Македонија
Основан Форум на жените лидери од Југоисточна Европа за добро владеење и антикорупција
На иницијатива на вицепремиерката задолжена за политики за добро владеење, Славица Грковска, денеска во Скопје се одржува официјален настан за промоција на Форумот на жени лидери од Југоисточна Европа за добро владеење и антикорупција, поддржан од UN WOMEN, RAI и UNODC.
Целта на Форумот е да се создаде регионална мрежа, која се стреми да го зајакне лидерството на жените во општеството преку професионален развој и меѓународно вмрежување за размена на најдобри практики, искуства и меѓусебна поддршка за градење подобри општества за сите.
Вицепремиерката Грковскa го отвори настанот потсетувајќи на поранешната романска обвинителка Лаура Ковеси, која иако на почетокот на својата кариера била обесхрабрувана дека обвинителската професија не е за жени, постигна голем успех во својата татковина, покажувајќи дека институциите може да функционираат и дека никој не е недопирлив.
„Започнувам со ова бидејќи е јасен пример за лидерство, кое цели кон промени. Лидерство што настанало преку борба со препреки, со кои се соочува секоја жена. Лидерство што јакнело низ жестока борба со помоќен противник. И лидерство со интегритет и засновано на високи вредности. Лидерство какво што е важно за да се опстане и да се живее и создава во сопствената земја“, истакна вицепремиерката задолжена за политики за добро владеење.
Осврнувајќи се на заедничките предизвици на земјите во регионот, таа ја нагласи потребата од соработка заради забрзано подобрување на системот, но и за изнаоѓање ефикасни начини за подобрување на колективниот менталитет за
прашања, како што се корупцијата и доброто владеење.
„Сите ние доаѓаме од подрачја што не се имуни на конфликти и насилство и јасно ни е дека корупцијата се одржува и со продлабочување на поделбите по разни основи и дека силно влијае на тоа дали ќе имаме мир, безбедност, благосостојба или пак, нестабилност и сиромаштија“, изјави Грковска и го заокружи своето воведно обраќање цитирајќи го американскиот претседател Џозеф Бајден дека борбата со корупцијата не е само добро владеење, туку претставува самоодбрана и патриотизам.
Како поддржувачка на оваа иницијатива, во воведниот дел на Форумот се обрати амбасадорката на САД во Северна Македонија, Ангела Агелер, која истакна дека зајакнувањето на жените е врвен приоритет, а силното лидерство е потребно повеќе од кога и да е порано. Амбасадорката истакна дека поголемото учество на жените води до помирни и постабилни демократии и дека САД остануваат партнер и сојузник во креирањето подобра иднина.
Генералната секретарка на ОБСЕ, Хелга Шмид, во поздравното видеообраќање посака овој Форум да биде почетна точка за поефикасни интервенции и родово одговорни политики на полето на антикорупцијата истакнувајќи дека корупцијата не е родово неутрална и е еден од најголемите предизвици за колективот и безбедноста.
Форумот на жени лидери на ЈИЕ се воспоставува со поддршка на агенциите на Обединетите нации и РАИ. Во име на UN Women се обрати раководителката на канцеларијата, Весна Ивановиќ-Кастаред, која истакна дека силната женска перспектива е потребна за да се оствари одржлив развој и за да се осигуриме дека никој нема да биде изоставен. Џенифер Сарвари Бредфорд од UNODC посочи дека сега е вистинско време за да се повика на акција, која го зема предвид женскиот глас и приоритети.
Раководителката на Секретаријатот на РАИ, Десислава Гоцкова, порача дека оваа иницијатива ќе биде глас на жените во регионот, особено за оние што се на одлучувачки позиции на полето на доброто владеење.
На настанот беше потпишана декларацијата за основање на Форумот, на што му претходеше панел-дискусија, на која првите потписнички ги споделија своите ставови и мислења за неговото значење и можностите што ги отвора.
Покрај вицепремиерката Грковска, декларацијата ја потпишаа: Наташа Новаковиќ, доскорешна претседателка на Комисијата за одлуки за судир на интересите во Хрватска, Десислава Гоцкова, раководителка на Секретаријатот на РАИ, Јелена Перовиќ, директорка на Агенцијата за спречување корупција од Црна Гора и поранешен судија и претседател на суд, и Ардита Секнај, генерален секретар на Националниот комитет на Меѓународната стопанска комора во Албанија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
„Вреди“: ДУИ во Руско сценарио бара лек за изборниот пораз
Навреме предупредивме дека очајниот ДУИ смислил сценарио за предизвикување политичка криза после првиот круг на претседателските избори со цел да избегне чесно признавање на извесниот пораз. Нивен сон е техничката Влада на Талат Џафери да опстои повеќе од предвидените 100 дена, велат од коалицијата „Вреди“.
„Бујар Османи избегнува одговор на многу логичното прашање што правел како претседавач со ОБСЕ во текот на 2023 за оваа меѓународна институција да оцени дека постои потенцијал за нарушувањето на безбедноста во изборниот процес и го зголеми бројот на набљудувачи. Исто така молчи дали Османи како домаќин на Лавров го прашал за рецептот за суспендирање на демократската волја на граѓаните.
Но, контурите на ова руско сценарио полека излегуваат на виделина. Владата на Талат Џафери незаконски спречува поставување на началник и дополнителен началник на СВР Тетово за да може да ги злоупотребува партиските војници на ДУИ инсталирани во полицијата во кампањата. Потврда за ова е последниот скандал со училиштето во Житоша кое не само што е претворено во штаб на ДУИ, туку во него полицајци отворено агитираат за Али Ахмети, се фотографираат и објавуваат на социјалните мрежи“, реагираат од коалицијата.
Очекуваат како што велат, дека раководството на МВР соодветно ќе ги евидентира и санкционира овие девијации од страна на полициски службеници.
„Јасно им порачуваме на полициските службеници и останати кадри на ДУИ во државните институции, добро да размислат какви партиски задачи прифаќаат и спроведуваат. Ништо не може да ја смени реалноста. ДУИ после осми мај преминува во опозиција и за секој нивен кадар кој се огрешил пред законите ќе следи соодветна правосудна постапка. Добро е секој партиски активист на ДУИ да размислува трезвено и да не се впушта во незаконски авантури лажно верувајќи дека ќе продолжат кариерите на Али Ахмети, Бујар Османи и Артан Груби.
Знаеме дека исплашеното раководство на ДУИ и нивните коалициони другарчиња се подготвени на различни предизборни далавери, но треба да земат предвид дека на секој обид за спречување на слободно, фер и демократско гласање на Албанскиот народ, жестоко ќе одговориме“, додаваат во партиското соопштение.
Нагласуваат дека ништо не може да ги спречи промените. Гласачите, како што оценуваат, уште повеќе се мотивираат да гласаат против ДУИ кога ги гледаат овие нивни очајнички потези.
„Бранот е тргнат и тој секојдневно ќе расте додека не се претвори во цунами за ДУИ на изборите“, се потенцира во напишаното од коалицијата „Вреди“.
Македонија
Први април, вториот ден на Велигден, неработен за граѓаните од католичка вероисповед
Министерството за труд и социјална политика соопштува дека во согласност со Законот за празниците на РМ („Службен весник на РМ“ бр. 21/98 и 18/07), 1 Април 2024 година (понеделник), Велигден, вториот ден на Велигден, според грегоријанскиот календар, е неработен за граѓаните од католичката вероисповед во Република Северна Македонија.
Истовремено, Министерството за труд и социјална политика на граѓаните од католичка вероисповед им го честита празникот.
Македонија
Донесено упатство за радиодифузерите за претседателските и парламентарните избори
Агенцијата за аудио и аудиовизуелните медиумски услуги, со цел појаснување на начинот на примена на правилата од Изборниот законик, донесе упатство за радиодифузерите за претседателските и парламентарните избори 2024.
Со упатството се опфатени правилата за лимитите за платеното политичко рекламирање (ППР), означувањето на нарачателот на рекламирањето, распределбатата на времето во вести кај јавниот сервис, бесплатното политичко претставување на Собранискиот канал, обезбедувањето пристапност на содржините за изборниот процес за лицата со попреченост, правилата за известување во деновите на изборниот молк, особено за периодот на преклопување на двата изборни процеса.
За време на изборната кампања за претседателските избори, во првиот круг на гласање, радиодифузерите може да емитуваат вкупно девет минути и триесет секунди дополнително време за рекламирање реален час емитувана програма, исклучиво наменети за ППР. Во упатството е точно утврдена распределбата на овие минути меѓу седумте подносители на листи/кандидатите за претседател. Во вториот круг на гласање вкупното време за ППР ќе зависи од времето за ППР што го користат подносителите на листи/кандидатите за претседател, кои ќе ја продолжат изборната кампања во вториот круг.
За време на изборната кампања за парламентарните избори, радиодифузерите имаат право на дополнителни девет минути и триесет секунди за рекламирање реален час, исклучиво наменети за ППР. По потврдувањето на поднесените листи на кандидати за пратеници од страна на Државната изборна комисија, Агенцијата соодветно ќе го дополни упатството за радиодифузерите за претседателските и парламентарни избори 2024.
За време на изборниот молк за претседателските избори, на 23 и на 24 април (до 19 часот) 2024 година продолжува изборната кампања за парламентарните избори, но запира медиумското покривање во вестите и во посебните информативни емисии на учесниците во изборните кампањи за двата изборни процеса.
Јавниот сервис и телевизиите на државно ниво што ќе објавуваат платено политичко рекламирање, треба да емитуваат содржини поврзани со изборниот процес во формат пристапен за лицата со попреченост.
Упатството за радиодифузерите за претседателските и парламентарните избори 2024 е достапно на веб-страницата www.avmu.mk.