Македонија
Обвинетиот Агим Исмаиловиќ даде контрадикторни изјави за денот на убиството кај Смилковци
Третообвинетиот Агим Исмаиловиќ во случајот „Монструм“ на распитот пред судот даде контрадикторни изјави за критичниот ден кога биле убиени момчињата на Смилсковското Езеро. Исмаиловиќ пред судот рече дека на 12 април 2012 година бил на работа во интернет-кафуле. Подоцна рече дека можеби бил дома и извршувал верски обред.
Обвинителката на СЈО, Фатиме Фетаи, му предочи исказ даден кај истражен судија во кој тој тврдел дека работел на поставување канализација во својот дом. Тој го потврди исказот што го дал пред истражен судија, па обвинителката Фетаи го праша неколкупати да се потсети што точно се случувало критичниот ден и кои од исказите што ги дал за своето алиби се точни.
Обвинетиот рече дека се познавал со другите обвинети. Фетаи инсистира на одговор дали и кога последен пат се слушнал со својот брат Африм, кој е во бегство и за кого е распишана меѓународна потерница. Тој рече дека последен пат со братот се слушнал преку „Вибер“ кога Врховниот суд ги укина пресудите на пониските судови. На прашање на судот каде живее сега брат му, Агим Исмаиловиќ рече дека не знае и посочи да прашаат во косовската полиција.
Тој тврдеше дека полициски инспектори и „алфи“ го малтретирале во полициската станица во Кисела Вода, на што обвинителката постави прашање дали тоа го пријавил во полиција и во болница. Обвинетиот одговори дека колку што се сеќава, во болница не пријавил, а неговиот адвокат Насер Рауфи поднел пријава за постапувањето на полициските службеници. Исмаиловиќ тврдеше дека дента на убиството не се видел со обвинетите Хаки и Фејзи Азири.
Судењето го следат роднини на убиените момчиња и продолжува со распит на обвинетите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Во Куманово не се гласа на три избирачки места, на едното се изгубил печатот
Прекин на гласањето има на три места во Куманово, информираше претседателот на Државната изборна комисија (ДИК), Александар Даштевски.
Како што појасни, на едното бил изгубен печатот. На останатите две, биле направени обиди да се замени уредот за биометриска верификација, пришто гласањето во едниот случај продолжило па прекинало, а во вториот не продолжило.
„Тоа се трите места за коишто имаме добиено писмено известување. Ќе видиме вечер за што точно се работи и ќе одлучиме“, рече Даштевски, одговарајќи на новинарски прашања.
Од ДИК појаснуваат дека се работи за прекин за повеќе од три часа, додека онаму каде што имало помали прекини, гласањето ќе се продолжи за онолку време колку што било прекинато.
На сите останати гласачки места, гласањето тече нормално и мирно, додаваат.
Пред полноќ се очекува да бидат обработени над 50 отсто од гласовите и ДИК да ги објави првичните неофицијани резултати.
Во однос на информациите за починати луѓе на избирачкиот список од ДИК обазложија дека оние коишто ќе починат 30 дена пред гласњето ги има на избирачкиот список, бидејќи тој е веќе заклучен. Велат дека списокот се ажурира неколкупати годишно во координација со Управа за водење на матични книги.
Македонија
Одѕивот до 17 часот изнесува 44,18 отсто – за околу 9 проценти повеќе во споредба со претходните претседателски избори
До 17 часот во првиот круг од претседателските избори, своето право на глас го оствариле 397.612 избирачи, или 44,18 отсто.
Како што соопшти претседателот на Државната изборна комисија (ДИК), Александар Даштевски, засега најголема е излезноста во Новаци, каде гласале 67,19 отсто, а најмала во Пласница – 15,5 отсто.
Засклучокот е дека гласањето се одвива мирно.
Во споредба со првиот круг од претседателските избори во 2019 година, до 17 часот, излезноста е поголема за околу 9 отсто.
Досега до ДИК се доставени 308 приговори, од кои 85 се усвоени, 27 отфрлени како неуредни, а 38 се одбиени. Останатите се во процес на обработка.
Македонија
Петмина си ги фотографирале гласачките ливчиња, полицијата ги фати
Пет лица во периодот од 11 до 14 часот, биле фатени од страна на полицијата оти ги фотографирале своите гласачки ливчиња додека го остварувале своето право на глас, објави МВР.
-Во 11.10 часот е пријавено дека во село Коџалија, општина Радовиш на избирачко место број 1602 С.А. од с.Коџалија го фотографирал гласачкото ливче. Се преземаат мерки за расчистување на случајот, по што ќе биде поднесен соодветен поднесок.
-Околу 12.15 часот е пријавено дека на избирачко место број 2683/1 во Скопје А.С. (40) од Скопје го фотографирал гласачкото ливче. Се преземаат мерки за расчистување на случајот, по што ќе биде поднесен соодветен поднесок.
-Околу 12.15 часот е пријавено дека А.И.(48) од Охрид на избирачко место број 1271 во Охрид го фотографирал гласачкото ливче. А.И. е приведен во полициска станица и по документирање на на случајот ќе биде поднесен соодветен поднесок.
-Во 12.35 часот е пријавено дека на избирачко место бр.0006 во Берово, Д.Т.(42) го фотографирал гласачкото ливче. Д.Т. е приведен во полициска станица и по документирање на на случајот ќе биде поднесен соодветен поднесок.
-Во 13.57 часот е пријавено дека на избирачко место 2555 во Скопје С.С. го фотографирала гласачкото ливче. Се преземаат мерки за расчистување на случајот, по што ќе биде поднесен соодветен поднесок, се наведува во извештајот на МВР.