Македонија
Со изложба на маски започна карневалот „Прочка“ во Прилеп
Со изложба на маски во ЦК „Марко Цепенков“ во Прилеп, кои ги изработија учениците од основните и средни училишта, започна 16-тиот по ред карневал „Прочка“. На изложбата беа поставени околу 1.000 маски, а најголем дел од нив беа изработени според традицијата од природни материјали. Учениците беа задоволни од нивните уникатни креации.
„Јас маската сама ја изработував, сакав да асоцира на индијанска маска. За нејзината изработка користев природни материјали, коноп, дрво, леќа и друго. Инаку ова не е прв пат да изработувам маски за оваа изложба, активно земав учество во овој настан и додека бев во основно училиште“, рече Викторија Дунимаглоска, ученик во гимназија „Мирче Ацев“ – Прилеп.
„За маската користев балони, обвиткани со хартија и зрна грав, како и други материјали, а таа според мојата замисла треба да претставува плашило“, рече Илина Ѓорѓиоска, ученик во ООУ „Кире Гаврилоски“ – Прилеп.
Дел од учениците иако не изработувале маски специјално дојдоа на отворањето на оваа изложба поради нејзината уникатност. Оваа изложба лани за прв пат беше претставена и надвор од Прилеп во Скопје.
„Иако не изработував оваа година маска со задоволство дојдов да видам какви маски изработиле моите соученици и навистина сум импресиониран од нивните идеи“, вели еден од учениците посетители на изложбата.
„И годинава официјално се отвора Карневалот со поставката на маски од сите основни и средни училишта во нашата Општина. Маските се изработени на традиционална база, а главна тематика е да се запази традицијата и да се постави маската како асоцијативен момент на „Мечкарите“. Маските исто така се збогатуваат и со еден современ пристап. Оваа изложба лани беше изложена и во Скопје“, истакна Александар Џинго, наставник.
Изложбата ја отвори градоначалникот на Прилеп, Марјан Ристески, кој на учениците им подели и 15 награди за најубави маски.
„Им честитам на сите кои учествуваа на оваа изложба и им честитам на сите кои добија награди и им посакувам да продолжат и понатаму да бидат креативни, да творат и да ја одржуваат традицијата и овој голем карневал за Прилеп. Локалната самоуправа има сериозна идеја, која би се реализирала за една до две години, да направи музеј на маски кои ќе биде во чест на креативноста, иновативноста, шегата и мајтапот во Прилеп, музеј кој ќе потсетува на сите карневалски години во нашиот град“, изјави Марјан Ристески, градоначалник на Прилеп.
„Секоја година сведоци сме на се поубави креации на маски, кои имаат и доста висок квалитет и уменитички вредности и бројот на маските кои учествуваат на оваа изложба секоја година е се поголем и поголем“, додаде Снеже Ристески, советник за култура во Општина Прилеп.
Одбележувањето на Карневалот продолжува утре со научна конференција насловена како „Обреди и фестивали под маски на балканот: традиција, состојба, тенденција“, која ќе се одржи во хотелот Кристал Палас. Гости, учесници на конференцијата се пријавени од Србија, Бугарија и Македонија, додека реферати ќе има и од етнолози од Словенија, Хрватска и Грција.
Потоа утре со почеток во 12.30ч. ќе биде парадата на учесниците до 14 години, на плоштадот Методија Андонов Ченто, каде што покрај дефилето ќе има куклено шоу, магионичари, жонглерски и други атракции за сето тоа да заврши со заедничка забава.
Централниот настан на Карневалот ќе биде меѓународното дефиле кое ќе се одржи во недела, на кое ќе се претстават бројни групни и поединечни маски, а стартот е од ЦК „Марко Цепенков. Трасата ќе се движи се до плоштадот „Методија Андонов Ченто“ каде што ќе биде главното претставување со изведена кореографија и музика./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Муцунски: Овој изборен ден е почеток на крајот на оваа власт
Народот уште еднаш покажа дека знае и умее да ја процени важноста на овие избори, како крстопат кога се одлучува за правецот во кој треба да се развива нашата татковина, онаква каква што сакаме да ја видиме напредна земја со европски стандарди во правото, здравството, образованието, земјоделието и сите други области значајни за граѓаните, кажа Тимчо Муцунски, потпретседателот на ВМРО-ДПМНЕ.
Од аспект на изборниот процес, според него, тој поминал како што рече, генерално во фер и демократска атмосфета, со низа помали прекршувања, пред се предизвикани од партиите на власт и нивните активисти.
„Имено од досегашните податоци за нерегуларности кои ги имаме добиено од набљудувачите, забележано е вршење на притисок врз гласачи во општина Сарај, но и импровизиран штаб во непосредна близина на гласачко место во училиштето Гоце Делчев во Гостивар. Исто така забележани се случаи на семејно и колективно гласање, за кое истите лица биле предупредувани од страна на избирачките одбори и акредитираните набљудувачи.
На неколку избирачки места во втората изборна единица, поточно во Куманово, нотирани се нерегуларности од типот на нефункционалност на убиг апаратите или немање на печат. Во едно избирачко место бидејќи немале печат избирачкиот одбор добил насоки од ОИК гласањето да продолжи, па после гласањето да се стави печат. При примопредавањето на изборниот материјал не биле потпишани сите субјекти“, информира Муцунски.
За сите забелешки, како што рече како партија ќе постапат пред надлежните институции.
„Затоа што во наш, но и во интерес на Македонија е да имаме кристално чист изборен процес, процес кој според нас треба да заврши со победа на Македонија и визијата за реформи, правда.
Овој изборен ден е почеток на крајот на оваа власт и враќањето на Македонија повторно на народот, процес кој повторно Македонија ќе ја направи горда“, истакна Муцунски.
Македонија
Европскиот фронт: Очекуваме голема, историска победа, тоа го потврдуваат информациите од терен
„Народот го кажа своето, имавме мирен изборен ден и слободни избори“, изјавија веднаш по изборниот молк од Европскиот фронт.
„Покажавме демократска зрелост како што и доликува на земја членка на НАТО и земја преговарач со ЕУ. Денес граѓаните го кажаа својот збор а на нас е да ја преточиме таа волја во акција. Имавме исклучителна кампања, напорна и вредна, беше европска на која треба сите да се гордееме“, посочија од Европскиот фронт.
На прашањето колку се задоволни од одзивот на гласачите и за првичните партиски пресметки Арбер Адеми од ДУИ истакна дека очекуваат голема победа за нивниот кандидат Бујар Османи.
„Сите информации од терен тоа го потврдуваат. Очекуваме победата да биде голема, историска“, рече Адеми.
Македонија
ОЈО: Сите сомненија за кривични дела кои би можеле да го нарушат изборниот процес ќе бидат испитани
Во текот на изборниот ден до затворањето на избирачките места, на електронската адреса на Јавното обвинителство на Република Северна Македонија не пристигнала ниту една пријава за кривично дело поврзано со изборите, информираат од оваа институција.
„Согласно информациите добиени од јавните обвинителства низ целата држава, изборниот ден во првиот круг од изборите за Претседател на Република Северна Македонија помина мирно и без поголеми нарушувања на изборниот процес. Не се забележани посериозни инциденти кои би имале обележја на кривично дело против изборите и гласањето или други кривични дела кои би го загрозиле изборниот процес.
Привремената Комисија на Јавното обвинителство за евентуални изборни нерегуларности го следеше текот на гласањето, а во текот на денот беа организирани вонредни дежурства во сите основни јавни обвинителства. Јавното обвинителство се координираше и со останатите институции надлежни за следење на изборниот процес“ се додава во официјалниот допис од обвинителството.
Комисијата, како што нагласуваат, ќе продолжи со својата работа до завршување на изборниот циклус.
Додаваат дека сите евентуални сомненија за кривични дела кои би можеле да го нарушат изборниот процес ќе бидат испитани, а предметите ќе имаат приоритет на постапување во јавните обвинителства.