Македонија
(Видео) Протест против загадувањето во Автокоманда: „Доста ни е од ветувања и акциски планови“
Жителите на Автокоманда и Гази Баба со транспаренти во раце на кои пишуваше „Доста ја гушите Гази Баба. Автокомада сака да дише. Најстроги казни за загадувачите“, јавно ги повикаа надлежните интитуции да излезат на терен и да се уверат во состојбата со загадениот воздух во оваа населба, а инспекторите да започнат со изрекување казни на големите загадувачи.
Велат доста им е од ветувања и акциски планови, бараат акција и резултати веднаш.
„Овде во Автокомада имаме индустриска зона со голем број фабрики. Надлежните нè убедуваат дека тие имаат прочистувачи и дека сè е по закон. Но, ги прашуваме дали излегле да проверат и да видат дали е сè во ред. Мерната станица повеќе од една година не работи, а згора на сè во план е да отворат фабрика за тешка индустрија со која Автокоманда и Железара дополнително ќе се трујат. Нема да го дозволиме тоа. Бараме надлежните веднаш да реагираат. Доста ни е од ветувања и планови на хартија“, порача Соња Стаменковска од иницијативниот одбор на денешниот протест.
Жителите на оваа населба велат дека дополнително населбата се гуши со новоизградени објекти, нема доволно зеленило, а дрвјата се исечени.
„Срамота е ова што го прават, секој ден гледаме само ѕидаат катови и катови. Го уништија зеленилото, ги исекоа дрвјата. За ситни бизнис-интереси ги жртвуваат граѓаните. Автокоманда е најзагадената општина, полна со ѓубре и депонии“, вели револтирана жителка.
„И едните и другите што доаѓаат на власт истото ни го прават. Пред избори ни ветуваа дека ќе ги решат нашите проблеми, а ни се ставени уште на полошо дереџе. Само погледнете во болниците колку луѓе има заболени како резултат на загадувањето. Чистиот воздух е основно човеково право“, додава друг револтиран жител.
На протестот се појави и градоначникот на општина Гази Баба, Борче Георгиевски, кој рече дека локална самоуправа нема многу ингеренции за решавањето на проблемот, но најави дека ќе се заложи да ги искоординира надлежните инспекторати и Министерството за животна средина.
Во однос на новите градби, Георгиевски рече дека тие биле согласно ГУП кој сè уште е на сила и дека тие согласно требало да се реализираат.
„Како градоначалник дојдов да дадам поддршка на жителите што со право протестираат. Ќе ги информирам сите надлежни институции, особено за профункционирање на мерната станица, а наскоро ќе излезе и катастарот во кој се мапирани сите загадувачи на оштината. Покрај индустриската загаденст имаме проблем и со палење диви депонии и навистина имаме проблем да се справиме со дивите загадувачи“, објаснува Георгиевски.
На граѓаните од Автокоманда им се придружија и советниците од ВМРО-ДПМНЕ кои обвинија дека несоодветно се спроведува планот за поставување прочистувачи во основните училишта и градинки. Најавија дека ќе има јавна трибина на нивна иницијатива заедно со граѓани, експерти и надлежните институции.
Граѓаните на Автокманда од протестот порачаа дека ова е предупредувачка мерка и доколку не се огласат посочените институции за решавање на проблемите, најавија помасовни протести со блокади на крстосници и институции.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
„Властите во Бугарија продолжија да негираат регистрација на етничко-македонски активистички групи“, се наведува во извештајот на Стејт департментот
Министерот за правда ги затвори бугарските културни клубови „Цар Борис Трети“ и „Иван (Ванчо) Михајлов“, повикувајќи се на законот од 2022 година, со кој се бара од организациите именувани по поддржувачи или соработници на фашизмот да ги променат своите имиња, се наведува во извештајот на Стејт департментот.
„Во февруари, по препорака на Комисијата за антидискриминација, обвинителството во Битола отвори прелиминарна истрага за клубот „Иван (Ванчо) Михајлов“ поради говор на омраза. Претседателот на клубот беше обвинет за поттикнување етничка и расна омраза и нетолеранција и ширење расизам и ксенофобија. Две лица се обвинети за нанесување тешки телесни повреди на Христијан Пендиков, кој се саморегистрирал како Бугарин, по национална и етничка основа на омраза“, се вели во извештајот.
Во однос на слобода на здружување во Бугарија, во извештајот се наведува дека Законот предвидува право на слобода на здружување и владата генерално го почитувала.
„Властите продолжија да негираат регистрација на етничко-македонски активистички групи како што се Обединета македонска организација-Илинден, Друштвото на угнетените Македонци во Бугарија-жртви на комунистичкиот терор, Здружението за заштита на основните индивидуални човекови права 2023 година и Македонскиот културен клуб „Никола Вапцаров“ и покрај бројните претходни одлуки на Европскиот суд за човекови права дека негирањето ја нарушува слободата на здружување на групите.
Во февруари, Окружниот суд во Пловдив ја потврди одлуката на Агенцијата за регистрација со која се одбива регистрацијата на Обединетата македонска организација Илинден-Пловдив со образложение дека целите на групата, вклучително и официјалното признавање на македонското етничко малцинство, биле насочени кон поделба на нацијата и ќе создадат услови за етнички конфликт. Во мај, Апелацискиот суд во Пловдив ја потврди одлуката на понискиот суд“, нотира извештајот.
Македонија
Недоверба кон судството, насилства кон ЛГБТ-и заедницата и поткопана слобода на изразување, забележа Стејт департментот во извештајот за човекови права во Македонија
Сериозна владина корупција, сериозни ограничувања на слободата на изразување и слободата на медиумите, насилство и закани за насилство насочени кон ЛГБТ-и заедницата се само дел од забелешките во извештајот на Стејт департментот за состојбата со човековите права во Северна Македонија во 2023 година.
Извештајот меѓудругото нотира значителни „одложувања во судењата кои вклучуваат сериозна корупција, при што само неколку беа завршени до септември, вклучително и оние против поранешни владини функционери. Уставот предвидува независно судство, но владата не секогаш ја почитувала судската независност и непристрасност, вели извештајот.
„Веродостојните извештаи за неоправдано судско несоодветно однесување, непотребен политички и деловен притисок врз судиите, непотизам, клиентелизам, долготрајна правда, несоодветно финансирање, отпор кон користење на законски задолжителна технологија и недоволен кадар, ја попречија судската ефикасност и влијаеше на довербата на јавноста во владеењето на правото“.
Анкетите покажале силна недоверба на јавноста кон судството.
„Унапредување под политичко влијание без заслуга или транспарентност се случи во судството и обвинителството. Во јануари, Судскиот совет утврди дека двајца судии на Апелациониот суд во Скопје свесно ги одложиле одлуките за да ги истуркаат обвинетите да го поминат рокот на застареност. На 26 април, Судскиот совет го разреши својот претседател, потег што критичарите тврдеа дека укажува на политичко мешање. Двајца членови поднесоа оставки од Судскиот совет како одговор, а неколку истакнати граѓански организации побараа целосна оставка на Советот“.
Слободата на изразување била поткопана од неефикасноста на правосудниот систем, недостатокот на транспарентност во однос на медиумското рекламирање од страна на државните институции, несоодветното однесување во име на јавните службеници во нивната интеракција со новинарите, притисокот врз новинарите кои истражуваат корупција, дезинформациите, говорот на омраза во онлајн и социјалните медиуми, и самоцензура.
Македонија
Одрони на неколку патни правци
ЦУК извести дека преку единствениот број за Итни повици Е-112 добиена е дојава за одрон на патот кај Калиманци, на регионалниот пат Македонска Каменица-Виница, 5 километри пред влезот на Македонска Каменица.
За настанатата состојба известени се ЈП за оддржување на регионалните и магистралните патни правец и екипите се излезени на терен за да го саниррат одронот, додаваат од ЦУК.
Исто така добиена е дојава за одрон на патен правец село Удово-Демир Капија.
„Точната локација е 2-3 километри после село Удово во правец спрема Демир Капија. За настанатата состојба известени се ЈП за оддржување на регионалните и магистралните патни правец и екипите се излезени на терен за да го санираат одронот“, соопшти ЦУК.