Македонија
Охрид очекува нов градоначалник во април заедно со претседателските избори
Вработените во Општина Охрид очекуваат нов градоначалник да добијат заедно со претседателските избори во април в година. Делегација од Општина Охрид денес ја почна процедурата, која треба да доведе до нови локални избори.
„Лично на рака, денес, делегацијата од Охрид, ќе го достави известувањето за смртта на градоначалникот и новата состојба во Општината во Министерството за локална самоуправа. Известувањето се носи на рака за да ги скратиме роковите, законски се предвидени 15 дена, но ние тоа ќе го направиме денес за да можеме што побргу да избереме вршител на должноста градоначалник кој ќе биде овластен потписник. Заменик-градоначалникот нема овластување, па во моментот нема кој да потпише ниту плата за вработените“, велат од Општина Охрид.
Тие се свесни дека најмалку еден месец ќе им доцни платата и покрај напорите да ги скратат роковите. Законот за локалната самоуправа предвидува, кога ќе го добие известувањето, Министерството за локална самоуправа во рок од 15 дена да достави известување до Владата, која во рок од 30 дена од приемот на известувањето треба да констатира дека мандатот на градоначалникот престанал и истовремено да иницира постапка за распишување нови избори.
Од денот на објавување на одлуката на Владата, Советот на Општина Охрид во рок од 30 дена треба да избере еден од членовите на Советот што ќе ја врши должноста градоначалник за периодот до изборот на нов градоначалник. Тој ќе биде овластен потписник.
Од Охрид велат дека се согласни за вршител на должноста да го предложат сегашниот заменик-градоначалник Константин Георгиевски и очекуваат изборот да се биде веднаш по новогодишните празници бидејќи во разговори со претставници од Владата добиле ветување дека нема да се чекаат максимално предвидените законски рокови, туку ќе се настојува процедурата да заврши побргу.
„Владата ќе направи сè што е во рамките на својата можност за да не бидат доведени во неповолна состојба вработените во Општина Охрид. Законските процедури предвидуваат рок од шест месеци, сега треба да се констатира состојбата формално-правно од страна на Министерството за локална самоуправа, потоа Владата да го информира Собранието и Собранието во координација со ДИК да го почне процесот за нови избори во Охрид. Не би можел во моментот да прецизирам конкретен рок, но ова е постапката“, вели Миле Бошњаковски, портпарол на Владата.
Од Министерството за локална самоуправа најавија дека известувањето веднаш ќе го испратат во Владата и ќе бараат тоа да се најде на дневен ред на следната владина седница.
„Министерството за локална самоуправа ќе постапи во законскиот рок веднаш по добивањето и на формалното известување од Општина Охрид со цел да се обезбедат законските услови за нормално извршување на функциите на Општината“, велат од Министерството за локална самоуправа.
Освен за општина Охрид, процедура за нови градоначалнички избори е почната и за Ново Село и Дебар. Ново Село остана без градоначалник бидејќи Боро Стојчев, осуден на шестмесечна затворска казна за шверц на цигари, си поднесе оставка на почетокот на октомври. Без градоначалник е и општина Дебар по смртта на градоначалникот Ружди Љата.
„За општините Ново Село и Дебар од страна на Министерството за локална самоуправа е почната постапката за констатирање престанок на мандатот на градоначалникот по сила на законот, што значи дека Владата е известена во законски утврдениот рок дека настапил еден од случаите наведени во Законот за локалната самоуправа, чл. 54, став 1, врз основа на што Владата констатирала престанок на мандатот и се почнати другите законски дејства, со цел да се создадат услови за распишување нови избори за градоначалник на овие општини. Одлуките на Владата, со кои се констатира престанок на мандатот на градоначалниците во овие две општини, се објавени во ‘Службен весник на РМ’ од 4 декември“, велат од Министерството за локална самоуправа.
Во Државната изборна комисија сè уште не се размислува дали изборите за градоначалници ќе бидат заедно со претседателските избори.
„Претседателот на Собранието треба да донесе одлука за распишување избори за градоначалник, па тогаш да почнат сите дејства“, изјавија од Државната изборна комисија за „Макфакс“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Предизборен молк пред утрешните претседателски избори, денеска гласа дијаспората, болните и затворениците
Започна предизборниот молк пред утрешните претседателски избори. Молкот завршува на 24 април во 19 часот, кога се затвораат избирачките места.
Денеска ќе гласаат избирачите запишани во посебниот извод од избирачкиот список, односно дијаспората, затворениците, лицата во старските домови, болните и изнемоштени и внатрешно раселените лица.
Гласањето за претседател започна во саботата, први гласаа членовите на избирачките одбори кои отпатуваа да го спроведат гласањето во дијаспората.
Во посебниот извод од избирачкиот список се запишани 191 избирачи кои треба да го спроведат гласањето во дијаспората.
Во дипломатските претставништва и конзуларни канцеларии треба да гласаат наши граѓани кои живеат во странство а кои се пријавиле за гласање.
Право на глас имаат 1.814.317 гласачи запишани во единствениот избирачки список. Избирачките места се отвораат во 7 часот, а гласањето трае до 19 часот. Се гласа на 3480 избирачки места во целата земја.
Скопје
Петровец, Сарај, Карпош, Кисела Вода и Центар денеска без струја
Регионалниот центар за управување со кризи на Град Скопје, по добиеното известување од ЕВН, информира дека поради технички зафати во електродистрибутивната мрежа, без електрична енергија ќе останат делови од општините Петровец, Сарај, Карпош, Кисела Вода и Центар.
· од 8.30 до 14.30 часот корисниците од селата Кожле и Бадар, како и тунелот кај Катланово на автопатот Велес – Скопје (општина Петровец);
· од 9 до 11 часот корисниците од село Кондово (општина Сарај);
· од 9 до 11 часот корисниците од делови од улиците Вич и Разловечко востание (општина Карпош);
· од 9 до 12 часот корисниците од делови од улиците Иван Козаров и Тоне Томшиќ. (општина Кисела Вода);
· од 9 до 15 часот корисниците од дел од улицата Максим Горки, односно објектите во околината на Домот на градежниците (општина Центар);
· од 11 до 13 часот корисниците од дел од улицата Орце Николов, поточно објектите во околината на куќните броеви 155 и 156 (општина Карпош)
Македонија
Време денес повремено со пороен дожд и грмежи, температурата ќе достигне 14 степени
Вренето денес ќе биде претежно облачно со повремени врнежи од дожд, наместа пообилни (и над 20 л/м²) и поројни, проследени со грмежи особено во западните и јужните делови од земјата. Ќе дува слаб до умерен, а долж Повардарието и во источните делови повремено засилен ветер од југоисточен правец. Минималната температура ќе биде во интервал од 4 до 10, а максималната ќе достигне од 11 до 17 степен.
Во Скопје облачно со повремени врнежи од дожд повремено пороен и проследен со грмежи. Ќе дува слаб до умерен јужен ветер. Минималната температура ќе се спушти до 6, а максималната ќе достигне до 14 степени, јавува УХМР.
Ветерот долж Повардарието ќе продолжи да засилува и во среда. Во среда и четврток ќе има локална појава на повремено пороен дожд и услови за грмежи. Потоа следи период на претежно стабилно и постепено потопло време.