Македонија
Прилеп 17. пат им оддаде почит на хероите од Карпалак
Прилеп и Македонија 17. пат им оддадоа почит на хероите, на десеттемина прилепски бранители – Сашо Китаноски, Нане Наумоски, Веби Рушидоски, Горан Миноски, Бранко Секулоски, Љубе Грујоски, Ердован Шабаноски, Марко Депотоски, Пеце Секулоски и Дарко Вељаноски, припадници на резервниот состав на АРМ, кои на 8 август 2001 година кај месноста Карпалак, на патот Скопје-Тетово, ги положија своите животи на браникот на слободата во одбрана на интегритетот и суверенитетот на Република Македонија.
Изутрината делегација од Владата, од Општина Прилеп, од здруженијата на бранители, семејствата и граѓани положија свежи цвеќиња оддавајќи им почит на загинатите бранители на местото на убиството. Градоначалникот Илија Јованоски, претседателот на Советот, Миле Талевски, и членови на Советот на Општина Прилеп, положија свежи цвеќиња и почит им оддадоа на загинатите бранители на нивните вечни почивалишта, а потоа присуствуваа на панихидата за загинатите во црквата „Света Петка“.
Делегации од кабинетот на претседателот, Собранието и Министерството за одбрана и од Генералштабот на АРМ положија свежи цвеќиња пред спомен-плочата во центарот на градот Прилеп. Делегација предводена од градоначалникот Илија Јованоски, од претседателот на Советот, Миле Талевски, од здруженијата „Карпалак“, „Прилепски бранители“, Здружението на резервните обврзници, учесници во настаните од 2001 и 2002 година, многубројни здруженија на бранители од многу градови во Македонија, од општинската организација на Сојузот на борците, се поклонија и им оддадоа почит на прилепските херои од современата историја на Македонија.
Пред спомен-плочата се поклонија семејствата на загинатите бранители полагајќи венци и свежи цвеќиња.
„Десеттемина бранители, кога ѝ беа потребни на државата, застанаа храбро на браникот на слободата, ги положија животите, ја вградија саможртвата во иднината на оваа земја. Овде, пред спомен-плочата, пред споменикот ‘Карпалак’ како паметник и потсетник за нивното дело, за влогот и загубата на нивните семејства, на градот и државата, заедно да застанеме на страната на иднината, против сите темнини, зла и несреќи што со себе ги носат воените конфликти. Оваа колективна жртва на Прилеп од 2001 нека биде опомена и порака со преговори и во мир и слобода да ги решаваме сите отворени прашања на патот на политичката битка по кој чекориме и денес. Како народ судбоносно сме исправени пред искушенија и постојано пред нови битки. Но, целта ни е трасирана и веќе чекориме кон НАТО и Европската Унија. Да ги тргнеме заканите и злото, да го направиме последниот исчекор што ќе значи заокружување на вековната битка што ја води државата за да се вгради во сите современи европски текови за да биде рамноправна членка на европското семејство“, порача градоначалникот Јованоски.
Пред спомен-плочата цвеќиња положија и делегации од: ЈКП „Водовод и канализација“, ЈКП „Комуналец“, ЈКП „Пазари“, ЈП за ПУП од Прилеп. Меѓу многуте беа и делегациите од политичките партии: ОО на СДСМ, на НСДП, ВМРО-Народна партија, ОК на ВМРО-ДПМНЕ, ИК на ВМРО-ДПМНЕ, Социјалистичка партија, Нова либерална партија, Локалниот клуб на младите од СДСМ, како и на Унијата на млади сили на ВМРО-ДПМНЕ од Прилеп.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Инспекторатот ќе контролира дали работодавците ја почитуваат владината одлука за неработен ден
Државниот пазарен инспекторат им укажува на сите работодавци дека во согласност со заклучокот на техничката Влада деновите на изборите – 24 април 2024 година (среда) и 8 мај 2024 година (среда) – се неработни за сите граѓани.
„Работодавците во наведените денови не треба да извршуваат дејност со исклучок на оние кај кои работните процеси поради својата природа не може да се прекинат“, порачаа од Инспекторатот.
За наведените денови, Државниот пазарен инспекторат ќе воведе дежурства и преку државните пазарни инспектори ќе контролира дали заклучокот на техничката Влада се почитува од страна на работодавците.
Македонија
ДИК објави упатство за гласање на претседателските избори
Пред утрешното гласање на првиот круг од претседателските избори, Државната изборна комисија (ДИК) на својата официјална веб-страница објави повеќејазично упатство за гласање.
УПАТСТВО ЗА ГЛАСАЊЕ ЗА ПРЕТСЕДАТЕЛСКИ ИЗБОРИ
1. Гласањето се врши лично на гласачките места во Република Северна Македонија и во ДКП/КК.
2. Избирачкиот одбор на гласачите им го објаснува начинот на гласање и им овозможува да гласаат.
3. Гласачот може само еднаш да се појави на гласачкото место за остварување на своето избирачко право.
4. Гласачот го приложува документот за лична идентификација – важечка лична карта или патна исправа, односно лична
карта или патна исправа чија важност истекла во периодот од 24 јули 2023 до 24 април 2024 година.
5. Гласачот става отпечаток од показалецот од десната рака на уредот за биометриска идентификација, а доколку
гласачот нема десен показалец се зема отпечаток од показалецот од левата рака или во случај на гласачот да му
недостигаат овие два прста се зема отпечаток од наредниот прст од десната рака.
6. Доколку гласачот нема две раце гласачот се внесува во техничката опрема со пребарување преку неговиот единствен
матичен број (ЕМБГ).
7. Доколку УБИГ не може да најде совпаѓање на отпечатокот од прсти со отпечатокот од прсти на гласачот во
електронскиот избирачки список, гласачот се внесува во УБИГ преку отчитување на личниот документ на МРЗ скенерот
или преку внесување на единствениот матичен број (ЕМБГ), а потоа гласачот става отпечаток од прст на УБИГ.
8. По потврдувањето на идентитетот, гласачот го става својот потпис во изводот од Избирачкиот список.
9. Гласачкото ливче се откинува од кочанот по нумерички редослед, му задолжително се става печат на предната страна
на местото определено за печат и потоа му се дава на гласачот.
10. Гласачот добива едно гласачко ливче.
11. Гласачот гласа сам, тајно зад гласачки параван.
12. Гласачот гласањето го врши на тој начин што го заокружува редниот број пред називот/името на листата со хемиско
пенкало со мастило во сина боја.
13. Превитканото гласачко ливче гласачот го става во гласачката кутија.
14. Гласачот го подигнува документот за лична идентификација.
15. Гласач кој има физички недостаток или е неписмен и поради тоа не може да гласа на начин утврден со Изборниот
законик, со себе има право да доведе лице кое ќе му помогне при гласањето. Ако не доведе со себе лице кое ќе му
помогне при гласањето, тогаш избирачкиот одбор ќе определи друго лице од редот на гласачите. Лицето не смее да
влијае врз одлуката на гласачот.
16. Забрането е семејното и групното гласање, како и гласањето за друго лице.
17. Забрането е фотографирање на гласачкото ливче со мобилен телефон или апарат за фотографирање.
18. Забрането е носење оружје на гласачкото место.
Македонија
Беќаровски навести дека си оди од Токсикологија: Дон Кихот, конечно, го напушта оклопот
Доктор Нико Беќаровски навести дека ќе си замине од Клиниката за токсикологија.
Во статус на социјалните мрежи Беќаровски порача дека е време на приватните клиники да се отвори одделение за детоксикација и клиничка токсикологија.
„35 години бев најголем борец за здрав јавен здравствен сектор. Дон Кохот, конечно, го напушта оклопот. Време е во некоја од приватните болници да се отвори одделение за детоксикација и клиничка токсикологија. Бројот на консументи на психоактивни супстанции секојдневно расте“, пишува Беќаровски.
Ова се случува откако вчера на прес-конференција заедно со уште пет докторки од стручниот колегиум на Клиниката за токсикологија јавно ја прозваа економската директорка на Клиниката за токсикологија, Бесија Иљази, дека не дозволува вработување на двајца дипломирани биолози и еден болничар. Наместо, тоа, таа инсистира да се вработат осумнаесетмина на кои им истекле договорите за дело, а меѓу нив има лица што немаат соодветно образование.
Беќаровски, кој е раководител на Одделението за интензивна нега на Клиниката, рече дека едниот од нив, болничар, вршел притисок врз лаборант – барал урина во која имало наркотици да биде сменета со урина која е чиста, ама лаборантот не прифатил.
За образованието на Иљази лекарите не знаат ништо, ниту за познавањето јазици – со оглед на тоа што македонскиот не го зборува, а Беќаровски се обидел да комуницира со неа на англиски јазик.
Министерот за здравство, Илир Демири, најави разрешување на медицинскиот директор на Клиниката за токсикологија, д-р Данил Петровски, но не и на економската директорка бидејќи немал сознанија за прекршок.