Македонија
Собранието во сабота ќе ги гласа измените на законите договорени од лидерите
Собранискиот спикер Талат Џафери, за сабота ќе ја закаже пленарната седница на која ќе се гласа за нови членови на Државната изборна комисија, измените во Законот за финансирање на партии и Законот за Влада каде ќе се вметне делот за техничка влада по принципот на договорот од Пржино. Седницата ќе чека неколку дена бидејќи Џафери ќе биде отсутен од парламентот.
Трите точки требаше експресно да бидат изгласани во понеделникот, кога на лидерската стредба биле усогласени двата закони и притоа лидерите се договориле членовите на ДИК да се бираат по старата законска регулатива со двотретинско мнозинство, а не со 61 глас како што предвидуваа измените на изборниот законик.
Процесот бил закочен оти ВМРО-ДПМНЕ не доставиле кандидатска листа за членови на ДИК, а притоа барале во Законот за финансирање на политички партии да се промени делот за казните, каде затворските казни ќе се заменуваат со парични казни. Опозицијата побарала измена на членот 165 од Кривичниот законик кој се однесува на злоупотреба на средства за финансирање на изборна кампања, потврди министерот Дамјан Манчевски. Парламентарното мнозинство е децидно дека нема да гласа за вакви измени.
По членот 165-а од КЗ, се теретат функционери на опозициската ВМРО-ДПМНЕ во случајот „Титаник“ на СЈО. Како осомничени во СЈО се јавуваат Никола Груевски, Гордана Јанкулоска, Миле Јанакиески, Владимир Пешевски, Елизабета Канческа Милевска, Сашо Мијалков како и градоначалникот на општина Гази Баба, Тони Трајковски.
Ваквите барања на опозицијата, пратениците од СДСМ ги оценуваат како барање за амнестија. Процесот ќе биде откочен кога ВМРО-ДПМНЕ ќе ги повлече овие барања. Лидерот на опозицијата Христијан Мицкоски, на прашање дали неговата партија се откажува од измените во Кривичниот законик рече „ Доколку овој закон кој што е дел од собраниската процедура и подразбира нов закон за финансирање на политичките партии има потреба од дополнително усогласување со кривичниот законик тогаш службите ќе си одлучат“.
„Макфакс“ не доби одговор од пратеникот Илија Димовски кој ја води Комисијата за избори и именувања, за тоа кога пратениците ќе се состанат за да ја утврдат кандидатската листа за ДИК.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Спречени 3.000 вработувања и унапредувања предложени од техничката Влада
Управниот суд ги поништи решенијата за вработување и унапредување на над 3.000 вработени во Министерството за финансии и јавниот сектор бидејќи се прекршил Законот за техничката влада, соопшти заменик-министерката за финансии, Елена Петрова.
Како што вели, иако одлуките морало да бидат одобрени со нејзин потпис, како што предвидува Законот за техничката влада, министерот Бесими ги потпишал сам.
„Незаконити се одлуките на министерот за финансии и државниот секретар во Министерството за финансии по спроведените постапки за вработување и унапредување во Министерството за финансии, како и одлуките на министерот за финансии за давање согласности за вработување во јавниот сектор, сите донесени по формирањето на преодната Влада за организирање на изборите. Ова е потврдено со судски одлуки. Вишиот управен суд донесе две пресуди во моја корист, со кои ги поништи како незаконити одлуките на ДИК, кои беа донесени врз основа на барање на Министерството за финансии“, рече Петрова и додаде:
„Со поништувањето на одлуките на ДИК сите наведени акти поврзани со вработување во Министерството, кои не се потпишани со врзан потпис на министерот за финансии и на дополнителниот заменик-министер, не произведуваат правно дејство. Тоа се однесува и на издадените согласности за вработувања по сите основи во целиот јавен сектор, како и почнатите постапки врз основа на тие согласности“.
Македонија
Македонската армија ѝ се заблагодари на Норвешка со знамето на Исланд
Од Армијата на Македонија ги измешаа знамињата на Норвешка и Исланд.
Во благодарноста на „Фејсбук“ триесетина минути стоеше, наместо норвешкото, знамето на Исланд.
„Моторните возила од Кралството Норвешка веќе се на својата крајна дестинација. По нивното распоредување, армиските единици ќе добијат поголема транспортната способност и мобилност“, напишаа од македонската Армија.
Македонија
Македонката Светлана Мојсов меѓу 100-те највлијателни личности во светот според магазинот „Тајм“
Македонката Светлана Мојсов, светски познат научник, чие истражување за хормоналните предизвикувачи за производство на инсулин доведе до револуционерни третмани за дијабетес и дебелина, е меѓу 100-те највлијателни личности во светот за годинава, според најновиот избор на американскиот магазин „Тајм“.
Таа се најде во овој престижен избор заедно со уште двајца научници, Џоел Хабенер и Ден Дракер, во сегментот „Пионери“, меѓу други влијателни личности, како Америка Ферера, Лесли Локо, Офелија Дал, Кенеди Одеде и други.
Како што пишува Алис Парк, виш дописник на „Тајм“, во образложението за изборот на Мојсов, Хабенер и Дракер, појавата на ефикасни лекови за слабеење, како што е „вегови“ (Wegovy), е кулминација на долгогодишната тимска работа.
Научниците во Европа и во САД, кои први работеа на лековите за дијабетес, направија критична врска помеѓу инсулинот и инкретините, дел од семејството цревни хормони, познати како глукагони, со што им помогнаа да разберат како да управуваат со нивото на шеќерот во крвта и тежината.
Во годинашната листа на магазинот „Тајм“ во категоријата највлијателни лидери се сопругата на починатиот руски опозиционер, Јулија Навални, кинескиот премиер Ли Џијанг, полскиот премиер Доналд Туск, аргентинскиот претседател Хавиер Милеи и италијанската премиерка Џорџа Мелони меѓу лидерите.
Покрај нив, помеѓу највлијателните лидери се и бразилската министерка за животна средина и климатски промени, Марина Силва, директорот на ЦИА, Вилијам Барнс, и шефот на кабинетот на украинскиот претседател, Андриј Јермак.
Во изборот на највлијателните личности на американскиот весник се најдоа и јапонскиот режисер Хајао Мијазаки, британската пејачка со албанско потекло, Дуа Липа, британскиот актер Дев Пател и австралиската пејачка Кајли Миног.