Македонија
Општина Кисела Вода започнува со изградба на велосипедски патеки
Градоначалникот Орце Ѓорѓиевски денес изврши увид во градежните работи на улицата “Наум Охридски” во Црниче. На потегот помеѓу улицата “Жванска” и улицата “Бихаќка”, се гради велосипедска патека во должина од 600 метри и ширина од 1.20 метри. Поради зголемена безбедност на велосипедистите, патеката е одделена и заштитена со столпчиња.
„ Денес на улицата “Наум Охридски” во населбата Црниче градиме велосипедска патека, како почеток на планираното создавање на велосипедска инфраструктура низ општина Кисела Вода. Се работи за простор во должина од околу 600 метри, предвиден за сите оние кои кои велосипедот го користат во своето секојдневие, за спорт и рекреација или како превозно средство. Велосипедски патеки ќе има и на новата делница од булеварот „Борис Трајковски“ која е во изградба, на потегот од крстосницата во Пинтија до Драчево. Веќе нарачавме проекти и за останатите делови низ општината и етапно ќе се постапува во насока на зголемување на мобилноста на велосипедистите и овозможување безбедност и ефикасност на велосипедскиот сообраќај. Паралелно, разгледуваме можни сообраќајни решенија за изградба на мрежа на велосипедски патеки и на повеќе други локации низ целата општина, со цел да го искористиме целокупниот инфраструктурен потенцијал. Велосипедот е најеколошкото превозно средство, кое воопшто не предизвикува загадување на воздухот, не создава сообраќаен метеж, а воедно е и најевтиното средство за транспорт, што секако е многу важно во периодов на енергетска и финасиска криза во која живееме. Унапредувањето на велосипедскиот сообраќај во Кисела Вода е мое ветување дадено пред граѓаните, дел од младинските барања на кои се обврзав и, како што гледате, активност која веќе активно ја спроведувам на терен-изјави градоначалникот Ѓорѓиевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Ибраимоски и Глигорова: „СТОП за исвршителите, брзите кредити и должничкото ропство“ е еден од главните постулати на програмата „Храбро за Македонија“
Носителот на пратеничката листа на коалицијата „Храбро за Македонија“ во изборната единица пет, Самка Ибраимоски, денеска заедно со активистката и кандидатка за пратеничка Ана Глигорова ја посетија Битола каде се потпишуваше петицијата „СТОП за извршителите и брзите кредити“.
Воедно, Ибраимоски и Глигорова нагласија дека оваа борба за правда, за враќање на извршителите кадешто им е местото и ослободување на народот од должничко ропство е еден од главните приоритети на предизборната програма на коалицијата „Храбро за Македонија“.
– Денеска бевме во Битола, на средба со граѓани. Имавме петиција за „СТОП на извршителите“ и стоп за кеш кредити, успешна петиција. Суштината на нашата кампања во изборна единица пет, ќе биде токму оваа агенда: „СТОП за извршители и СТОП за брзи кредити“. – нагласи Глигорова.
– Ме радува што сите граѓани ја прифатија нашата иницијатива и се потпишаа многу луѓе и тоа е добро, што народот почна поинаку да размислува за разлика од претходно. И очекувам дека и во другите градови, како што се Ресен, Охрид, Струга, Демир Хисар и другите околни места, ќе ни ја дадат поддршката за парламентарните избори, истакна претседателот на ПЦЕР и носител на пратеничката листа, Самка Ибраимоски.
Скопје
Арсовска изврши увид во завршните градежни работи на реконструкција на водоводната мрежа на улицата Антон Попов
Градоначалничката на Град Скопје, Данела Арсовска заедно со претставници од Секторот за планирање и уредување при Град Скопје и скопското јавно претпријатие „Водовод и канализација“ извршија увид во завршните градежни работи на реконструкција на водоводната мрежа на улицата Антон Попов во општината Гази Баба.
Со изведбата на водоводните приклучоци на овој потег кои се поврзуваат со постојната водоводна мрежа со профил од 150 милиметри, се решава повеќедеценискиот проблем на жителите со честите прекини во водоснабдувањето поради застареноста на системот, а се решаваат загубите на вода и трошоци за поправките на дефектите на водоводната мрежа, велат од Град Скопје.
Изведбата на овој проект претставува дел од програмата на градоначалничката Данела Арсовска за обновување на градската мрежа, во децениски заборавените населени места, што претставуваше и долгогодишно барање на жителите од тој дел на градот, се додава во соопштението на Град Скопје.
Скопје
Скопје викендов со изменет режим на сообраќај поради одржување на предизборни митинзи
Поради одржување митинг од изборната кампања за претседателските избори 2024 година на 21 април (недела) во 13.00 часот пред седиштето на Европската унија на ул.„Св. Кирил и Методиј“ во Скопје, Единицата за безбедност на патниот сообраќај при СВР Скопје ќе преземе мерки за посебен режим на сообраќај на оваа улица почнувајќи од 19:00 часот на 20 април (сабота) до 21.00 часот на 21 април (недела), соопштуваат од МВР.
Притоа, за сообраќај ќе биде затворена ул.„Св.Кирил и Методиј“ на потегот од крстосница со булевар „Кочо Рацин“ до крстосница со булевар „Св. Климент Охридски“.
Исто така, на 21 април во 20.00 часот на плоштад „Македонија“ во Скопје ќе се одржи митинг од изборната кампања за претседателските избори 2024 година.
Од тие причини, Единицата за безбедност на патниот сообраќај при СВР Скопје ќе преземе мерки за посебен режим на сообраќај во централното градско подрачје, а сообраќајот времено ќе се запира на сообраќајниците по кои ќе се движат учесниците на настанот.
За таа цел, МВР апелира до граѓаните да ги почитуваат наредбите што ги издаваат полициските службеници по сообраќајниците каде што ќе се одвиваат настаните