Македонија
Прв ден од работната посета на Димитров на Брисел
Mинистерот за надворешни работи, Никола Димитров, денеска, во Брисел, се сретна со еврокомесарот Јоханес Хан и со шефот на кабинетот на претседателот на Европскиот совет, Пјотр Серафин.
На средбата во Европската комисија со комесарот за соседска политика и преговори за проширување, Јоханес Хан, се разговараше за последните внатрешнополитички случувања и постигнувањата во реформските области во земјата во пресрет на евроинтегративната перспектива на Република Северна Македонија. Министерот Димитров ја реафирмира посветеноста на европските вредности изразувајќи уверување дека во октомври земјите членки ќе ја препознаат и валидираат со позитивна одлука за почеток на пристапните преговори. Од страна на еврокомесарот беше потенцирано дека земјата ги исполни очекувањата на тој план, со што изгледите за добивање позитивна одлука за почнување пристапни преговори со ЕУ се повеќе од реални.
„Останува уште малку време до моментот што ќе може да се смета не само за заеднички успех туку и испишување на историја со предзнак иднина. Овде сум за да уверам дека позитивната одлука во октомври е заслужена и најдоброто решение за иднината на Северна Македонија, на регионот, но и во интерес на самата ЕУ“, рече Димитров.
Тој му ја честита номинацијата за новата функција на комесарот Хан во идната Европската комисија.
Во контекст на евроинтеграциите на средбата се разговараше и со Пјотр Серафин, шеф на кабинетот на Доналд Туск, на која беа разменети мислења за процесот на донесување одлука на Советот на ЕУ во октомври и во таа пригода беа уште еднаш изнесени нашите очекувања за недвосмислено „да“.
По средбите, попладнево, Димитров ќе се обрати на приемот што по повод на Денот на независноста, 8 Септември, го организираат дипломатско-конзуларните претставништва на Република Северна Македонија во Брисел.
Посетата на Брисел продолжува утре со работна средба со амбасадорите на земјите членки при Европската Унија (КОРЕПЕР). Министерот ќе учествува и на настан организиран од страна на German Marshall Fund во Брисел, посветен на патот на Република Северна Македонија кон европската и евро-атлантската интеграција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Спречени 3.000 вработувања и унапредувања предложени од техничката Влада
Управниот суд ги поништи решенијата за вработување и унапредување на над 3.000 вработени во Министерството за финансии и јавниот сектор бидејќи се прекршил Законот за техничката влада, соопшти заменик-министерката за финансии, Елена Петрова.
Како што вели, иако одлуките морало да бидат одобрени со нејзин потпис, како што предвидува Законот за техничката влада, министерот Бесими ги потпишал сам.
„Незаконити се одлуките на министерот за финансии и државниот секретар во Министерството за финансии по спроведените постапки за вработување и унапредување во Министерството за финансии, како и одлуките на министерот за финансии за давање согласности за вработување во јавниот сектор, сите донесени по формирањето на преодната Влада за организирање на изборите. Ова е потврдено со судски одлуки. Вишиот управен суд донесе две пресуди во моја корист, со кои ги поништи како незаконити одлуките на ДИК, кои беа донесени врз основа на барање на Министерството за финансии“, рече Петрова и додаде:
„Со поништувањето на одлуките на ДИК сите наведени акти поврзани со вработување во Министерството, кои не се потпишани со врзан потпис на министерот за финансии и на дополнителниот заменик-министер, не произведуваат правно дејство. Тоа се однесува и на издадените согласности за вработувања по сите основи во целиот јавен сектор, како и почнатите постапки врз основа на тие согласности“.
Македонија
Македонската армија ѝ се заблагодари на Норвешка со знамето на Исланд
Од Армијата на Македонија ги измешаа знамињата на Норвешка и Исланд.
Во благодарноста на „Фејсбук“ триесетина минути стоеше, наместо норвешкото, знамето на Исланд.
„Моторните возила од Кралството Норвешка веќе се на својата крајна дестинација. По нивното распоредување, армиските единици ќе добијат поголема транспортната способност и мобилност“, напишаа од македонската Армија.
Македонија
Македонката Светлана Мојсов меѓу 100-те највлијателни личности во светот според магазинот „Тајм“
Македонката Светлана Мојсов, светски познат научник, чие истражување за хормоналните предизвикувачи за производство на инсулин доведе до револуционерни третмани за дијабетес и дебелина, е меѓу 100-те највлијателни личности во светот за годинава, според најновиот избор на американскиот магазин „Тајм“.
Таа се најде во овој престижен избор заедно со уште двајца научници, Џоел Хабенер и Ден Дракер, во сегментот „Пионери“, меѓу други влијателни личности, како Америка Ферера, Лесли Локо, Офелија Дал, Кенеди Одеде и други.
Како што пишува Алис Парк, виш дописник на „Тајм“, во образложението за изборот на Мојсов, Хабенер и Дракер, појавата на ефикасни лекови за слабеење, како што е „вегови“ (Wegovy), е кулминација на долгогодишната тимска работа.
Научниците во Европа и во САД, кои први работеа на лековите за дијабетес, направија критична врска помеѓу инсулинот и инкретините, дел од семејството цревни хормони, познати како глукагони, со што им помогнаа да разберат како да управуваат со нивото на шеќерот во крвта и тежината.
Во годинашната листа на магазинот „Тајм“ во категоријата највлијателни лидери се сопругата на починатиот руски опозиционер, Јулија Навални, кинескиот премиер Ли Џијанг, полскиот премиер Доналд Туск, аргентинскиот претседател Хавиер Милеи и италијанската премиерка Џорџа Мелони меѓу лидерите.
Покрај нив, помеѓу највлијателните лидери се и бразилската министерка за животна средина и климатски промени, Марина Силва, директорот на ЦИА, Вилијам Барнс, и шефот на кабинетот на украинскиот претседател, Андриј Јермак.
Во изборот на највлијателните личности на американскиот весник се најдоа и јапонскиот режисер Хајао Мијазаки, британската пејачка со албанско потекло, Дуа Липа, британскиот актер Дев Пател и австралиската пејачка Кајли Миног.