Македонија
Ниеден суд во Македонија нема ознаки со Брајово писмо
Пет од десет суда во Македонија немаат лифтови што би можеле да ги користат лицата со попреченост, а во три од судовите лифтовите не се функционални за користење, покажа истражувањето на коалицијата „Сите за правично судење“.
Првичните резултати од истражувањето на граѓанската организација покажаа дека сите лица со попреченост се соочуваат со тешкотии во поглед на пристапноста до судот и до правдата, со што им е ограничено правото на фер и правично судење под еднакви услови како за сите во согласност со законите и меѓународните прописи.
Податоците се добиени од 16 набљудувачи, кои моментно спроведуваат мониторинг на граѓански судски постапки од аспект на правниот, финансискиот и физичкиот пристап до правда во 10 oсновни суда.
Сите десет суда, кои биле предмет на ова истражување, се наоѓаат во објекти во кои може да пристапат лица што се движат со помош на количка. Пет од судовите (Струга, Охрид, Скопје 2, Прилеп и Струмица) се сместени во објекти каде што нема потреба од пристапни рампи (влезот во нив е на едно ниво), а другите пет суда (Велес, Битола, Гостивар, Тетово и Штип) имаат изградено пристапни рампи за влез во објектите.
Иако зградите на судовите се пристапни од надвор, три од судовите – ОС Скопје 2, ОС Струга и ОС Струмица – немаат судници на приземјето, а во два – ОС Гостивар и ОС Охрид – на приземјето има само една судница, која се користи само за конкретна намена – судења на прекршоци.
Само судовите во Струга и Битола имаат лифтови за пристап до катовите на објектот, а три од судовите – ОС Скопје 2, ОС Гостивар и ОС Охрид – иако имаат лифтови, тие не се функционални.
Ниту еден од судовите нема ознаки на Брајово писмо ниту, пак, тактилни ленти за слободно и самостојно движење и навигација на лица со оштетен вид низ судовите. Поради тоа, иако објектите на судовите се пристапни од надвор, речиси половината од судовите, предмет на ова истражување, немаат соодветен пристап до своите простории и услуги за лица што се движат со помош на инвалидска количка ниту, пак, имаат соодветни услови за движење низ самите објекти.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
„Мицкоски на чист бугарски јазик му кажа на Борисов дека го поддржува договорот“, рече Пендаровски во Виница
Како дел од изборната кампања, кандидатот за претседател Стево Пендаровски попладнево беше меѓу граѓаните на општина Виница.
На прашање на граѓанин за односите со соседите, Пендаровски потсети дека иако денес се противи, Христијан Мицкоски пред извесно време на тогашниот бугарски премиер му кажа дека го поддржува Договорот за добрососедство.
„Тој веројатно заборава дека интернетот не заборава. Тој може да не лаже дека не го кажал тоа, меѓутоа тој на чист бугарски јазик му вели ште поткрепиме тој договор, ако јас лажам, повелете на интернет, проверете. Кога Мицкоски вели дека само како Бугари можеме да влеземе во ЕУ, не сака да каже една друга негова изјава, негов став и став на неговата политичка партија, дека тие се наследници на Ванчо Михајлов. Значи вели, шефот на историското ВМРО од тоа време и денешниот претседател на ВМРО-ДПМНЕ се во континуитет, значи тој се смета себеси за наследник на Ванчо Михајлов. А сите вие знаете дека Михајлов целиот свој живот се декларирал како Бугарин“, порача Пендаровски.
Пендаровски пред присутните порача дека добро е Македонија што побрзо да стане земја-членка на ЕУ, затоа што тоа ќе донесе повеќе пари за земјоделството, за инфраструктурни проекти, за европски стандарди со што ќе се стави крај на иселувањето на младите.
Кандидатот за претседател Пендаровски, ги повика граѓаните на 24 април и на 8 мај да го заокружат бројот еден, за да продолжи напредокот кон ЕУ.
Македонија
Филипче: Нашата понуда е јасна и искрена, понудата на ВМРО-ДПМНЕ е дестабилизација и застој
Контактот со граѓаните и грижата за нивните проблеми нема да заврши на денот кога ќе завршат изборите. И затоа, ветувам дека како претставник на граѓаните во идното Собрание на Македонија, ќе останам достапен за вас, за вашите грижи, маки, но и идеи и предлози.
Ова го истакна Д-р Венко Филипче, носител на листата на кандидати за пратеници на СДСМ и Коалицијата за европска иднина за Изборната единица 4. Филипче изборното претставување го започна од Демир Капија каде што имаше обраќање на граѓански митинг.
„Политиката носи одговорност. Одговорност за она што ќе се случува со нашата земја во иднина. Одговорност за тоа како ќе живеат граѓаните во неа. Одговорност за создавањето услови за мирен и спокоен живот, ослободен од грижи и сиромаштија. И јас ја прифаќам таа одговорност“, рече Филипче.
Одговорност носи и СДСМ која во изминатите седум години мандат се соочи со повеќе кризи: економска, здравствена, енергетска. Но, кризите не се изговор за грешките што беа направени, рече Филипче, додавајќи дека како одговорна партија СДСМ учи од грешките.
„Го вложивме секој денар за да ги поддржиме семејствата и компаниите во економската криза. Го вложивме секој атом енергија да ги лечиме и спасуваме луѓето во Ковид кризата. Ги донесовме сите мерки да ги намалиме трошоците на родителите да имаат повеќе за своите деца. Ние со дигната глава можеме да кажеме дека СДСМ водеше исправни политики во интерес на сите граѓани во услови на светска дестабилизација. Тоа е дефиниција за лидерство и патриотизам“, изјави Филипче.
Наспроти државничката улога на СДСМ, стои ВМРО-ДПМНЕ чија улога е да го блокира општеството и државата.
„Пред нас се избори на кои граѓаните бираат помеѓу два многу различни концепти. Едниот е нашиот, кој гарантира зачувување на мирот, стабилноста и интегрирање на Македонија во Европа. Нашата порака е јасна и искрена. СДСМ го нуди патот на развојот и сигурноста. Од друга страна е концептот на ВМРО-ДПМНЕ кој се заснова на дестабилизација, застој, блокади и доведување во прашање на се она што е постигнато. Нивната понуда е неискрена, нејасна и опасна за иднината на земјата“, рече Филипче.
Ваквата политика на ВМРО-ДПМНЕ е резултат на нивната стратегија чија цел не е напредокот, туку назадувањето, не е мирот, туку конфликтот. Не е градењето пријателства, туку создавање внатрешни и надворешни непријатели, амбиент кој го создава ВМРО-ДПМНЕ, истакна Филипче.
„Тоа е амбиентот кој ќе биде секојдневие ако победат на изборите. Со ВМРО-ДПМНЕ нема напредок, затоа што едноставно напредокот не им одговара. Затоа што тие не би знаеле да се снајдат во таква ситуација. ВМРО-ДПМНЕ знае да води политика само ако Македонија е во калта, долу. Знаат да пливаат во политиката само ако разговараме за поделби, за етнички конфликти, за лажен патриотизам“, рече Филипче.
Затоа, Филипче ги повика граѓаните да бираат мудро на овие избори истакнувајќи дека СДСМ нуди јасна визија за иднината во која Македонија економски расте во Европската Унија и во која оние кои заминаа ќе сакаат да се вратат во држава која ќе нуди еднакви услови како развиените земји.
„Сега е време за размислување со ладна глава, бидејќи одлуките денес имаат големи последици на иднината. СДСМ е партијата која секогаш е на вистинската страна на историјата, која и кога греши не скршнува од вистинскиот пат. Затоа повикувам на масовно обединување кое значи само подобра иднина и сигурен пат напред. А јас, лично ветувам дека во мене секогаш ќе имате партнер и другар а мојата врата ќе биде отворена за сите“, заврши Филипче.
Македонија
„Просечна пензија од 30.000 денари и минимална пензија од 20.000 денари“, најави Ковачевски
За нашите пензионери обезбедуваме просечна пензија од 30.000 денари и минимална пензија од 20.000 денари, порача од предизборниот митинг на СДСМ и Коалицијата за евопска иднина, претседателот на СДСМ, Димитар Ковачевски.
Ковачевски нагласи дека пензиите денескка, во однос на 2016 година се зголемени за 55% и ќе продолжат да растат.
„Јас ветувам дека ќе работам ден и ноќ да ги исполнам очекувањата на мнозинството граѓани да живеат во европска Македонија. Не се откажавме досега, нема да се откажеме ниту отсега. Ние не се откажуваме од иднината“, рече претседателот на СДСМ, Димитар Ковачевски, на предизборниот митинг на СДСМ и Коалицијата за европска иднина во Демир Капија.