Македонија
Портокалова кампања против насилството врз жени и девојчиња – 16 дена активизам #НемаОправдување
На Меѓународниот ден за елиминација на насилството против жените, со официјален настан во Паркот на жената борец, денеска, од 19 часот, ќе се означи почетокот на годинешната кампања со слоган „#НемаОправдување – заедно против насилството врз жените и девојчињата“.
Со настанот почнуваат и другите активности што ќе се реализираат во текот на глобалната кампања „16 дена активизам против родово базирано насилство“, што ќе трае до Меѓународниот ден на човековите права, 10 Декември.
Во светски рамки, една од три жени е жртва на насилство. Насилството врз жените и девојчињата постои во разни форми, во кои влегуваат разните психички и физички акти на насилство, кои се случуваат секој ден. Цел на кампањата е да поттикне дискусија, споделување и активно вклучување во борбата против насилството врз жените и девојчињата.
Замислена е да ја рефлектира темата „Обојте го светот во портокалово: Генерацијата еднаквост зазема став против силувањето“, а како носечки симбол на овој настан е целосното портокалово осветлување на Паркот на жената борец. Портокаловата боја е избрана како симбол за посветла иднина, без насилство врз жените, и таа боја е основа за целата кампања, која ќе трае 16 дена.
На настанот ќе присуствуваат многубројни високи владини претставници, како и претставници на мисиите на ОН, Европската Унија и ОБСЕ во Северна Македонија, кои ќе им се обратат на присутните истакнувајќи ја важноста од поактивно вклучување на сите институции и воопшто генералната јавност во борбата против разните форми на насилство врз жени и девојчиња.
Планираните активности за 16-те дена активизам вклучуваат кампања на социјалните медиуми, со објавување разни содржини и едукативни пораки против насилство од разни луѓе, од разни сфери на животот, како нивен знак на поддршка и организирање низа активности, како и дебати и работилници во целата држава.
Следете го хаштагот #НемаОправдување и приклучете се кон единствената цел – општество без насилство врз жени и девојчиња.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Во прв круг за претседател е избран само Киро Глигоров со освоени 715.087 гласа, Силјановска-Давкова и Пендаровски вторпат одат во втор круг
По вчерашниот прв круг од седмите претседателски избори, Киро Глигоров остана единствениот претседател избран во прв круг од осамостојувањето до денес. На првите претседателски избори во 1994 година Глигоров како кандидат на СДСМ освои 715.087 гласа или 78,4 отсто. Негов противкандидат тогаш беше Љубиша Георгиевски од ВМРО-ДПМНЕ, кој освои 197.109 гласа или 21,6 отсто.
На изборите во 1994 година Глигоров го доби вториот претседателски мандат. Првиот го доби од Собранието на 27 јануари 1991 година, само два дена откога беше изгласана декларацијата за сувереност на државата. На овие избори имаше само двајца кандидати за претседател.
Во 1999 година, на вторите претседателски избори, за претседател беше избран Борис Трајковски, кандидат на ВМРО-ДПМНЕ, во вториот круг. Трајковски во првиот круг имаше помалку гласови од противкандидатот Тито Петковски. Трајковски доби 219.098 гласа или 21,1 отсто, а Петковски 343.606, односно 33,1 отсто, но во вториот круг си ги заменија местата и Трајковски победи со 582.808 гласа, што сочинуваа 53,2 отсто. Петковски во вториот круг освои 513. 614 гласа или 46,8 отсто.
Покрај Трајковски и Петковски, кандидати за претседател беа и Васил Тупурковски од Демократската алтернатива, Муарем Неџипи од Демократската партија на Албанците, Стојан Андов од Либералната партија и Мухамед Халили од Партијата за демократски просперитет.
На третите претседателски избори во 2004 година за претседател во вториот круг беше избран Бранко Црвенковски од СДСМ. Во првиот круг тој освои 385.347 гласа, односно 42,5 отсто, а во вториот круг доби 550.317 гласа или 62,6 отсто. Негов противкандидат во вториот круг беше Сашко Кедев од ВМРО-ДПМНЕ, кој во првиот круг доби со 309.132 гласа, односно 34,1, а во вториот круг за него гласаа 329.179 граѓани, односно 37,4 отсто.
На овие избори имаше уште двајца кандидати, Гзим Острени од Демократската унија за интеграција, формирана две години претходно, и Зуди Џелили од Демократската партија на Албанците.
Претседателските избори во 2009 година, четврти по ред, имаа седуммина кандидати, исто како и сегашните. За претседател во вториот круг беше избран Ѓорге Иванов со освоени 453.616 гласа или 63,14 отсто. Во првиот круг Иванов освои 345.850 гласа. Неговиот противкандидат Љубомир Фрчкоски во првиот круг освои 202.691 (20,54 %), а во вториот 264.828 гласа или 36,86 отсто. Во првиот круг поразени беа Имер Селмани од Нова демократија, Љубе Бошкоски како независен кандидат, Агрон Буџаку од Демократската унија за интеграција, Нано Ружин од Либерално-демократската партија и Мируше Хоџа од Демократската партија на Албанците.
Во 2014 година, на петите претседателски избори, кога првпат за претседател се кандидира Стево Пендаровски, Ѓорге Иванов го доби вториот мандат, повторно во вториот круг. Во првиот круг тој освои 448.303 гласа (51,65 %), а во вториот беше избран со 534.910 гласа (55,28 %). Пендаровски во првиот круг освои 326.069 гласа (37,57 %), а во вториот 398.076 (41,14 %). На овие избори имаше четворица кандидати. Покрај Иванов и Пендаровски, кандидати беа Зоран Поповски од ГРОМ и Халими Илјаз од Демократска партија на Албанците.
Гордана Силјановска-Давкова првпат се појави како претседателски кандидат на изборите во 2019 година. И, тогаш, како и сега, нејзин противкандидат беше Стево Пендаровски. Тој победи во вториот круг со освоени 435.656 гласа (51,65 %). Во првиот круг Пендаровски имаше 322.581 глас (42,81 %).
Силјановска-Давкова во првиот круг на претходните избори освои 318.341 глас (42,25 %), а во вториот имаше 377.446 гласа (44,75 %). Заедно со нив кандидат за претседател беше Блерим Река од Алијансата за Албанците и Движењето Беса, но не влезе во вториот круг.
По првичните и сѐ уште неофицијални резултати од вчерашните избори, Силјановска-Давкова и Пендаровски вторпат ќе се борат за функцијата претседател на државата во вториот круг. Силјановска-Давкова вчера освои 362.847 гласа или 40,08 отсто, а Пендаровски е зад неа со освоени 180.386 гласа, односно 19,93 отсто од граѓаните што излегоа на гласање.
По првиот круг отпаднаа Стевчо Јакимовски од ГРОМ, Бујар Османи од Демократската унија за интеграција, Билјана Ванковска-Цветковска, поддржана од Левицата, Арбен Таравари, кандидат на коалицијата „Влен“ и Максим Димитриевски од ЗНАМ.
Вториот круг од седмите претседателски избори ќе се одржи на 8 мај заедно со парламентарните избори.
Македонија
(Видео) Стојаноска од Јегуновце: Оваа криминална власт вчера го доби жолтиот картон, а црвениот ѝ следува на 8 мај
Од победничко Јегуновце, најпрво се заблагодарувам и им честитам на сите граѓани на Република Македонија, особено на тие од изборната единица шест, затоа што вчера ја направија Македонија горда, кажа Дафина Стојаноска, носител на ВМРО-ДПМНЕ во изборната единица 6.
„Вчерашниот датум, 24 април, оваа криминална власт го доби жолтиот картон, а црвениот и следува на 8 мај.
Денес продолжуваме со стисок на рака повеќе и барање на глас повеќе, заедно да се обединиме против криминалот“, порача таа.
Ова политичко зло, како што рече, „да го испратиме во пензија и Македонија повторно да ја направиме ваша и повторно горда“.
Македонија
Милица Џаровска се прости од својот татко: Не ти кажав, ама ти знаеше дека ми беше идол
Велибор Џаровски-Џаро, познатиот менаџер, почина денес на 75-годишна возраст по кратко боледување, а веста за неговото заминување ја објави ќерка му Милица.
„Чао, Благојче мој, знам дека и горе ќе се снајдеш и ќе најдеш некоја сигурица за играње. Не ти кажав, ама ти знаеше дека ми беше идол“.
Тој зад себе ги остави сопругата Виолета, внуците Лара и Лука, но и единствената ќерка Милица, позната естрадна новинарка. Таа минатата година ја издаде книгата „Живот на коцка“, која му ја посвети токму нему.
Џаро соработуваше со најголемите југословенски естрадни ѕвезди, како Здравко Чолиќ, Мишо Ковач, Маја Оџаклиевска, Оливер Драгоевиќ, „Бјело дугме“, Тереза Кесовија, Лепа Брена.
Беше познат и како крал на местенките во фудбалот.