Македонија
Стоматолошките ординации почнуваат со работа
По 44 дена, односно по еден и пол месец пауза, почнуваат со работа сите стоматолошки ординации. Ова следува по препорака на Комисијата за заразни болести. На веб-страницата од Стоматолошката комора е објавен дописот од ФЗО, со кој се наложува и почитување на протоколите и упатствата за работа.
„По препорака на Комисијата за заразни болести, од 13.5.2020 година сите стоматолошки ординации во Република Северна Македонија почнуваат со работа. Со тоа стоматолошките услуги на осигурените лица ќе ги даваат избраните лекари стоматолози и лекарите специјалисти од дејностите орална хирургија, ортодонција и протетика. Притоа сите стоматолошки здравствени установи, кои се во мрежата, се ставаат во рестриктивен режим на работење, со што се должни да се придржуваат кон протоколите и упатствата за работа во услови на сè уште постојна закана од инфекција со Ковид-19, а изготвени од страна на Стоматолошката комора на Северна Македонија“, се наведува во известувањето од ФЗО.
Во протоколите, пак, пишува дека на влезот од ординацијата мора да има крпа со дезинфициенс за обувките, а во чекалницата дезинфициенс за рацете. Пациентите што ќе одат на забар, ќе требаат да ги остават сите предмети што не може да се дезинфицираат во чекалницата, каде што ќе може да чекаат максимум две лица. Задолжително е и носењето заштитна опрема при влегувањето во ординацијата кога ќе му се мери и температурата на пациентот со бесконтактен топломер.
Дополнително, пациентот ќе мора да одговара и на епидемиолошкиот прашалник што ќе го поставува стоматологот по што ќе се одлучи дали ќе може да му се направи интервенција. Стоматолошките термини ќе треба да се закажуваат преку телефонски повик.
Од 30 март до сега работеа само 21 стоматолошка служба во целата држава, од кои, три беа во Скопје, лоцирани во Аеродром, Чаир и Ѓорче Петров.
Во текот на овој период граѓаните со забоболки и отоци се жалеа дека не може да направат интервенција на забите бидејќи се затворени приватните стоматолошки ординации каде што се лекувале. Некои од нив тврдеа дека услуга не можеа да ја добијат ниту во јавните ординации со образложение од вработените дека не ги вклучуваат инструментите за работа, односно не пломбираат, не лекуваат заби, туку даваат само инјекции за смирување болка доколку пациентот ја има. За ваквите случаи, вонреден инспекциски надзор правеше Државниот санитарен и здравствен инспекторат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Димитриевски до Пендаровски: Разликата е огромна, откажете се од оваа битка и оставете нè да победиме во вториот круг
Денеска ЗНАМ заедно со сите свои пддржувачи ја испишува новата политичка историја на македонската политичка сцена, рече вечерва претседателскиот кандидат на ЗНАМ, Максим Димитриевски. Иако е јасно дека не влегува во вториот круг, Димитриевски првиот круг од изборите го смета за голем успех.
„Можам да потврдам дека се роди третата политичка сила во македонскиот политички блок во државата која што имаме намера во следниот период дополнително да ја потврдиме и надградиме, со цел еден ден граѓаните да имаат можност да изберат нешто ново“, рече Димитриевски.
На противкандидатите им честиташе за успехот и се заблагодари на можноста да води кампања за која рече дека не била еднаква за сите оти законот кој е во сила не дава еднаква можност за медиумско претставување на сите партии.
Рече дека е горд на секој глас што го добиле како партија регистрирана пред само три месеци.
„Факт е дека јас како кандидат и ЗНАМ освоивме повеќе од 80.000 гласови. Регистриравме субјект кој постои нешто повеќе од три месеци и со граѓанската поддршка се етаблираше на трето место во политичкиот блок. Сметам дека тоа е одличен појдовен резултат за понатамошна борба. Јас не се сеќавам дека во историјата на плурална Македонија имало вакви примери, да имате партија со некаде три и пол илјади членови, а да освоите над 80.000 гласови. Искрено сум горд на секој тој еден глас што дојде, како поддршка за мене и ЗНАМ. И покрај тоа што трендовите се тие, десницата добива, а левицата губи, единствено десницата доживеа пораз во бастионот на асномска Македонија, а тоа е Куманово“, рече Димитриевски.
Порача на сите политичари дека треба да учат од овие избори оти граѓаните дале јасна насока каде сакаат да се движи државата, а посебна порака упати до Стево Пендаровски, кој освои повеќе 100.000 гласови помалку од Гордана Сиљановска-Давкова.
„Почитуван мој претседателе, разликата е огромна. Доколку сакате да опстане централната и левата идеја во државата, откажете се од оваа битка и оставете не да победиме во име на граѓаните во вториот круг“, порача Димитриевски.
Кога ќе завршат парламентарните избори, Димитриевски е уверен дека ЗНАМ ќе биде политички фактор за стабилност во државата без кој нема да може да се формира идната влада. Најави дека кога ќе ги почнат преговорите за формирање парламентарно мнозинство, на сите политички партии ќе им ги испорачаат нивните предлози за црвените линии на македонскиот народ.
Македонија
ДИК: Сиљановска Давкова освои 324 177, Пендаровски 161 393 гласа по обработени 89,97 отсто
Стево Пендаровски освои 161 393 гласа, 19,90 отсто, Гордана Сиљановска Давкова 324 177 односно 39,97 отсто од гласовите, Стевчо Јакимовски освои 7.499 односно 0,92 отсто од вкупниот број на гласовите.
Кандидатот Бујар Османи освои 110 903, односно 13, 68 отсто, Билјана Ванковска 35.949 односно 4,43 отсто од гласовите, Арбен Таравари 78.110 илјади односно 9,63 отсто, Максим Димитриевски 70,996, односно 8,75 отсто од гласовите се резултатите од обработените 89,97 отсто од гласовите, извести претседателот на Државната изборна комисија, Александар Даштевски.
Тој додаде дека изборниот процес поминал мирно и достоинствено и смета дека 99 отсто работите поминале како што треба.
Македонија
Касами: Добитници на овие избори сме ние, ДУИ има купено гласови
„Влен“ е легитимен претставник на Албанците и ги доби гласовите на Албанците, изјави Билал Касами на прес конференција.
„Добитници на овие избори сме ние, коалицијата „Влен“. ДУИ има купено гласови од загрозените гласачи кои имаат потреби од пари. „Влен“ ги доби гласовите на Албанците, вели Касами.
„ДУИ го загуби последниот легитимитет да зборува во име на Албанците, затоа на 8 мај ние ќе победиме. Овој резултат и во мандати не е голема разлика со ДУИ и на 8 мај овој резултат ќе биде во наша полза. ДУИ успеа да ја загуби последната можност, еден кандидат Албанец да биде избран на директни избори во 2024 година. Тие ќе бидат запишани со црни букви во историјата на албанскиот народ во Македонија. Ако биле заинтересирани Албанец да оди во вториот круг сигурно ќе беа координирани со нас и ќе беше возможно да биде избран Албанец. Затоа мислиме дека вредеше оваа борба“, рече Касами.
Тој се заблагодари на сите што го гласаа кандидатот Арбен Таравари и додаде дека ДУИ има изгубено гласови од помалите етнички заедници и од загрозените граѓани.
Таравари кажа дека коалицијата подоцна ќе разговара за тоа кому ќе ги даде гласовите во вториот круг на претседателските избори.