Македонија
СЈО една година нема мандат да поднесува нови обвиненија – досега 9 условни казни и 3 затворски
Точно една година откако специјалното јавно обвинителство поднесе 17 обвиненија до кривичниот суд против 94 лица и 7 фирми. Заедно со двете обвиненија кои дотогаш беа поднесени, СЈО има вкупно 20 обвиненија. Тимот на Катица Јанева објави дека дел од новоотврените истраги има и такви со кои финишираат, сепак сè уште нема решение за статусот на ова јавно обвинителство, да може да поднесува нови обвиненија.
СЈО работи на комплетирање на истрагите за предметите „Талир“, „Табла“, „Странски служби“, „Друмарина“, „Рентген“, „Продуцент“, „Лидери“, „Тарифа 2“, „Транспортер 2“… Од досегашните поднесени обвиненија вкупно изречени се 9 правосилни условни казни и 3 неправосилни затворски. Обвинителката Јанева изјави дека водат сметка да не застарат кривичните дела.
Првиот предмет за кој СЈО во 2017 година доби првостепена пресуда е предметот за уништувањето на списите за прислушувањето „Тврдина 2“. Но, Апелациониот суд пред 1 месец укина дел од пресудата за ексначалникот на Петтата управа, Горан Грујевски, и судењето за него треба да почне од почеток наесен. Пресудите во овој случај се правосилни само за шесте службенички на УБК кои добија условни казни затвор. Правосилни судски пресуди има за случајот „Насилство“, во кој, Томислав Лазаров и Јордан Ристевски признаа вина и исто така добија условни казни. Лани вина призна и службничката од УБК, Елена Џиланова, за предметот „Тврдина-Таргет“ при што се спогоди со Обвинителството и доби условна казна.
Неправосилни пресуди има и за предметите „Тенк“, каде експремиерот Никола Груевски и помошникот-министер, Ѓоко Поповски, добија затворски казни. Поповски беше осуден на затворска казна и за предметот „Триста“, за набавката на полициски возила. Неправосилна пресуда има и во предметот „Тифани“, во кој, по признанието дека е виновна, условна казна доби новинарката Ивона Талевска. За висината на казната закажана е јавна седница во Апелациониот суд, каде СЈО за неа бара построга санкција.
Пред почетокот на судската ферија пресуда може да биде изречена само за предметот „Труст“, бидејќи се закажани 10 нови бомби, како дополнување на доказите на СЈО и завршни зборови. За најстариот предмет на СЈО, случајот „Насилство пред Општина Центар“ сè уште нема пресуда. Судењето почна во 2016 година, но и по речиси 2 години, освен двете признанија за вина, сè уште е во фаза доказната постапка.
Во нацрт- стратегијата за реформа на правосудниот сектор за периодот од 2017 до 2022 година, пишува дека специјалното јавно обвинтиелство ќе добие проширена надлежност, и ќе гони и кривични дела од висок профил на корупција (white-collar crime). Сè поизвесно е дека СЈО ќе биде автономно во рамки на Јавното обвинителство, но, законските измени сè уште не се донесени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Таравари од централниот митинг во Струга: Зголемување на минималната плата до 800 евра за борба против имиграцијата
Кандидатот за претседател од редовите на ВЛЕН, Арбен Таравари, ја изрази својата заложба за борба против имиграцијата преку зголемување на минималната плата во нашата земја. Во рамките на идната влада се планира зголемување на платите и до 800 евра, со што ќе се создадат нови можности младите мажи и жени да останат и да придонесат за развојот на државата.
Преку грантови за технологија и иновации, Таравари рече дека владата има за цел да ги поддржи нивните креативни идеи, фокусирајќи се на развојот на земјата како атрактивна алтернатива за младите.
„Иселувањето кај нас е над секоја норма, бројките се алармантни. Не можеме да останеме рамнодушни на оваа ситуација. Така како следна влада на ВЛЕН ќе донесеме одлука за покачување на платите. Ќе се заложиме минималната плата до крајот на нашиот прв владејачки мандат да биде 800 евра. Преку грантови за технологија и иновации, ќе ги поддржиме младите мажи и жени со нивните креативни идеи, кои првенствено служат за нашиот развој како држава. Ова ќе биде дополнителна причина да ја гледаат иднината овде со нас, недалеку од нивните домови, недалеку од нивниот роден град“, рече Арбен Таравари на централниот митинг во Струга.
Македонија
(Видео) Силјановска -Давкова: На 9 мај ќе го славиме Денот на победата над фашизмот и Денот на Европа, но ќе славиме и за Македонија
„На 9-ти мај ќе го прославуваме Денот на победата над фашизмот и Денот на Европа! На 9-ти мај, ќе ја славиме Македонија како твоја и Македонија како горда! Ви ветуваме дека ќе докажеме дека нема да ве срамиме, дека нема да ги заборавиме државните и нациолнални интереси, кои тие не само што ги заборавија, туку и ги погазија! Молам за доверба!“, рече Горданa Силјановска -Давкова, кандидат за претседател на Македонија.
„Верувајте ми, има моменти во историјата! А таков е овој, кога мора да сме заедно! Кога како никогаш досега, потребна ни е вашата поддршка! Без вас не може да направиме единство! Без вас Македонија не може да биде ниту твоја, ниту горда! Без вас не може да дојдеме до победа! Вие го имате првиот и последниот збор! Ви веруваме!
Денес е Денот на светското културно наследство. Охрид е незаменлив и ценет, драгоцен дел од него. Охрид е споменик и дом на европското христијанство! Да го чуваме! Не заборавајте: Без Охрид, Македонија нема да биде почитувана!
Час поскоро, активирајте го универизтетот на Плаошник! Оваа власт не знае што е култура, за неа културата е бизнис. Ако започна изградбата во времето на ВМРО-ДПМНЕ, мора да доврши.
Во насока на јакнење на културниот туризам ќе покренам организирање на меѓународен форум – Плаошник форум, на кој ќе се дискутира соработката на цивилизациите, религиите и културите. Сето ова во соработка со УНЕСКО и Министерството за култура! Упатувам порака дека: Плаошник може да биде центар на дијалог на цивилизациите! Дијалог на религиите! Центар на културен дијалог! Затоа сум горда на него!“, додаде Горданa Силјановска -Давкова.
Македонија
Мицкоски: Повикувам на обезбедување на македонско национално единство, обзнанувам мораториум и запирање на сите напади кон партиите Левица и ЗНАМ
Нашето име е ВМРО-ДПМНЕ, ВМРО – демократска партија за македонско национално единство. Тоа е многу силно име, кое не само заради историското ВМРО и континуитетот на кој се повикуваме како идеја и организација која ја славиме и која е нераскинлив дел од македонското национално движење и можеби најзначајна за македонскиот национален идентитет, туку истовремено и поради обврската и одговорноста која и вториот дел од името ја носи со себе, рече претседателот на ВМРО-ДПМНЕ, Христијан Мицкоски од големиот народен митинг во Охрид, од каде што традиционално ВМРО-ДПМНЕ ја почнува кампањата за парламентарните избори.
Мицкоски посочи дека долго време таа обврска и одговорност како да се одбегнуваше, а понекогаш и се занемаруваше и никогаш како сега не било важно како сега да се случи обединување, да се обезбеди национално единство.
„Мојата прва иницијатива за обезбедување на македонско национално единство ќе ја започнам со тоа што сакам да обзнанам мораториум во нападите кон партиите Левица и ЗНАМ. Ова го чувствувам како потреба на македонскиот народ но, и како моја обврска да се обидам да ја реализирам идејата за национално единство во моменти кога таа и е најпотребна на Македонија“, рече Мицкоски.
Додаде дека со Левица и ЗНАМ, ВМРО-ДПМНЕ има свои разлики по повеќе прашања и од идеолошка но и од принципиелна природа, но смета дека во моментов, најважно за Македонија е да се фокусираат на оние кои што ја киднапираа државата од граѓаните.
„Но, ценам дека во моментов најклучно за иднината на земјата е да се фокусираме на оние кои ја киднапираа Македонија од рацете на граѓаните. Разидувањата сигурно ќе продолжат, но мора да наоѓаме заеднички јазик без разлика на лични и партиски суети и интереси. Од нив не очекувам да го направат истото. Дури можеби и ќе ме нападнат за овој гест, можеби некои оправдано ќе кажат дека задоцнет, но и покрај тоа, како и да се однесуваат споменатите партии, ние како партија ќе опстоиме на нашиот збор“, порача Мицкоски.