Македонија
Соговорничка до Јанакиески: „Паркови и зеленило“ слабо излезност, таму маваме повеќе
Од незаконски прислушуваните разговори што денеска се пуштаат во судот на рочиштето за предметот „Титаник“ направени на 7 април, денот од вториот круг на локалните избори во 2013 година, може да се слушне како поранешниот министер за транспорт и врски, Миле Јанакиески, врши контрола на одѕивот на лицата вработени во државните институции и приватните фирми што соработувале со тогашната власт.
„СГС, Музејот на град Скопје, основни, средни училишта, од сегде има списоци. ‘Паркови и зеленило’ е најслабо, таму маваме повеќе“, му реферира соговорничка на поранешниот министер Јанакиески.
Јанакиески во еден од разговорите вели дека од фирмата на Орце Камчев, „Орка холдинг“, не се отидени да гласаат и дека од базата точно се знае кој излегол на гласање, а кој не.
Во голем дел од разговорите Јанакиески со име и со презиме ги спомнува лицата што немаат отидено на гласање со цел тие да бидат, како што вели, притиснати да гласаат. Ова особено се однесува на регионот во општина Центар.
„Многу од Дебар Маало немаат излезено, види за семејство Андонови и другите таму“, му вели Јанакиески на еден од соговорниците.
Случајот „Титаник“ на СЈО се однесува на злосторничко здружување, повреда на избирачкото право, повреда на слободата на определување на избирачите, поткуп при избори и гласање, уништување изборен материјал и злоупотреба на средства за финансирање изборна кампања.
Виктор Јованов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Пендаровски со претставка за говорот на омраза, навредите и дискриминацијата од страна на Силјановска-Давкова и ВМРО-ДПМНЕ
Претседателскиот кандидат Стево Пендаровски до Комисијата за спречување и заштита од дискриминација ќе достави претставка за говорот на омраза, навредите и дискриминацијата од страна на кандидатката Гордана Силјановска-Давкова и од политичката партија ВМРО-ДМПНЕ, којашто ја поддржува нејзината кандидатура.
„Гордана Силјановска-Давкова и ВМРО-ДПМНЕ во повеќе наврати, на јавните собири и митинзи, искажаа лични навреди и клевети за кандидатот за претседател Пендаровски, коишто, освен што го нарушуваат неговото достоинство и неговите чест и углед, исто така содржат и елементи на говор на омраза, со што наведените може да поттикнат други лица да сторат дела од омраза“.
Пендаровски материјалот ќе го достави до ДИК, чијшто Кодекс за фер и демократски избори го потпиша кандидатката и партијата која ја поддржува, понатаму до набљудувачката мисија на ОБСЕ/ОДИХР, до делегација на ЕУ, како и до амбасадите на земјите членки на НАТО и Европската Унија, во нашата земја, се истакнува во информацијата.
„Со оглед на тоа што Државната изборна комисија одлучува по приговори, а не по претставки, во врска со почитувањето на одредбите од Изборниот законик и до неа ќе се достави материјалот заради нивно информирање. Тие, како носители на изборниот процес, имаат морална обврска да се запознаат со флагрантното кршење на Кодексот од кандидатката и партијата ВМРО-ДПМНЕ“, се истакнува во соопштението.
Македонија
МОН: Во училиштата во кои ќе се одвива изборниот процес наставата ќе се реализира со скратени часови
Наставата во учебната 2023/2024 година ќе се реализира целосно како што предвидуваат плановите за организација на работата на основните и средните училишта. Иако гласањето во рамките на првиот и вториот изборен круг е закажано во работни денови, учениците нема да изгубат од наставата и да пропуштат дел од наставниот материјал, велат од МОН.
Министерството за образование и наука информира дека 23 април и 7 мај, односно деновите пред гласањето, ќе бидат работни за сите училишта. Притоа во училиштата во кои ќе се одвива изборниот процес наставата ќе се реализира од 7 до 11 часот, со скратени наставни часови за сите одделенија, односно класови. Во другите училишта во кои не се спроведува гласање наставата се реализира вообичаено и во согласност со предвидениот дневен распоред.
Потсетуваат дека наставната година за учениците од средните училишта трае до 10 јуни, а за учениците од основните училишта до 17 јуни.
Македонија
Мицкоски: Во програмата „Платформа 1198“ предвидени се повеќе од 2 милијарди евра во инфраструктура, 250 милиони евра годишно кон општините, завршување на автопатот Кичево – Охрид
„Повеќе од 2 милијарди евра се планирани да се инвестираат во инфраструктурата. Тука е оној проект кој е многу значаен, а тоа се реалоцирање средства од буџетот кон општините во вредност од 250 милиони евра годишно или за еден четиригодишен мандат тоа би било точно 1 милијарда евра“, истакна претседателот на ВМРО-ДПМНЕ Христијан Мицкоски одговарајќи на новинарско прашање при денешниот увид на градежни активности во поранешната касарна во Охрид.
„Ги повикувам општините, не само онаму каде имаме градоначалници кои доаѓаат од редот на ВМРО-ДПМНЕ и коалицијата туку и оние општини каде има градоначалници од СДСМ, ДУИ, Алијанса на Албанците, БЕСА, но и независни градоначалници да прават проекти бидејќи првиот оглас откако ребалансот на буџетот ќе се случи во јули месец, првиот оглас ќе биде објавен некаде есента септември, за да може да аплицираат за проекти кои ќе бидат важни за граѓаните“, порача Мицкоски.
Тој истакна дека нема да бидат влада само онаму каде има градоначалници од ВМРО-ДПМНЕ, туку влада за сите граѓани.
„Амбицијата ни е во еден момент да се работи на минимум 500 точки, 500 локации на територијата на цела Македонија со што ќе бидат задоволени потребите на граѓаните. Ние нема да бидеме влада само онаму каде има градоначалници од ВМРО-ДПМНЕ и коалицијата, туку сакаме да бидеме влада за сите граѓани и да покажеме дека не се сите политичари исти, да покажеме дека немаме намера да ги делиме граѓаните како тоа што правеше сегашната влада“, вели Мицкоски.
Додаде дека еден од приоритетите е конечното завршување на автопатот Кичево – Охрид.
„Исто така тука се еден од приоритетите и конечно завршување на автопатот Кичево – Охрид. Рековме според нашата анализа тоа би било некаде околу 2026 година, втората половина на 2026 година. Реализација на тековните автопати Тетово – Гостивар, Прилеп – Битола. Многу други проекти поврзани со локалната инфраструктура, железничката инфраструктура, возови, вагони итн., нешто што е дел од програмата „Платформа 1198“, посочи Мицкоски.
Порљача граѓаните детално да ја прочитаат „Платформа 1198“ бидејќи има детално за секого по нешто.
„Цениме дека сето тоа што е таму содржано е возможно да се реализира и ќе го реализираме. Чуда не ветувавме, ние не сме чудотворци, чуда се невозможни, сите оние кои ветуваат чуда не ја говорат вистината. Ве молам прочитајте ја програмата „Платформа 1198“ и ќе го најдете патот како Македонија ќе се развива и ќе биде повторно горда и Македонија ќе биде повторно твоја“, дециден е Мицкоски.