Македонија
Пендаровски: Мораме да се здружиме или да бидеме погласни за аерозагадувањето
Претседателот Стево Пендаровски се обрати на панел-дискусијата „Младите и аерозагадувањето“, што во организација на Здружението на студентите по медицина се одржа во „Млади хаб“ – канцеларијата на претседателот.
Говорејќи на тема „Национален консензус против аерозагадувањето“, претседателот Пендаровски ги претстави клучните поенти од Светскиот лидерски самит за климатски промени – COP26 во Глазгов, одржан во ноември 2021 година, како и усвоените ревидирани национални придонеси во справувањето со последиците од климатските промени.
Пендаровски говореше и за неговите конкретни чекори што по стапувањето на функцијата ги има преземено на оваа тема вклучувајќи го издигнувањето на аерозагадувањето на ниво на безбедносно прашање, поставувањето како точка на Советот за безбедност и неговото вклучување во стратегијата за одбрана.
Според претседателот Пендаровски, многумина се свесни за проблемот на загадувањето, но немаат волја, а многумина немаат ниту финансиски или други услови да направат промена во начинот на живеење.
Претседателот Пендаровски посочи дека на глобално ниво постои консензус за свесноста за постоењето на климатските промени, но сепак постојат предизвици во имплементацијата на мерките. Дополнително, според него, конспиративните теории прилично ја поткопуваат таа заедничка свест дека климатските промени се нешто што е многу сериозно и што треба што побргу да го адресираме.
Тој посочи и на високите бројки на починати како директна или индиректна последица на аерозагадувањето.
„Мораме да се здружиме или да бидеме погласни, но не да останеме само на зборови кога ќе ни заврши мандатот да се каже – јас потпишав таков документ, таков указ, таква одлука, а во пракса иста или не дај боже поголема бројка од луѓе да ни починуваат од истите причини“, рече претседателот Пендаровски.
Претседателот Пендаровски повика младите да го искористат својот ентузијазам, иновативни идеи и креативни решенија за позитивни промени. Ги охрабри младите да бидат гласни и секогаш да ги поставуваат прашањата. Аерозагадувањето, според претседателот Пендаровски, е доволно важно и се однесува на здравјето и животите на луѓето и поради тоа не треба да биде ставано настрана, туку треба да се решава заедно со сите други проблеми.
На панел-дискусијата, на која присуствуваше и сопругата на претседателот, Елизабета Ѓоргиевска, се обратија и министерот за здравство, Беким Сали, како и Џулијан Васало, заменик-шеф на Делегацијата на ЕУ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Левицата: Решението за градба кај болничкиот комплекс Воена болница да се поништи веднаш
„Го повикуваме градоначалникот Стевчо Јакимовски да ги почитува законите и да го поништи Решението за градба на 17-катницата кај Болничкиот комплекс „Воена болница“, истакнуваат од Левица.
Потсетуваат дека политичката партија Левица повеќепати укажа на штетноста од градбата на повеќекатницата на истата локација, паралелно организираше протест на којшто граѓаните јавно го искажаа незадоволството од своеволието на градоначалникот и инвеститорите за противзаконската одлука на истите да почнат со градба на зграда за којашто немаат законска дозвола.
„Од пред неколку дена е правосилно Решението со кое се поништува незаконски позитивното конзерваторско мислење, кое се обидоа да го издејствуваат инвеститорите, а истото, по наши сознанија, е пристигнато во Општината на 21.3.2024 година, по што градоначалникот треба веднаш во законски рок да постапи по истато. За жал, Решението за градба уште не е поништено.
Од општинската администрација не даваат одговори по однос на прашањето по Решението со кое се одбива жалбата на инвеститорите, но успеавме да го добиеме, бидејќи е информација од јавен карактер“, дообјаснуваат од оваа партија.
Го повикуваат градоначалникот Стевчо Јакимовски во пресрет на изборната претседателска кампања да се одважи, како што велат, да ги испочитува законите и да го поништи Решението за градба веднаш, како би докажал пред граѓаните дека, навистина, ги застапува нивните интереси“.
Македонија
Инспектори затекнале диви менувачници на Бит-пазар, но наместо да ги запечатат, им дозволиле да работат
Полицијата поднесе кривична пријава против шест инспектори, вработени во Државниот пазарен инспекторат, и тоа: С. Б. (32), Ј. Р. (54), В. М. (47), Б. С. (46), С. С. (61) и Р. Б. (37), сите од Скопје, поради злоупотреба на службената положба и овластувањето.
Во текот на март и април 2023 година, вршејќи контрола кај три менувачници, лоцирани во близина на Бит-пазар, а за кои било утврдено дека не биле регистрирани како фирми и не поседувале лиценци издадени од НБРМ за вршење менувачко работење, но подолг временски период работеле како менувачници, инспекторите на затекнатите лица во дивите менувачници биле должни да им изречат решение за забрана за вршење дејност, да им ги запечатат објектите, да им ги одземат предметите, опремата и средствата со кои е направен прекршокот, како и да им изречат глоба во износ од 1.000 до 20.000 евра во денарска противвредност.
Но, пријавените пазаришни инспектори ги прекршиле сите одредби од наведениот закон и во три извршени вонредни инспекциски надзори на затекнатите лица во сите три објекти како менувачници ниту им издале решение за забрана за вршење нерегистрирана дејност, ниту им ги запечатиле просториите во кои ја вршеле противзаконската активност, ниту им ги одзеле средствата, предметите и опремата со кои е направен прекршокот ниту, пак, им изрекле глоба во износ од 1.000 до 20.000 евра.
Напротив, во сите три извршени вонредни надзори на сите три менувачници на секој од сопствениците им изрекле еднократна глоба во износ од 80 евра во денарска противредност и ги оставиле и понатаму менувачниците редовно да работат, со што постапиле спротивно на законот за забрана и спречување вршење нерегистрирана дејност и со неизвршување на својата службена должност го сториле кривичното дело злоупотреба на службената положба и овластувањето.
Македонија
Митрески – Бомгартнер: Северна Македонија и Франција имаат одлични односи, меѓусебната соработка и поддршка ќе се продлабочат
Претседателот на Собранието, Јован Митрески, денес оствари средба со aмбасадорот на Француската Република во Република Северна Македонија, Сирил Бомгартнер.
Изразувајќи задоволство од одржувањето на средбата, Митрески ја констатира одличната соработка меѓу двете држави и особено соработката на парламентарен план.
Амбасадорот Бомгартнер, честитајќи му го изборот за претседател на Собранието, се сложи со констатациите за интензивираната динамика на меѓусебна соработка. Во тој контекст ги поздрави средбите на парламентарци од Собранието на Република Северна Македонија и Националното собрание и Сенатот на Француската Република во изминатите години како позитивен тренд што треба да продолжи и во иднина.
Информира за претстојната посета на претседателката на групата за пријателство, Лилијана Танги, на земјата, како дел од набљудувачката мисија на ОБСЕ за претстојните претседателски и парламентарни избори.
Беше особено поздравено одржувањето на втората едукативна активност во Собранието „Имам став – Млад франкофонски парламент“, во рамките на одбележувањето на март – месец на франкофонијата, еден исклучителен настан и манифестација која полека прераснува во убава собраниска традиција.
Двајцата соговорници разменија мислења за актуелните собраниски активности, текот на изборите и конституирањето на новиот парламентарен состав. Беше изразена општа согласност за потребата од унапредувањето на соработката во доменот на културата, економијата, енергетиката и други области од заемен интерес за двете земји, како и за потребата од зголемување на бројот на француски инвестиции во земјата.