмацалиев: Една година ФРОНТЕКС – прв договор потпишан на македонски јазик со ЕУ
Дополнителниот заменик-министер за внатрешни работи, Митко Бојмацалиев, заедно со директорот на Бирото за јавна безбедност, Сашо Тасевски, и државната секретарка, Магдалена Несторовска, оствари работна средба со раководството на Регионалниот центар за гранични работи „Југ“ по повод одбележувањето една година од почетокот на мисијата на ФРОНТЕКС во Република Северна Македонија, а со цел промоција на соработката помеѓу претставниците на ФРОНТЕКС во локалниот координативен центар и одговорните старешини од РЦ за ГР ЈУГ, како и промовирање на европскиот пристап на координирање на сите заеднички активности и справување со предизвиците.
„Одбележуваме една година од работата на макеоднската полиција заедно со ФРОНТЕКС, со цел да ги одбраниме нашите и границите на ЕУ од прилив на мигранти. Тоа успешно го правиме од 2015 до денеска. Договорот е од историска важност, тогашниот министер Оливер Спасовски ја имаше честа да го потпише со Европската Унија и ја отвори вратата за поинтензивна оперативна соработка заснована на доверба и меѓусебно почитување“, истана Бојмацалиев во изјава за медиумите заблагодарувајќи се до Тасевски и Несторовска за напорите што ги направија договорот да биде на македонски јазик и успешно да функционира во нашата држава.
„Со тоа уште еднаш покажуваме дека македонската полиција е рамо до рамо со европските полиции, заедно работиме и од неодамна имаме барање од други полиции да вршиме обуки на нивните службеници како се справуваме со миграцијата. Од земја што бараше помош од другите држави за справување со миграцијата, сега нудиме помош“, рече Бојмацалиев.
Македонија
Ковачки ги повика неопределените да гласаат: „ Да се обединиме за идејата ‘Македонија повторно твоја’“
Народот е подготвен и обединет за промени, приклучете се кон ВМРО-ДПМНЕ за да ја поразиме оваа ненародна и криминална влада на СДС и ДУИ, порача Драган Ковачки, член на ИК на ВМРО-ДПМНЕ и носител на изборна единица 3.
„Денеска сме во Кратово, Ранковце и Крива Паланка. Тука сме да презентираме проекти од Платформата 1198, ќе поразговараме со сите граѓани. Ги повикувам сите граѓани кои сеуште не се определиле и кои што ја чувствуваат позитивната енергија која што доаѓа од ВМРО-ДПМНЕ, да се обединиме околу идејата за Македонија повторно твоја, да се обединиме околу проблемите“, рече Ковачки.
Како што додаде вчерашниот митинг во Охрид покажал дека народот е подготвен и обединет за промени, а ВМРО-ДПМНЕ е партија за македонско национално единство.
Македонија
Успешна сложена дентална операција – изведена транспозиција на нерв
Вчера, успешно заврши сложениот хируршки зафат – транспозиција на нерв на пациент од земјата.
Оваа комплексна техника ја изведе искусен хируршки тим под водство на професор Мазен Тамими од САД, роден во Јордан.
Интервенцијата се изведе во присуство и во приватната специјалистичка ординација на реномираниот орален хирург и имплантолог од овие простори – Дијана Бојковска. Пациентот е во стабилна состојба, се чувствува добро, но претстои период на целосно заздравување по извршување на операцијата поради прилично атрофираната долна вилица.
Видеоприказ од интервенцијата ќе биде емитуван во рамките на меѓународниот имплантолошки конгрес, кој почнува денес во хотелот „Хилтон“ во Скопје, а ќе трае до 20 април. Напредната хируршка техника првпат ќе биде споделена со пошироката стручна јавност од земјата, но и од светот, бидејќи на конгресот ќе учествуваат врвни стоматолози, орални и максилофацијални хирурзи од четири континенти.
Дигитализација во стоматологијата и новите трендови во имплантологијата се дел од темите што ќе бидат во центарот на вниманието на овој конгрес. Конгресот предвидува теоретски, практичен дел и презентирање напредна хируршка техника во делот на имплантологијата.
Еминентни стоматолози специјалисти од Македонија исто така ќе земат активно учество на конгресот: д-р Митко Франгов, орален хирург и меѓународно лиценциран имплантолог, д-р Златко Вршковски, максилофацијален хирург и меѓународно лиценциран имплантолог, д-р Недим Касами, максилофацијален хирург и имплантолог, д-р Петар Вршковски, орален хирург и имплантолог, д-р Дијана Бојковска, орален хирург и имплантолог.
Во Македонија првпат стоматолозите учесници на конгресот ќе бидат дел од меѓународно акредитирана имплантолошка едукација и ќе добијат CME – европски кредит-поени.