Македонија
Подмладоците на политичките партии се обврзаа со Декларација за да ги подобрат дијалогот и соработката
Европската мрежа на млади за демократија (EDYN) во рамките на својот годишен план за работа во Скопје организираше панел дискусија на тема: „Подобрување на дијалогот и соработката помеѓу политичките подмладоци за намалување на политичката поларизација и зголемување на учеството на младите во политиката“.
На панел дискусијата учествуваа претставници на тринаесет политички подмладоци и претставници од граѓанскиот сектор.
Претставниците од политичките подмладоци во своите обраќања ja потенцираа важноста од политичка соработка и негување на дијалог преку кој ќе се поттикне активизам кај младите, намалување на поларизацијата и создавање општествени промени преку политички ангажман, а додека претставниците од граѓанскиот сектор ја потенцираа важноста од тоа партиите да бидат отворени кон младите луѓе, да се вклучуваат во сите партиски структури, но и да негуваат меѓусебна соработка за важни општествени прашања.
По завршувањето на панел дискусијата, претставниците на политичките партии потпишаа заедничка Декларација за подобрување на дијалогот и соработката меѓу подмладоците на политичките партии и зголемување на учеството на младите во креирање политики и се обврзаа дека ќе работат на намалување на политичката поларизација и зголемување на младинското учество во креирање политики во Република Северна Македонија.
Амбасадорите и членовите на Европската мрежа на млади за демократија (EDYN) се заблагодарија за присуството на сите и нагласија дека ќе продолжат и во иднина да работат кон организирање на вакви настани преку кои ќе се поттикне младински соработка, дебата и приближување на статовите на партиите во однос на важните општествени прашања кои ги тангираат младите.
Европската мрежа на млади за демократија (EuropeanDemocracy Youth Network – EDYN) е мрежа на млади граѓански и политички лидери на возраст од 18 до 32 години, кои делат заедничка посветеност кон унапредување и одржување на демократските вредности. Со 230 членови во 22 држави ширум Централна и Источна Европа, членовите на мрежата ги користат нивните искуства како извор на решенија за предизвиците со кои се соочуваат нивните заедници.
Европската мрежа на млади за демократија (EDYN) е поддржана од Агенцијата на САД за меѓународен развој (УСАИД), и помогната од Меѓународниот републикански институт (ИРИ) и Националниот демократски институт (НДИ).
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Таравари: Претседателството ќе биде институција отворена за секој граѓанин, ќе биде репрезент на реалноста на нашето општество
На минатонеделната прес-конференција претседателскиот кандидат Арбен Таравари го претстави првиот дел од неговиот претседателски кабинет, чиј состав, како што кажа, ќе се гради врз принципите на инклузивност и меритократија.
„Со мене како претседател по нашата победа на 8 мај, Претседателството ќе биде институција отворена за секој граѓанин. Претседателството ќе биде и репрезент на реалноста на нашето мултинационално, мултиетничко и мултикултурно општество. Граѓаните заслужуваат да бидат претставени од квалификувани и докажани луѓе во различни области од јавниот живот, од најдобрите меѓу нив, чиј придонес ќе се прошири на сите слоеви на општеството. Денеска продолжуваме со претставување на уште една група експерти од мојот претседателски кабинет, кои се докажани професионалци во академскиот свет, во приватниот и во јавниот сектор. Покрај стручноста и професионалниот придонес, секој од нив ја докажал и својата посветеност на сеопфатен општествен напредок во одредени каузи. Овие луѓе најдобро ја знаат и ја претставуваат реалноста на нашето општество“, рече Таравари.
„Сите тие ја делат истата посветеност да им служат на граѓаните на Северна Македонија, без етнички, верски или политички разлики. Сега дозволете ми да ги претставам членовите на мојот кабинет кои се пред вас денес: Амбасадорот Халим Хида ќе биде дипломатски советник на Претседателството. Амбасадорот Хида докторирал на Универзитетот „Свети Кирил и Методиј“ во Скопје, на Филозофскиот факултет. Моментално е амбасадор на мирот во светот и претседател на Здружението на албанските интелектуалци во Куманово и Липково. Јасмин Калац ќе биде правен советник на Претседателството. Јасмин магистрирал право на Универзитетот Кирил и Методиј а докторирал кривично право на Универзитетот во Анкара. Јасмин работел во Основното јавно обвинителство Скопје, а сега е правник и предавач на Меѓународниот Балкански Универзитет. Урим Вејсели ќе биде советник за безбедност и заштита. Тој е доктор по политички науки, вонреден професор, предавач на повеќе факултети во Република Северна Македонија и Косово, гостин-говорник на Универзитетот Џон Хопкинс САД и на Институтот за одбрана за меѓународни правни студии во САД. Автор и коавтор на научни трудови со импакт фактор. Експерт за одбрана и управување со кризи. Др. Аријанит Река – портпарол, вонреден професор на отсекот хемија при Факултетот за математичко-природни науки, Универзитет во Тетово. Фулбрајт алумни од Соединетите Американски Држави, докажан професионалец, автор на многу научни публикации. Со овој одличен тим од докажани професионалци, имам непоколеблива доверба дека ќе ги носиме напред идеалите на ВРЕДИ, кои всушност се најточниот одраз на очекувањата и надежите на граѓаните за промени, просперитет и благосостојба за земјата и нивните семејства. Со овие луѓе со добра волја ќе ги надминеме предизвиците пред нас и ќе ја урнеме 22-годишната тиранија на владејачката партија. Затоа велам ПРОМЕНАТА ВРЕДИ.
Почитувани сограѓани, придружете ни се на ова патување, со вашите идеи и барања. Јас и мојот тим сме тука да ве слушаме. Ќе слушаме, ќе разговараме и ќе се грижиме за секој од вас. Како претседател, заедно со овој тим, ќе бидеме обединувачки фактор и ќе работиме во најдобар интерес на сите граѓани на Северна Македонија, но и на генерациите што ќе дојдат после нас“, кажа на прес-конференцијата, претседателскиот кандидат, Арбен Таравари.
Македонија
(Видео) Мицкоски: Не очекувам власта да престане со црната кампања
Црната кампања е карактерна особина на оваа влада. Не очекуваме дека ќе престане таа нивна црна кампања која изобилува со монтажи, со навреди, со многу измислици и клевети, вели претседателот на ВМРО-ДПМНЕ, Христијан Мицкоски при посетата на општина Гевгелија, запрашан од новинарите дали во пресрет на почеток на изборната кампања очекува фер кампања од власта.
Тој истакна дека, што се однесува до ВМРО-ДПМНЕ, нема да води црна кампања затоа што македонските граѓани знаат дека Македонија од осамостојувањето немала полоша влада, од оваа на СДСМ и ДУИ и затоа ќе води позитивна кампања со презентација на проекти и решенија за проблемите на граѓаните.
„Нашата цел е во оваа кампања да водиме позитивна кампања, односно да зборуваме за проекти и да зборуваме за решенија на проблемите на граѓаните, а не да се оптеретуваме со тоа, кој колку бил лош бидејќи сите граѓани знаат дека владата на СДСМ и ДУИ беше лоша. Односно, да бидам попрецизен, полоша влада од осамостојувањето на Македонија немало“, рече Мицкоски.
Македонија
Мицкоски: Владата на ВМРО-ДПМНЕ со обновливи извори на енергија ќе обезбеди поголемо и поквалитетно снабдување со електрична енергија
Претседателот на ВМРО-ДПМНЕ, Христијан Мицкоски од Гевгелија одговарајќи на новинарски прашања истакна дека идната влада предводена од ВМРО-ДПМНЕ ќе вложува во обновливи извори на енергија како што е ветерниот парк Богданци, со цел поголемо и поквалитетно производство на електрична енергија.
Во овој регион недалеку се гледа ветерниот пак Богданци кој го реализираше владата на ВМРО-ДПМНЕ, продолжуваме и понатаму исто во околината, втората фаза, но и други можности се испитуваат за одреден вид на јавно приватно партнерство помеѓу денешно ЕСМ и приватни инвеститори за изградба на вакви енергетски капацитети, со што ќе се зголеми производното портфолио од обновлива енергија во Македонија, рече Мицкоски.
Мицкоски додаде дека на тој начин ќе се обезбеди поквалитетно снабдување со електрична енергија до нашите граѓани, а воедно порача дека ќе се укине таксата за пристап до мрежа која ја наметна оваа власт.
– Она кое е важно, онаа наметната такса за пристап до мрежата која ја наметна октроираниот претседател на Регулаторната комисија за енергетика, целосно партизираниот Бислимовски, ќе биде укината. Цениме дека нема потреба од таков тип на оптоварување на граѓаните, изјави Мицкоски.