Македонија
Пожарот кај Сарај тешко се гаси поради корењата на дрвјата
Пожарот што повеќе дена гори во општина Сарај е специфичен пожар, затоа што откако ќе биде изгаснат површински, продолжува да горат корењата на дрвјата подземно и повторно доаѓа до активирање на пожарот, велат од Центарот за управување со кризи.
Од тие причини во текот на вчерашниот ден 10 припадници на полициската специјална едниница, придружени со француските инструктори, се спуштија од врвот на планината кон подножјето, при што рачно беа изгасени сите оние жешки точки коишто беа видливи, но пожарот во текот на ноќта повторно се активира.
Од ЦУК информираат дека за утре е договорено на терен да излезат 30 припадници на специјалната полициска единица заедно со француските експерти коишто работат со специјални дронови за пожари со термални камери кои можат да го откријат огнот кој е под земја.
Од утрово во гасењето на овој пожар дејствуваат два хеликоптера.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Сончево и топло време со температура до 27 степени
Времето денес ќе биде сончево и топло со мала локална облачност. Ќе дува слаб ветер од јужен правец.
Минималната температура ќе биде во интервал од 2 до 9, а максималната ќе достигне од 20 до 27 степени.
Во Скопје сончево и топло со слаб ветер од јужен правец.
Минималната температура ќе се спушти до 5, а максималната ќе достигне до 25 степена, јавува УХМР.
Во наредните денови следува период на сончево и топло време со пораст на температурата кон викендот. Утринските температури ќе бидат постојано над нулата, а поголемо наоблачување со услови за појава на дожд се очекува на почетокот на следната недела и ќе биде проследено со умерено спуштање на температурата.
Македонија
Нема подолги задржувања за влез и излез од државата
Сообраќајот на државните патишта се одвива непречено, по суви коловози, извести АМСМ.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Скопје
Без струја дел од Карпош
Регионалниот центар за управување со кризи на Град Скопје, по добиеното известување од ЕВН, информира дека, поради технички зафати во електродистрибутивната мрежа, без електрична енергија ќе остане дел од Карпош.
Од 9 до 14.30 часот корисниците од улицата Мексичка, улицата Хаванска и дел од улицата Варшавска во општина Карпош ќе бидат без струја.