Македонија
Спасовски: Нема одлука за ограничување на движењето, апел до повозрасните граѓани да останат дома
Техничкиот премиер, Оливер Спасовски, вели дека и денеска, неколку часа од прогласувањето на вонредната состојба, животот продолжува да функционира исто како вчера.
Владата на седница не донела нови одлуки за рестрикции во движењето, можност пропишана со прогласувањето ваква состојба.
Спасовски ги повика сите граѓани, доколку имаат и најмали симтоми што личат на коронавирус, а на кои предупредуваат медицинските лица, да се јават во центрите за јавно здравје.
„Вонредната состојба, која ќе трае 30 дена, со можност да се продолжи доколку е потребно, не значи дека ќе замре животот на граѓаните. Сите функции на државата ќе продолжат да се остваруваат и во овие услови. Правата и слбоодите на граѓаните не се ограничуваат по автоматизам. Тоа не значи застој во слободниот транспорт на прехрабените потреби на граѓаните, ниту во делот на снабдувањето со лекови во болниците и аптеките. Денеска, сè продолжува да функционира исто како и вчера, нема одлуки за нови рестрикции во движењето и остварувањето на професионалните обврски на граѓаните. Исклучок од ова се само подрачјата на Дебар и Центар Жупа бидејќи таму има кризна состојба затоа што тоа се жаришта на вирусот“, рече Спасовски.
Препораката возрасната категорија граѓани да останат дома и натаму останува. Спасовски од нив побара за помош да им се обратат на волонтерите, кои ги има во сите општини.
„Најпрвин сакам да ве уверам дека денеска, неколку часа по прогласувањето вонредна состојба, ние сите заедно сме уште повеќе сплотени за уште посериозно и поодговорно да ги извршуваме своите задачи. Оваа одлука е вистинската мерка што ќе помогне во остварувањето на грижата, а тоа се животот и јавното здравје. Ги спроведуваме сите мерки за превенција и заштита на здравјето на граѓаните. Одлуките се во насока помалку да им наштети на економијата и стопанството. Економските мерки што ги носиме имаат цел да обезбедат одржливост и да се зачуваат работните места на граѓаните“, додаде Спасовски.
Тој уверува дека ќе се работи за интересот на граѓаните, а вонредната состојба значи само олеснување на Владата да донесе уредба која веднаш ќе стапи на сила.
„Вонредните политики во вонредна состјоба ќе може полесно да се донесуваат. Ве уверувам дека ќе ја совладаме вонредната состојба, професионално со сите државни ресурси, спроведувајќи ги сите законски прописи за успешно справување и спречување ширење на коронавирусот“, смета Спасовски.
Најстроги санцкии за сите што нема да ги почитуваат мерките, повтори Спасовски, и рече дека сите одлуки донесени во врска со вонредната состојба, ќе бидат веднаш соопштени.
„Потребно е да се однесуваме одговорно почитувајќи ги мерките и препораките, кои се за наша лична заштита и заштита на нашите семејства. Во услови на вонредна состојба, ќе покажеме дека дисциплинирано секој од нас, сите државни и приватни институции, сите граѓани, сите одделно сме посветени за општо добро“, потенцира тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Приведено уште едно лице за кражбата на сефот во Црниче
Приведено е уште едно лице за кражбата на сеф од маркет во Црниче.
Од МВР информираа дека вториот приведен е В.Т.(36) од Скопје.
Претходно Обвинителството објави дека приведен е 26-годишен скопјанец кој учествувал во кражбата.
Со тоа, двајцата се сомничат дека на 1 април провалиле во затворен маркет на улицата Востаничка во Скопје, одзеле метален сеф во вредност од 12.000 денари, дневен промет во износ од 228.000 денари и цигари вредни 45.000 денари, или сѐ во вкупна вредност од 285.000 денари.
ОД МВР информираа дека судија на претходна постапка на едното лице му определи мерка притвор.
Македонија
Битиќи: Просечната пензија ќе ја зголемиме на 30.000 денари
„Просечната пензија ќе биде 30.000 денари, што е зголемување од скоро 9.000 денари или над 40% до 2028 година. Овие покачувања ќе се случат како резултат на новата методологија за пресметка на пензиите која оваа Влада ја воведе со измена на Законот за пензиско и инвалидско осигурување. На овие покачувања, новата Влада предводена од СДСМ ќе обезбеди и новогодишен пакет од 6.000 денари за секој пензионер“, изјави Фатмир Битиќи, коносител на листа на кандидати за пратеници од Изборна единица 2, на „Коалицијата за европска иднина“.
Зброувајќи за зголемување на минималната пензија, Битиќи истакна дека во следниот мандат истата ќе се зголеми на ниво од 20.000 денари, што би било зголемување од 45% до 2028 година.
Битиќи посочи дека во изборната програма предвидено е и енергетски додаток во износ од 1.500 денари за секој пензионер во периодот од октомври до март, односно во времетраење на грејната сезона, со што, како што рече тој, ќе го заштитиме стандардот на нашите највозрасни сограѓани.
„Ова значи дека секој наш пензионер ќе добива по 15.000 денари дополнително годишно, надвор од редовното покачување на пензијата која му следува по закон“, рече Битиќи.
Тој потсети дека минималната пензија во 2016 година изнесуваше 8.900 денари и истата е зголемена за 5.000 денари, и сега изнесува 13.900 денари, што е зголемување за 55% за период од седум ипол години.
„Просечната пензија која во 2016 година изнесуваше 13.800 денари, ја покачивме за 7.600 денари и сега таа изнесува 21.400 денари, или тоа е раст од 55%“, рече Битиќи и истакна овие достоинствени покачувања на пензиите се постигнати и ќе продолжат да се постигнуваат со домаќинско менаџирање со фондот за ПИОМ.
„Тотална спротивност се празните ветувања на ВМРО кое свесно им ветува зголемување од 5.000 денари, кое никогаш нема да се случи, затоа што ни самиот фонд за ПИОМ, ниту централниот буџет може да го понесе товарот од дополнителни 330 милиони евра годишно, за да се оствари ова ветување“, рече Битиќи, притоа порачувајќи дека „Коалицијата за европска иднина“ предводена од СДСМ носи напред, домаќински раководи со државниот буџет и се грижи за сите граѓани.
„Пензионерите да се мирни, бидејќи ние мислиме за нивниот удобен и достоинствен живот“, порача од пред пензионерскиот дом во Чаир Фатмир Битиќи, коносител на листа на кандидати за пратеници од Изборна единица 2, на „Коалицијата за европска иднина“.
Македонија
Митрески: Повисоки пензии, енергетски пакети и зимски регрес, пензионерите заслужуваат подобар стандард
„СДСМ се грижи за сите граѓани, особено за пензионерите. Преку конкретни политики обезбедивме економска сигурност и подобрен животен стандард. Минималната и просечната пензија пораснаа за 50 проценти, обезбедивме континуиран раст на пензиите. Го стабилизиравме Пензинскиот фонд, обезбедивме сигурност“, изјави Јован Митрески, носител во ИЕ 5 од Коалицијата за европска Македонија, предводена од СДСМ.
Тој додаде дека во време на Ковид кризата пензиите беа исплаќани и предвреме со цел да се заштити здравјето на пензионерите. Во таа насока, нагласи Митрески, зајакнат е здравствениот сикстем, реновирани се повеќе клиники и ургентни центри низ државата, а 80 проценти од градежните зафати од реконструкцијата во Специјалната болница за ортопедија и трауматологија „Св. Еразмо“ се завршени.
„Во новиот мандат гарантираме минимална пензија од најмалку 20.000 денари, а просечната ќе достигне 30.000 денари. Ќе воведеме енергетски пакети за пензионерите кои живеат сами, во висина од 1.500 денари месечно во периодот од октомври до март, како и зимски регрес за пензионерите, во износ од 3.000 до 6.000 денари. Највисока поддршка ќе има за пензионерите со пониски пензии“, изјави Митрески и додаде дека ќе се градат и нови домови за стари лица.
Митрески истакна дека ни треба системски пристап, мерки кои се одржливи и кои даваат резултати, а не популистички и наменски решенија, кои само го уриваат системот.
Тој ги повика граѓаните на 24 април и на 8 мај да ја поддржат Коалицијата за европска Македонија, предводена од СДСМ која има План има визија и знае како.