Македонија
НСДП: Изборната кампања да биде политички натпревар на идеи и програми
На првиот ден од изборната кампања на предвремените парламентарни избори кои треба доведат до политичка влада со полн легитимитет, НСДП упатува апел до сите учесници во изборниот процес да го спроведат во фер и демократска атмосфера, исполнет со политички натпревар на идеи и програми. Овие избори, како што велат од партијата, ги дочекуваме како држава членка на НАТО и пред отворање на поглавјата со ЕУ, што не обврзува да спроведеме изборен процес кој нема да отстапува од западните демократии.
„ Сите заедно да се обидеме да обезбедиме коректна политичка кампања, да дадеме се од себе за да го покажеме најдоброто, најуспешното, најквалитетното. Да не дозволиме да заборавиме дека партиите треба да се натпреваруваат во идеи и програми, а не во дискредитации и омаловажувања, бидејќи целта ни е иста-подобар живот на македонскиот граѓанин.
Да не бидеме непријатели туку конкуренти во политички натпревар чиј единствен посакуван резултат треба да биде општиот напредок и просперитет. Да се издигнеме над постојаните делби, пакости, меѓусебни деградирање и да се потсетиме дека има смисла борбата за основните човечки вредности-вистина, правда и чесност.
Да постигнеме цивилизациски напредок во демократското созревање на нацијата и во правењето исчекор кон западно европските вредности. Тоа е борба на сите нас, за граѓаните, за Северна Македонија.
Имајќи ја во предвид пандемијата со корона вирусот, НСДП воедно апелира и до сите учесници во изборниот процес, членови или симпатизери на политички партии, до граѓаните, строго да ги почитуваат владините препораки и протоколи за заштита и спречување на ширење на корна вирусот. Да не се дозволи предизборната кампања да прерасне во епидемиолошка критична ситуација која ќе доведе до загрозување на здравјето на граѓаните“ соопшти НСДП.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
В недела посебен сообраќаен режим во Скопје
Министерството за внатрешни работи известува дека на 31.3.2024 (недела), со почеток во 9 часот, поради одржување атлетска трка на 10 км, со траса на движење од долниот паркинг на Средно Водно по регионалниот пат (Р2138) до паркингот на манастирот „Св. Пантелејмон“ и обратно, Единицата за безбедност на патниот сообраќај при СВР Скопје ќе преземе мерки за посебен режим на сообраќај, при што сообраќајот ќе се пренасочува по околните сообраќајници.
Министерството за внатрешни работи апелира до граѓаните да ги почитуваат наредбите што ги издаваат полициските службеници на сообраќајниците на кои ќе се одвива настанот.
Македонија
Левицата: Решението за градба кај болничкиот комплекс Воена болница да се поништи веднаш
„Го повикуваме градоначалникот Стевчо Јакимовски да ги почитува законите и да го поништи Решението за градба на 17-катницата кај Болничкиот комплекс „Воена болница“, истакнуваат од Левица.
Потсетуваат дека политичката партија Левица повеќепати укажа на штетноста од градбата на повеќекатницата на истата локација, паралелно организираше протест на којшто граѓаните јавно го искажаа незадоволството од своеволието на градоначалникот и инвеститорите за противзаконската одлука на истите да почнат со градба на зграда за којашто немаат законска дозвола.
„Од пред неколку дена е правосилно Решението со кое се поништува незаконски позитивното конзерваторско мислење, кое се обидоа да го издејствуваат инвеститорите, а истото, по наши сознанија, е пристигнато во Општината на 21.3.2024 година, по што градоначалникот треба веднаш во законски рок да постапи по истато. За жал, Решението за градба уште не е поништено.
Од општинската администрација не даваат одговори по однос на прашањето по Решението со кое се одбива жалбата на инвеститорите, но успеавме да го добиеме, бидејќи е информација од јавен карактер“, дообјаснуваат од оваа партија.
Го повикуваат градоначалникот Стевчо Јакимовски во пресрет на изборната претседателска кампања да се одважи, како што велат, да ги испочитува законите и да го поништи Решението за градба веднаш, како би докажал пред граѓаните дека, навистина, ги застапува нивните интереси“.
Македонија
Инспектори затекнале диви менувачници на Бит-пазар, но наместо да ги запечатат, им дозволиле да работат
Полицијата поднесе кривична пријава против шест инспектори, вработени во Државниот пазарен инспекторат, и тоа: С. Б. (32), Ј. Р. (54), В. М. (47), Б. С. (46), С. С. (61) и Р. Б. (37), сите од Скопје, поради злоупотреба на службената положба и овластувањето.
Во текот на март и април 2023 година, вршејќи контрола кај три менувачници, лоцирани во близина на Бит-пазар, а за кои било утврдено дека не биле регистрирани како фирми и не поседувале лиценци издадени од НБРМ за вршење менувачко работење, но подолг временски период работеле како менувачници, инспекторите на затекнатите лица во дивите менувачници биле должни да им изречат решение за забрана за вршење дејност, да им ги запечатат објектите, да им ги одземат предметите, опремата и средствата со кои е направен прекршокот, како и да им изречат глоба во износ од 1.000 до 20.000 евра во денарска противвредност.
Но, пријавените пазаришни инспектори ги прекршиле сите одредби од наведениот закон и во три извршени вонредни инспекциски надзори на затекнатите лица во сите три објекти како менувачници ниту им издале решение за забрана за вршење нерегистрирана дејност, ниту им ги запечатиле просториите во кои ја вршеле противзаконската активност, ниту им ги одзеле средствата, предметите и опремата со кои е направен прекршокот ниту, пак, им изрекле глоба во износ од 1.000 до 20.000 евра.
Напротив, во сите три извршени вонредни надзори на сите три менувачници на секој од сопствениците им изрекле еднократна глоба во износ од 80 евра во денарска противредност и ги оставиле и понатаму менувачниците редовно да работат, со што постапиле спротивно на законот за забрана и спречување вршење нерегистрирана дејност и со неизвршување на својата службена должност го сториле кривичното дело злоупотреба на службената положба и овластувањето.