Македонија
Османи: Историска вест од Брисел, постигнат е консензус, одлуката ја чекаме на 24 март
Заменик-претседателот на Владата задолжен за европски прашања, Бујар Османи, денес одржа прес-конференција во Владата, на која ги презентира најновите актуелности поврзани со процесот на европски интеграции на земјата, како и за активностите на Владата во остварувањето на соработка со институциите на ЕУ во справувањето со епидемијата од Ковид-19.
„Во исклучително сложени услови под кои функционираат институциите на ЕУ, под силен притисок на предизвиците во соочувањето со Ковид-19, доцна синоќа, телото што го сочинуваат претставниците на земјите членки на ЕУ во Брисел, познато како КОРЕПЕР, го усогласија првиот консензус – заклучокот за почеток на преговорите со Република Северна Македонија“, истакна Османи посочувајќи дека овие заклучоци ќе се најдат на следната седница на Советот за општи работи на ЕУ (ГАК), каде што се очекува овие заклучоци да бидат потврдени.
„Ова е важна вест не само како потврда за нашиот успех туку и важна вест во овие моменти кога и ние се соочуваме со предизвиците од епидемијата предизвикана од вирусот Ковид-19. Покрај заканата за јавното здравје, оваа епидемија претставува и огромен предизвик за одржување и пристојна економска активност и финансиската стабилност на земјата. А како земја кандидат за членство во ЕУ, и еве очигледно набргу како земја преговарач, очекуваме да бидеме дел од пакет-мерките, активностите и протоколите, кои во моментот се подготвуваат од страна на Европската комисија“, истакна Османи претставувајќи дел од мерките за соработка и помош од ЕУ за кои Владата со писмо се обрати до Европската комисија.
Османи во продолжение претстави дел од првичните мерки, кои во име на Владата со писмо до еврокомесарот за проширување, Оливер Вархељи, ѝ ги претстави на Европската комисија:
– вклучување во Европскиот солидарен фонд за природни непогоди, кој по барање на Европската комисија ќе биде проширен и за справување со последиците од Ковид-19, а во кој пристап имаат земјите членки и земјите што преговараат за членство;
– таканаречената награда за успешност (Performance award) во износ од 50 милиони евра, која ни беше доделена поради успешна реализација на ИПА-средствата, да биде пренаменета во поддршка за справување со предизвиците од епидемијата наместо за приоритетите за кои првично беше планирана;
– во согласност со иницијативата на Европската комисија, за финансиска поддршка за ликвидност на претпријатијата погодени од епидемијата, побаравме пристап до овие средства и на Банката за поддршка на развојот на Република Северна Македонија, со што би се обезбедиле брзи краткорочни заеми за поддршка на ликвидноста на нашите мали и средни претпријатија;
– измена и на минималните критериуми за искористување на фондовите од ИПАРД 2-програмата, во кои сметаме на зголемување на делот што претставува учество на ИПА-фондовите, а на сметка на сопствениот капитал на производителите на храна и земјоделците. Само за потсетување, ваквата слична мерка беше применета и за време на кризата со поплавите кога учеството на ИПА-фондовите беше 75 отсто.
Покрај учеството во програмите и мерките на Унијата, Османи пренесе дека ќе побара од Европската комисија земјава да биде исклучена од рестрикциите на единствениот пазар на ЕУ, а кои се однесуваат најмногу на медицински материјали и опрема.
На крајот, Османи информира за одлуката на Норвешка итно да ослободи 3,2 милиони евра за итна реализација преку програмата на УНОПС, средства што веднаш им се ставаат на располагање на Северна Македонија, Србија и на Црна Гора за медицински материјали, препарати и средства.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Манолева: По 43 години, болницата во Отешево доби комплетно нов лик, современи услови за третман и медицинска опрема
Заменик министерката за здравство д-р Маја Манолева, вчера беше во посета на ЈЗУ Специјализирана болница за превенција лекување и рехабилитација на хронични респираторни неспецифични и алергиски заболувања ОТЕШЕВО. Оваа јавно-здравствена установа минатата година доби комплетно нов лик со реновиран болнички објект финансиски поддржан од Министерството за локална самоуправа и Владата на Швајцарија во висина од 20 милиони денари.
„Со имплементацијата на овој проект подобрени се болнички услови за третман на пациенти, поставен е нов мебел како донација од Луксембург, а собите се наместени со нов инвентар. Сите амбуланти, лабораторија, дневна соба, ехо кабинет, соба за спирометрија и алерго тестови се позиционирани во реновираниот објект. Како што можевме да видиме од посетата амбулантите веќе функционираат во реновираните простории. Специјализираната болница Отешево нуди современи услови за третман на пациенти и достоинствени услови за работа на здравствените работници“, рече Манолева.
Болницата во Отешево опстојува повеќе од 43 години и ова е прво реновирање кадешто значително се унапредени болничките услови. Во изминатиот период, установата се зајакна и со два апарати за физикална медицина и рехабилитација во склоп на проектот во вредност од 270 илјади денари.
Македонија
Притвор од 48 часа за две лица кои се задржани по убиството на лекарот во Железара
Со оглед на тоа што се уште се преземаат дејствија за обезбедување докази, јавен обвинител од Основното јавно обвинителство Скопје синоќа до судијата на претходна постапка од Основниот кривичен суд Скопје достави предлог за определување мерка краткотраен куќен притвор во траење од 48 часа за две од лицата кои беа задржани во врска со убиството на лекар во скопската населба Железара, извести Обвинителството.
Како што велат од Обвинителството, предлогот е прифатен и бараната мерка е определена.
Македонија
„Мицковски е ист како Груевски, злоупотребени децата во Гевгелија“, вели СДСМ
„Христијан Мицкоски е ист како неговиот претходник и ментор Никола Груевски. За врме на посетата на Мицкоски на Гевгелија беа злоупотребени млади лица и ученици, исто како што правеше Груевски, кога се редеа деца за да го поздравуваат“, соопшти СДСМ.
„На ист начин вчера, под палка на локалната власт на ДПМНЕ во Гевгелија беа поставени ученици да му аплаудираат, овој пат на Мицкоски.
Мицкоски е ист како Груевски. Во ДПМНЕ нема никакви промени. Тоа се истите методи на ДПМНЕ и истите ликови.
Мицкоски сака да продолжи каде застана Груевски.
Граѓаните не забораваат како изгледаше кога менторот на Мицкоски, Груевски нѐ заглави и не донесе до дното“, се наведува во соопштението на СДСМ.