Македонија
Спасовски во Виена на Министерска конференција во рамки на иницијативата „Платформа за заедничка координација“
Висока делегација од Министерството за внатрешни работи предводена од министерот Оливер Спасовски, заедно со државната секретарка Магдалена Несторовска учествуваше на Министерската конференција што во рамки на иницијативата „Платформа за заедничка координација“ се одржува во Виена, Република Австрија, во организација на австриското Министерство за внатрешни работи на тема „Регионален механизам за враќање, партнерства за враќање“, на која земаа учество министрите за внатрешни работи на земјите на ЕУ и земјите од Западен Балкан.
„ Кога станува збор за нелегалната миграција, регионот, односно земјите долж рутата се среќаваат со истите предизвици кои беа присутни и во изминатиот период и кои веќе се идентификувани. За жал, не можеме да говориме за постигнување на значителен напредок поради немањето на договори за реадмисија или договори за полициска соработка, кои би ја регулирале областа на реадмисија со земјите на потекло, што во најголема мерка се должи на недоволно развиената соработка со земјите на потекло, особено во делот на утврдување на идентитетот на мигрантите, како и поради непостоењето или нерезидентноста на дипломатско-конзуларните претставништва во регионите од кои доаѓаат најголемиот дел од мигрантите “, истакна министерот Оливер Спасовски во своето обраќање на првиот панел за дискусија, посветен на регионалните и националните аспекти односно предизвиците и тековната состојба со илегалната миграција.
Тој посочи дека дополнителен предизвик е и потребата од јакнење на националните капацитети за асистирано и присилно враќање – област во која веќе се преземаат конкретни чекори, меѓутоа сѐ додека не се отстранат проблемите со непостоењето на договори за реадмисија и потесна полициска соработка, тие преземени активности нема да дојдат до полн израз дури и да се целосно развиени.
„ Кога зборуваме за враќањето, верувам дека сите сме согласни дека е тоа конститутивен елемент на еден ефективен систем за менаџирање на миграцијата кој, пак, мора да биде функционален и да го опфаќа целиот опсег на менаџирање на миграцијата, а не само враќањето. Во оваа насока би додал и дека од суштинска важност е да се направи дистинкција помеѓу враќањата кон или помеѓу регионот на Западен Балкан и враќањата од регионот на Западен Балкан кон трети земји. Враќањето на државјани на трети земји од еден во друг партнер на Западен Балкан не придонесува за одржливо враќање“, рече министерот Спасовски.
Притоа, тој додаде дека напорите за подобрување, покрај јакнење на националните капацитети на земјите од регионот, треба да се фокусираат и на заеднички настап кон земјите на потекло и меѓусебна помош во сите фази на враќањето. А тоа, всушност, би значело заеднички пристап помеѓу сите засегнати држави, надлежните агенции на ЕУ и Европската Комисија, со поддршка на релевантни меѓунарoдни организации, што подразбира не само редовна размена на податоци и информации, туку и заедничка анализа на ризик, координирање на националните активности, и реализација на заеднички оперативни активности.
Министерот Спасовски во дискусијата во рамки на вториот панел од Министерската конференција, фокусирана на елементите на регионален механизам и партнерства за враќање, меѓу другото рече дека токму Заедничката платформа за координација има голем потенцијал да преземе водечка улога во координацијата на активностите за ефикасно справување со илегалната миграција, таа ги идентификува и ги сублимира во себе потребите во клучните области – гранично управување, азил, враќање и борба против трговијата со луѓе. Дополнително таа е практична, бидејќи со неа ќе се избегнат дуплирањето и преклопувањето и ќе се почитуваат надлежностите на агенциите на Европската Унија, на Комисијата, и секако, на партнерите од Западен Балкан.
„ Платформата за заедничка координација, верувам, претставува координациска платформа која се потпира во своето работење на своите партнери, односно на нивните изразени потреби. Во оваа насока, од неопходна важност е да се избегнува преклопување на напорите и на Платформата, но и на други меѓународни актери кои се веќе активни во областите на менаџирање на миграцијата. Затоа, нашата цел мора да биде комплементарност на напорите, нивна следливост и спроведливост. Столбовите на кои почива оваа платформа ни даваат за право да веруваме дека Платформата има капацитети да ја исполни својата цел – да има координативна улога во справувањето со нерегуларната миграција, истовремено покажувајќи солидарност со земјите членки на Европската Унија и обезбедувајќи силна поддршка и тесна соработка со регионот на Западен Балкан“, порача на крајот од своето обраќање Спасовски.
За време на работната посета на Виена, на маргините на Министерската конференција, министерот Спасовски оствари билатерална средба со министерот за миграции и азил на Елинската Република, Нотис Митараки, на којашто акцентот беше ставен на продлабочување на соработката на билатерално ниво во борбата против криминалот, а се сретна и со канцеларот на Република Австрија, Карл Нехамер, поранешен австриски сојузен министер за внатрешни работи, како и со државниот секретар за миграции на Швајцарската Конфедерација, Кристин Шанер Бургенер.
Имајќи го предвид фактот дека Република Северна Македонија ја презема улогата на претседавач со ОБСЕ за 2023 година, министерот Спасовски во Виена оствари работна средба и со шефот на постојаната мисија на РСМ при ОБСЕ во Виена, амбасадорот Игор Џундев, на која беше најавено дека во рамки на претседавањето со ОБСЕ ќе биде организирана конференција за министри за внатрешни работи на земјите членки на ОБСЕ и/или шефови на полиции, на тема согласно приоритетите кои ќе бидат усвоени на национално ниво за претседавањето на Република Северна Македонија со Организацијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Сервисни информации
Променливо облачно со повремени врнежи од дожд, а на планините повремен снег
Времето денеска ќе биде, променливо облачно со повремени врнежи од дожд, а на планините со повремен снег.
Локално, врнежите ќе бидат поројни, проследени со појава на ретки грмежи. Ќе дува слаб до умерен ветер од северозападен правец. Минималната температура ќе биде во интервал од 5 до 10, а максималната ќе достигне од 11 до 18 степени.
Во Скопје променливо облачно со повремени врнежи од дожд. Кон крајот на денот врнежите ќе престанат. Ќе дува слаб до умерен ветер од северен правец. Минималната температура ќе се спушти до 8, а максималната ќе достигне до 15 степени.
Од петок следува период на претежно стабилно и потопло време со пораст на температурите на воздухот.
Скопје
Осум скопски општини денеска без струја
Според добиеното известување од ЕВН Македонија АД, Регионалниот центар за управување со кризи-Град Скопје, информира дека, поради планирани технички зафати во електро дистрибутивната мрежа, денеска без електрична енергија ќе останат неколку скопски општини.
· Во периодот од 08:30 до 14:00 часот, дел од корисниците на ул.Максим Горки, реон Дом на градежници (општина Центар).
· Во периодот од 09:00 до 14:00 часот, поголемиот дел од потрошувачите на ул.Ринхини.(општина Ѓорче Петров)
· Во периодот од 09:00 до 10:30 часот, корисниците од с.Визбегово, дел од с.Мирковци, Бразда, Глуво, Чардак, Оризари.(општините Бутел, Шуто Оризари и Чучер Сандево)
· Во периодот од 09:00 до 15:00 часот, корисниците од ул.Кавалска.(општина Кисела Вода)
· Во периодот од 09:00 до 12:00 часот, корисниците на пат за Долно Лисиче, од Кодакопласт, кон Паци Петрол до реката, од Св.Петар и Павле по патот кон Долно Лисиче.(Аеродром)
· Во периодот од 09:00 до 10:00 часот, корисниците од дел од ул. 4031, село Марино.(општина Илинден)
· Во периодот од 09:00 до 13:00 часот, корисниците на дел од бул.Борис Трајковски (од Техноскоп до кружниот тек пред Драчево).(општина Кисела Вода)
· Во периодот од 10:30 до 12:00 часот, корисниците од с.Сандево, Бањане, Горњане, Дел од с.Мирковци.(општина Чучер Сандево)
· Во периодот од 13:00 до 15:00 часот, дел од корисниците на ул. Исаија Мажовски и Воин Драшкоци.(општина Ѓорче Петров)
Македонија
Димитриевски до Пендаровски: Разликата е огромна, откажете се од оваа битка и оставете нè да победиме во вториот круг
Денеска, ЗНАМ заедно со сите свои пддржувачи ја испишува новата политичка историја на македонската политичка сцена, рече вечерва претседателскиот кандидат Максим Димитриевски. Иако е јасно дека не влегува во вториот круг, Димитриевски првиот круг од изборите го смета за голем успех.
„Можам да потврдам дека се роди третата политичка сила во македонскиот политички блок во државата, која во следниот период имаме намера дополнително да ја потврдиме и надградиме, со цел еден ден граѓаните да имаат можност да изберат нешто ново“, рече Димитриевски.
На противкандидатите им честита за успехот и се заблагодари на можноста да води кампања за која рече дека не била еднаква за сите оти законот што е во сила не дава еднаква можност за медиумско претставување на сите партии.
Рече дека се гордее на секој глас што го добиле како партија регистрирана пред само три месеци.
„Факт е дека јас како кандидат и ЗНАМ освоив повеќе од 80.000 гласа. Регистриравме субјект што постои нешто повеќе од три месеци и со граѓанската поддршка се етаблира на трето место во политичкиот блок. Сметам дека тоа е одличен појдовен резултат за понатамошна борба. Јас не се сеќавам дека во историјата на плурална Македонија имало вакви примери, да имате партија со некаде три и пол илјади члена, а да освоите над 80.000 гласа. Искрено, се гордеам на секој глас што дојде како поддршка за мене и ЗНАМ. И покрај тоа што трендовите се тие, десницата добива, а левицата губи, единствено десницата доживеа пораз во бастионот на асномска Македонија, а тоа е Куманово“, рече Димитриевски.
Им порача на сите политичари дека треба да учат од овие избори оти граѓаните дале јасна насока каде сакаат да се движи државата, а посебна порака упати до Стево Пендаровски, кој има 100.000 гласа помалку од Гордана Силјановска-Давкова.
„Почитуван мој претседателе, разликата е огромна. Доколку сакате да опстанат централната и левата идеја во државата, откажете се од оваа битка и оставете нѐ да победиме во име на граѓаните во вториот круг“, порача Димитриевски.
Кога ќе завршат парламентарните избори, Димитриевски е уверен дека ЗНАМ ќе биде политички фактор за стабилност во државата, без кој нема да може да се формира идната влада. Најави дека кога ќе ги почнат преговорите за формирање парламентарно мнозинство, на сите политички партии ќе им ги испорачаат нивните предлози за црвените линии на македонскиот народ.