Македонија
Пожарите во делчевско и пехчевско се шират, се појавиле и нови жаришта
Според информациите на Центарот за управување со кризи сеуште е активен пожарот во атарот на делчевско а се појавиле и нови жаришта.
Првата локација кај с. Разловци месноста викана „чокалица“. Пожарот е локализиран но екипите се суште на лице место. Другата локација е во атарот на с. Тработи и Нов Истевник над Света Вода.
Пожарот е ставен под контрола, велат од ЦУК.
Пожарот на територијата на Општина Пехчево е сeуште активен истиот се проширува на територијата на Општина Берово. Гаснењето се одвива на непристапни подрачја на с. Будинарци. Се бара помош од АРМ со 30 војници и средства за гаснење на пожарот бидејќи ситуацијата е алармантна.
Пожарот кој беснее во атарот на с. Будинарци од силниот ветер се шири кон атарот на с. Мирашинци каде гори борова шума.
ТППЕ- Штип во 12:00 часот, добиле дојава за пожар кој избувнал во атарот на с. Драгоево во Општина Штип.
Има сознанија за ново жариште кај с. Богословец на територијата на Свети Николе.
Пожарот кај Раовиќ– Буковиќ се движи кон сртот, нема опасност за селата, велат од ЦУК.
Дообјаснуваат дека таму гори мешана шума и е на доста непристапен терен. На местото на пожарот нема ниту една екипа.
Контактирано е со Председателот на Советот на општина Сарај кој поднел известување за состојбата.
Во врска со пожарот кај Катланово, односно Дивље и Крушје, превземени се активности од страна на Кризниот Штаб со употреба на воздухоплови. По нивни налог евакуирани се сите актери во гаснењето на овој пожар на безбедна оддалеченост.
По наводите на техничкиот директор на ШС Караџица, како и врз основа на контактите со луѓето кои се на теренот, направен е до сега еден прелет каде водата паднала на пожарот но по кратко време пак се разгорел и се проширил.
Пожарот сега се движи кон с. Дивље и поради дејството на авијација, оневозможено е гаснење од земја.
ШС- Караџица известува за димење кон Преслап на Китка. Добиено е известување од нивни шумари дека се работи за чадење од пожар кој со време губи на сила.
Од ТППЕ Св. Николе известуваат дека во 11.30 часот повторно е активиран, односно препален пожарот кај Богословски рид.
Пожарот кај Крушје- Џидиминци е локализиран и не се шири.
Во 11 часот дејствуваа воздухоплови кај с. Дивље на скопска страна но сеуште димат дрвја во внатрешноста на пожарот. Лицата на терен од велешка страна го контролираат пожарот на теренот.
Пожарот кај с. Иванковци – с. Мамутчево е изгаснат.
Опожарени се 8 хектари стрништа.
Во Прилепско во моментот има 2 активни пожари на отворен простор и тоа:
-во атарот на селата Дрен- Смолане каде гори сува трева и шума, а постои опасност да биде зафатена и високостеблеста борова шума.
-Во 10:10 часот повторно е реактивиран пожарот кај с. Топлица покрај магистралниот пат Прилеп- Градско.
Интервенираат во с. Дрен- Смолане.
ТППЕ Тетово известува за помал пожар покрај патот Шипковица-Бродец каде гори сува трева.
Помал пожар има и во атарот на с. Романовце на опожарена сува трева, соопштија од ЦУК.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Приведено уште едно лице за кражбата на сефот во Црниче
Приведено е уште едно лице за кражбата на сеф од маркет во Црниче.
Од МВР информираа дека вториот приведен е В.Т.(36) од Скопје.
Претходно Обвинителството објави дека приведен е 26-годишен скопјанец кој учествувал во кражбата.
Со тоа, двајцата се сомничат дека на 1 април провалиле во затворен маркет на улицата Востаничка во Скопје, одзеле метален сеф во вредност од 12.000 денари, дневен промет во износ од 228.000 денари и цигари вредни 45.000 денари, или сѐ во вкупна вредност од 285.000 денари.
ОД МВР информираа дека судија на претходна постапка на едното лице му определи мерка притвор.
Македонија
Битиќи: Просечната пензија ќе ја зголемиме на 30.000 денари
„Просечната пензија ќе биде 30.000 денари, што е зголемување од скоро 9.000 денари или над 40% до 2028 година. Овие покачувања ќе се случат како резултат на новата методологија за пресметка на пензиите која оваа Влада ја воведе со измена на Законот за пензиско и инвалидско осигурување. На овие покачувања, новата Влада предводена од СДСМ ќе обезбеди и новогодишен пакет од 6.000 денари за секој пензионер“, изјави Фатмир Битиќи, коносител на листа на кандидати за пратеници од Изборна единица 2, на „Коалицијата за европска иднина“.
Зброувајќи за зголемување на минималната пензија, Битиќи истакна дека во следниот мандат истата ќе се зголеми на ниво од 20.000 денари, што би било зголемување од 45% до 2028 година.
Битиќи посочи дека во изборната програма предвидено е и енергетски додаток во износ од 1.500 денари за секој пензионер во периодот од октомври до март, односно во времетраење на грејната сезона, со што, како што рече тој, ќе го заштитиме стандардот на нашите највозрасни сограѓани.
„Ова значи дека секој наш пензионер ќе добива по 15.000 денари дополнително годишно, надвор од редовното покачување на пензијата која му следува по закон“, рече Битиќи.
Тој потсети дека минималната пензија во 2016 година изнесуваше 8.900 денари и истата е зголемена за 5.000 денари, и сега изнесува 13.900 денари, што е зголемување за 55% за период од седум ипол години.
„Просечната пензија која во 2016 година изнесуваше 13.800 денари, ја покачивме за 7.600 денари и сега таа изнесува 21.400 денари, или тоа е раст од 55%“, рече Битиќи и истакна овие достоинствени покачувања на пензиите се постигнати и ќе продолжат да се постигнуваат со домаќинско менаџирање со фондот за ПИОМ.
„Тотална спротивност се празните ветувања на ВМРО кое свесно им ветува зголемување од 5.000 денари, кое никогаш нема да се случи, затоа што ни самиот фонд за ПИОМ, ниту централниот буџет може да го понесе товарот од дополнителни 330 милиони евра годишно, за да се оствари ова ветување“, рече Битиќи, притоа порачувајќи дека „Коалицијата за европска иднина“ предводена од СДСМ носи напред, домаќински раководи со државниот буџет и се грижи за сите граѓани.
„Пензионерите да се мирни, бидејќи ние мислиме за нивниот удобен и достоинствен живот“, порача од пред пензионерскиот дом во Чаир Фатмир Битиќи, коносител на листа на кандидати за пратеници од Изборна единица 2, на „Коалицијата за европска иднина“.
Македонија
Митрески: Повисоки пензии, енергетски пакети и зимски регрес, пензионерите заслужуваат подобар стандард
„СДСМ се грижи за сите граѓани, особено за пензионерите. Преку конкретни политики обезбедивме економска сигурност и подобрен животен стандард. Минималната и просечната пензија пораснаа за 50 проценти, обезбедивме континуиран раст на пензиите. Го стабилизиравме Пензинскиот фонд, обезбедивме сигурност“, изјави Јован Митрески, носител во ИЕ 5 од Коалицијата за европска Македонија, предводена од СДСМ.
Тој додаде дека во време на Ковид кризата пензиите беа исплаќани и предвреме со цел да се заштити здравјето на пензионерите. Во таа насока, нагласи Митрески, зајакнат е здравствениот сикстем, реновирани се повеќе клиники и ургентни центри низ државата, а 80 проценти од градежните зафати од реконструкцијата во Специјалната болница за ортопедија и трауматологија „Св. Еразмо“ се завршени.
„Во новиот мандат гарантираме минимална пензија од најмалку 20.000 денари, а просечната ќе достигне 30.000 денари. Ќе воведеме енергетски пакети за пензионерите кои живеат сами, во висина од 1.500 денари месечно во периодот од октомври до март, како и зимски регрес за пензионерите, во износ од 3.000 до 6.000 денари. Највисока поддршка ќе има за пензионерите со пониски пензии“, изјави Митрески и додаде дека ќе се градат и нови домови за стари лица.
Митрески истакна дека ни треба системски пристап, мерки кои се одржливи и кои даваат резултати, а не популистички и наменски решенија, кои само го уриваат системот.
Тој ги повика граѓаните на 24 април и на 8 мај да ја поддржат Коалицијата за европска Македонија, предводена од СДСМ која има План има визија и знае како.