Македонија
Почна изградбата на нова водоводна мрежа во Нерези
ЈП „Водовод и канализација“ – Скопје и Општина Карпош почнаа изградба на нова улична секундарна водоводна мрежа низ локалитетот Средно Нерези. Со нејзина реализација ќе се напушти од употреба постојната мрежа, која е од несоодветен материјал и профил, која поминува низ дворовите на постојните објекти и која, генерално, била градена самостојно од самите жители на овој локалитет, без почитување на постапката за нејзина реализација поради што и не била евидентирана од страна на ЈП „Водовод и канализација“ – Скопје.
„Со желба да им се излезе во пресрет на барањата на жителите од овој локалитет, сега ние заедно со Општина Карпош почнувме активности за докомплетирање на постојниот водоводен систем за Средно Нерези на начин што ќе овозможи поквалитетно водоснабдување за жителите“, изјави Душко Весковски, генерален директор на ЈП „Водовод и канализација“ – Скопје.
Имено, ќе се пристапи кон реконструкција на постојната водоводна мрежа на улиците од локалитетот (улици што се предвидени со планска документација) кон дооформување на циркулациони прстени и, секако, реализација на приклучоците за секој од објектите што се заведени како корисници на услугите на претпријатието.
Општина Карпош ја нарача изработката на основниот проект за улична водоводна мрежа низ локалитетот Средно Нерези, а ЈП „Водовод и канализација“ – Скопје го ревидира проектот. Техничкото решение дадено во проектот предвидува поврзување на проектираната улична мрежата и краците со постојна водоводна цевка Ø100 мм, која излегува од хидрофорската станица во Средно Нерези. Во проектот е предвидена изградба на нови 14 крака со полиетиленски цевки PE – 100/RC тип 3 со профил Ø 110 mm и вкупна должина од 2.500,00 м.
„Вкупната инвестиција за изведба на секундарната водоводна мрежа во високата зона во населбата Средно Нерези, во согласност со проектно-техничката документација, изнесува 14.423.660,00 денари. Имајќи предвид дека реализацијата на проектот е заедничка инвестиција на ЈП ‘Водовод и канализација’ – Скопје и Општина Карпош, во согласност со договореното, набавката и монтажата на потребниот материјал ќе биде обврска на ЈП ‘Водовод и канализација’ – Скопје и е во вредност од 7.058.820,18 денари. Изведбата на градежните работи – ископот и враќањето во првобитна положба на ископините – ќе бидат покриени од страна на Општина Карпош во вредност од 7.364.839,05 денари“, посочи Весковски на денешната прес конференција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Јакимовски: Најголема шета и’ се прави на Македонија ако не се излегува да се гласа
Кандидатот за претседател, Стевчо Јакимовски го оставри своето право на глас, порачувајќи дека најголема шета и’ се прави на Македонија ако не се излегува да се гласа.
„Многу сум среќен дека денеска гласаме за наш претседател, ниту за српски, ниту за бугарски, ниту за грчки претседател. Вечна слава нека им е на АСНОМ-ците кои ги удрија темелите на современата македонска држава и го остварија вековниот идеал на македонскиот народ“, рече Јакимовски.
Тој по гласањето додаде дека е точно оти оваа држава не е совршена, но сите сме одговорни за тоа каква држава имаме.
„Еден апел до граѓаните на Република Македонија: Излезете да гласате. Најголема шета се прави на Република Македонија ако не се излегува да се гласа и втората замолница е да се излезе да се гласа „за“, а не „против“. Секогаш кога гласаме против некого секогаш правиме грешки и тие грешки повторно се на штета на државата. Затоа, почитувани граѓани, излезете и дајте го гласот за оној којшто мислите дека ќе биде најдобар претседател, најдобар врховен командант на вооружените сили на Република Македонија“, порача Јакимовски.
Македонија
(Видео) Пендаровски: Држава што преговара со ЕУ не смее да си дозволи лош изборен процес
Кандидатот за претседател, Стево Пендаровски, денеска гласаше на првиот круг од претседателските избори.
Во изјава за медиумите Пендаровски истакна дека очекува мирен изборен процес, не само денеска, туку и на 8 мај кога ќе се одржат вториот круг на претседателските и парламентарните избори.
„Тоа е исклучително важно, не толку за индивидуалните кариери на секој од нас кандидатите кои сме на овие претседателски избори, тоа е исклучително важно за целата држава, за Македонија, бидејќи држава која преговара со Европската Унија не смее да си дозволи лош изборен процес. Имаме долго искуство во таа смисла, повеќе од 30 години сме независна држава, имаме поминато многу изборни циклуси и јас се надевам дека како и минатиот пат, така и сега тоа ќе биде со запазување на највисоките европски и меѓународни стандарди“, рече Пендаровски.
Македонија
Во Куманово не се гласа на три избирачки места, на едното се изгубил печатот
Прекин на гласањето има на три места во Куманово, информираше претседателот на Државната изборна комисија (ДИК), Александар Даштевски.
Како што појасни, на едното бил изгубен печатот. На останатите две, биле направени обиди да се замени уредот за биометриска верификација, пришто гласањето во едниот случај продолжило па прекинало, а во вториот не продолжило.
„Тоа се трите места за коишто имаме добиено писмено известување. Ќе видиме вечер за што точно се работи и ќе одлучиме“, рече Даштевски, одговарајќи на новинарски прашања.
Од ДИК појаснуваат дека се работи за прекин за повеќе од три часа, додека онаму каде што имало помали прекини, гласањето ќе се продолжи за онолку време колку што било прекинато.
На сите останати гласачки места, гласањето тече нормално и мирно, додаваат.
Пред полноќ се очекува да бидат обработени над 50 отсто од гласовите и ДИК да ги објави првичните неофицијани резултати.
Во однос на информациите за починати луѓе на избирачкиот список од ДИК обазложија дека оние коишто ќе починат 30 дена пред гласњето ги има на избирачкиот список, бидејќи тој е веќе заклучен. Велат дека списокот се ажурира неколкупати годишно во координација со Управа за водење на матични книги.