Македонија
Партијата на пензионери се откажува од државните финансиски средства
Партијата на пензионери соопшти дека доброволно се откажува од финансиските средства, кои треба да ги добие од државниот буџет до крајот на оваа година.
Со овој гест, Партијата сака со личен пример да даде свој скромен придонес во надминување на претстоечката тешка финансиска положба на Фондот за здравство.
„Партијата на пензионери цени дека, во време на непредвидливо ширење на коронавирусот Ковид-19, врвен приоритет на државата е заштита на животот и здравјето на луѓето. Имајќи предвид дека пензионерите и другите маргинализирани општествени групи се најзагрозени од епидемијата на коронавирусот, Партијата на пензионери апелира до сите општествени чинители, кои се во можност, да искажат свој гест на хуманост и солидарност и да помогнат на најзагрозените лица во државата“, велат од ПП.
Партијата на пензионери, во оваа пригода, ги информира граѓаните и своето членство дека партиските функционери и членовите на раководните органи во ПП, уште од основањето на партијата, не примале и не примаат никави финансиски средства како надомест за извршување на своите функции, или извршување на партиски активности, односно сите активности во ПП се волонтерски и самофинансирани со лични средства.
Партијата упати апел до сите граѓани, политички партии, невладини организации, медиуми и други субјекти во овој тежот период да престанат со дефетистичко однесување и ширење лажни вести, бидејќи само на тој начин можат да придонесат во надминување на кризата.
„Во тој контекст, повикуваме да ги следиме и почитуваме мерките и активностите што ги презема Владата и другите државни органи, а партиските кампањи да ги оставиме за други времиња“, додава партијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Манолева: По 43 години, болницата во Отешево доби комплетно нов лик, современи услови за третман и медицинска опрема
Заменик министерката за здравство д-р Маја Манолева, вчера беше во посета на ЈЗУ Специјализирана болница за превенција лекување и рехабилитација на хронични респираторни неспецифични и алергиски заболувања ОТЕШЕВО. Оваа јавно-здравствена установа минатата година доби комплетно нов лик со реновиран болнички објект финансиски поддржан од Министерството за локална самоуправа и Владата на Швајцарија во висина од 20 милиони денари.
„Со имплементацијата на овој проект подобрени се болнички услови за третман на пациенти, поставен е нов мебел како донација од Луксембург, а собите се наместени со нов инвентар. Сите амбуланти, лабораторија, дневна соба, ехо кабинет, соба за спирометрија и алерго тестови се позиционирани во реновираниот објект. Како што можевме да видиме од посетата амбулантите веќе функционираат во реновираните простории. Специјализираната болница Отешево нуди современи услови за третман на пациенти и достоинствени услови за работа на здравствените работници“, рече Манолева.
Болницата во Отешево опстојува повеќе од 43 години и ова е прво реновирање кадешто значително се унапредени болничките услови. Во изминатиот период, установата се зајакна и со два апарати за физикална медицина и рехабилитација во склоп на проектот во вредност од 270 илјади денари.
Македонија
Притвор од 48 часа за две лица кои се задржани по убиството на лекарот во Железара
Со оглед на тоа што се уште се преземаат дејствија за обезбедување докази, јавен обвинител од Основното јавно обвинителство Скопје синоќа до судијата на претходна постапка од Основниот кривичен суд Скопје достави предлог за определување мерка краткотраен куќен притвор во траење од 48 часа за две од лицата кои беа задржани во врска со убиството на лекар во скопската населба Железара, извести Обвинителството.
Како што велат од Обвинителството, предлогот е прифатен и бараната мерка е определена.
Македонија
„Мицковски е ист како Груевски, злоупотребени децата во Гевгелија“, вели СДСМ
„Христијан Мицкоски е ист како неговиот претходник и ментор Никола Груевски. За врме на посетата на Мицкоски на Гевгелија беа злоупотребени млади лица и ученици, исто како што правеше Груевски, кога се редеа деца за да го поздравуваат“, соопшти СДСМ.
„На ист начин вчера, под палка на локалната власт на ДПМНЕ во Гевгелија беа поставени ученици да му аплаудираат, овој пат на Мицкоски.
Мицкоски е ист како Груевски. Во ДПМНЕ нема никакви промени. Тоа се истите методи на ДПМНЕ и истите ликови.
Мицкоски сака да продолжи каде застана Груевски.
Граѓаните не забораваат како изгледаше кога менторот на Мицкоски, Груевски нѐ заглави и не донесе до дното“, се наведува во соопштението на СДСМ.