Македонија
Пендаровски: Политичките тензии на моменти ја парализираат државата
Претседателот Стево Пендаровски денеска се обрати на свечениот научен собир „Современата македонска држава – две етапи во процесот на нејзиното формирање и развој: 1941 – 1991/1991 – 2021 година“.
„Држава направивме и неа нема да ја изгубиме, но воопшто не е неважно во каква држава живееме, односно дали во таква држава ќе сакаат да живеат нашите деца и внуци. Ако сакаме и по 30 или 50 години да кажеме дека имаме држава со сите нишани, треба да најдеме решение за актуелните проблеми, а не за 1903, 1941 или 1991. Само на таков начин ќе опстанеме во новиот свет, кој се раѓа пред нашите очи“, истакна претседателот Пендаровски.
Според него, надворешната интегрираност е клучен предуслов за опстанокот на малите држави во глобалниот свет и во тој дел, како што рече, е забележан видлив напредок на договорот од Преспа, без да се загрозат виталните идентитетски маркери на македонската нација, кои се експлицитно наведени во текстот на документот.
За Пендаровски, Договорот со Бугарија од 2017 е пример за приближување постигнат без странска асистенција.
„Акт што не ги дискриминира ниту една од страните кои и во посткомунизмот, за жал, не ги надминаа заемните стереотипи една за друга. Не очекувам негативни ефекти ниту во фазата на негова целосна имплементација затоа што е познато дека во таа смисла за нас воопшто не постои маневарски простор: имено, ако ја изгубиме нацијата, не ни треба европската интеграција. Неодамна усвоената собраниска декларација го потврдува широкиот политички консензус за ова прашање“, нагласи претседателот на државата.
Пендаровски се осврна и на економскиот аспект, кој, според него, е една од главните причини за брановите на иселување, кои не стивнуваат 30 години.
„Во овој контекст многу е битно да се намали нивото на корупција, особено високата корупција, затоа што ги става во подредена ситуација граѓаните што плаќаат даноци и воопшто ги демотивира да ги почитуваат законите, го оштетува буџетот и економската основа на земјата и, не помалку важно, ја руши довербата на луѓето во институциите на сопствената држава“, рече тој.
Додаде дека заштитата на животната средина, што веќе стана најважното политичко и изборно прашање во најмалку половина од земјите членки на Европската Унија, но политиките и ресурсите за имплементација на зелените политики кај нас се нужни што побргу не затоа што се тие популарни кај богатите туку затоа што, според некои процени, како што нагласи, ни умираат по 3.000 луѓе годишно само од аерозагаденост, колку што приближно изнесува едногодишниот данок во смрт од Ковид-19.
„Реално, ништо од ова нема да биде можно ако не го намалиме нивото на политичка поларизација, каде што изборниот победник ги алиментира своите членови, а свесно се лишува од придонесот на оние што не гласале за него. Јасно е дека во оваа фаза од нашиот политички развој граѓанското помирување е невозможно, но сите ние, актуелните политички актери, сме должни со скромен личен пример да придонесеме за деескалација на тензиите, кои на моменти ја парализираат целата држава. Потребен ни е нов, широк национален и државен консензус за развој што ќе биде поддржуван од релевантните политички субјекти во континуитет, независно дали се на власт или во опозиција. Без тоа, секоја следна годишнина од независноста само ќе ја одбележуваме, без да имаме што да прославуваме“, потенцира Пендаровски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Касами: Добитници на овие избори сме ние, ДУИ има купено гласови
„Влен“ е легитимен претставник на Албанците и ги доби гласовите на Албанците, изјави Билал Касами на прес конференција.
„Добитници на овие избори сме ние, коалицијата „Влен“. ДУИ има купено гласови од загрозените гласачи кои имаат потреби од пари. „Влен“ ги доби гласовите на Албанците, вели Касами.
„ДУИ го загуби последниот легитимитет да зборува во име на Албанците, затоа на 8 мај ние ќе победиме. Овој резултат и во мандати не е голема разлика со ДУИ и на 8 мај овој резултат ќе биде во наша полза. ДУИ успеа да ја загуби последната можност, еден кандидат Албанец да биде избран на директни избори во 2024 година. Тие ќе бидат запишани со црни букви во историјата на албанскиот народ во Македонија. Ако биле заинтересирани Албанец да оди во вториот круг сигурно ќе беа координирани со нас и ќе беше возможно да биде избран Албанец. Затоа мислиме дека вредеше оваа борба“, рече Касами.
Тој се заблагодари на сите што го гласаа кандидатот Арбен Таравари и додаде дека ДУИ има изгубено гласови од помалите етнички заедници и од загрозените граѓани.
Таравари кажа дека коалицијата подоцна ќе разговара за тоа кому ќе ги даде гласовите во вториот круг на претседателските избори.
Македонија
Ванковска: Мојата цел беше не да победам, туку да вознемирам една застојана елита
Кандидатот за претседател на Македонија, Билјана Ванковска упати честитка за победниците, по завршувањето на првиот круг од претседателските избори.
„Јас сум среќна за можноста што ми ја даде Левица да зборувам слободно, чесно, отворено и радикално – да понудам нешто што мнозина не беа спремни да го прифатат како опција. Народот очигледно не е подготвен за тоа. Мојата цел беше не да победам туку да вознемирам една застојана елита. Колку успеав, ќе видите наскоро. Не сакам да бидам пророчица, но новиот претседател ќе се соочи со сето она за што предупредував“, напиша Ванковска на социјалните мрежи.
Македонија
Нема да се откажеме и нема да ги наведнеме главите, порача Ковачевски
Денеска е тежок удар за европската перспектива на Македонија, но не е доцна да се смени правецот, откажувањето не е опција за нас. Нема друга опција за нас освен патот на европска интеграција, порача вечерва лидерот на СДСМ, Димитар Ковачевски.
Додаде дека е задоволен што гласањето поминало во мирна и демократска атмосфера.
„Се надевавме на подобри резулатти, но време е да ги ставиме на страна сите разлики и да се обединиме зад идејата за европска Македонија. Занм дека многу наши поддржувачи се разочарани. Но сега не е време за откажување. Имаме уште две недели, јас ќе бидам на терен секој ден со вас, и ќе работиме за да ја добиеме поддршката за европска Македонија“, рече Ковачевски.
Порача дека нема откажување.
„Ние нема да се откажеме и нема да ги наведнеме главите, ќе продолжиме да се бориме се додека не победиме“, порача лидерот на СДСМ.
Ковачевски му упати порака и на Пендаровски.
„Ова е наша заедничка борба, ќе се бориме заедно рамо до рамо, ова е најважната битка за македонската иднина. Борбата за европска Македонија продолжува и на 8 мај, во вториот круг на претседателските и парламентарните избори. Се гледаме за две недели! Да живее европска Македонија“, рече тој.