Македонија
Тренчевска: Германија е наш поддржувач во унапредување на работничките права, социјалната заштита и родовата еднаквост
Министерката за труд и социјална политика Јованка Тренчевска денеска оствари средба со германската амбасадорка во земјава Анке Холштајн и заменик-амбасадорот и раководител на економскиот сектор во германската амбасада, Ото Граф.
На средбата се разговараше за областите кои се во надлежност на Министерството за труд и социјална политика, а во кои има тесна соработка со Република Германија, како што се работните односи, социјалната заштита, родовата еднаквост, заштитата од дискриминација и превенција и заштита од трговија со луѓе.
Министерката Тренчевска потенцираше дека унапредувањето на работничките права, статусот на работниците и воопшто подигнувањето на животниот стандард на граѓаните е приоритет на Владата и Министерството за труд и социјална политика. Во таа насока таа информираше дека денеска измените на Законот за минимална плата ќе бидат претставени пред пратениците во Собранието на Северна Македонија.
„Низ социјален дијалог, се донесе најодржливото решение за утврдување на минималната плата. Заедно со социјалните партнери преку отворена дискусија, дојдовме до решение кое одговара на сите засегнати страни. Минимална плата од 18.000 денари и измена во критериумите за годишно усогласување на минималната плата со 50% од годишниот раст на просечната плата и 50% од растот на трошоците за живот. Притоа, таа нема да биде пониска од 57 % од просечната плата објавена од Државниот завод за статистика, за претходната година“, рече Тренчевска.
Министерката рече и дека Владата обезбедува финансиска поддршка за работодавачите во делот на придонесите на нето зголемената минимална плата.
Германскиот заменик-амбасадор Граф рече дека од страна на германските инвеститори во државата ова решение има голема поддршка, како и дека тие се стремат кон достигнување на европски плати и за работниците во Северна Македонија.
Од страна на германската амбасадорка беше посочено дека постоењето на социјален дијалог во општеството е од особено значење, но и чувството на граѓаните дека се дел од него, преку мерки и политики кои се во нивни интерес.
На средбата стана збор и за законското решение недела -ден на неделен одмор, во смисла на исклучоците и неопходноста на одредени дејности да работат во недела, кои законот ги предвидува, а согласно тоа работниците да добијат надомест за работа во недела и слободен ден, во текот на следните седум дена.
Соговорниците ја потврдија одличната соработка на Министерството со Германското друштво за меѓународна соработка GIZ, на полето на социјалното претприемништво, формализација на сезонската, неформална работа, трговија со луѓе, како и антидискриминацијата и политиките за родова еднаквост.
Министерката рече дека Законот за заштита од дискриминација има големо значење и во однос на усогласување на нашето со европското законодавство, но и за нашите граѓани, потоа Законот против насилство на жените и заштита од друг вид на насилство и новиот предлог-закон за родова еднаквост, кој е во финална фаза, се актуелните Закони за кои Министерството одговорно застана.
Соговорниците изразија подготвеност на продолжување на добрата соработка и негување на добрите пријателски односи и во иднина.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Димитриевски до Пендаровски: Разликата е огромна, откажете се од оваа битка и оставете нè да победиме во вториот круг
Денеска ЗНАМ заедно со сите свои пддржувачи ја испишува новата политичка историја на македонската политичка сцена, рече вечерва претседателскиот кандидат на ЗНАМ, Максим Димитриевски. Иако е јасно дека не влегува во вториот круг, Димитриевски првиот круг од изборите го смета за голем успех.
„Можам да потврдам дека се роди третата политичка сила во македонскиот политички блок во државата која што имаме намера во следниот период дополнително да ја потврдиме и надградиме, со цел еден ден граѓаните да имаат можност да изберат нешто ново“, рече Димитриевски.
На противкандидатите им честиташе за успехот и се заблагодари на можноста да води кампања за која рече дека не била еднаква за сите оти законот кој е во сила не дава еднаква можност за медиумско претставување на сите партии.
Рече дека е горд на секој глас што го добиле како партија регистрирана пред само три месеци.
„Факт е дека јас како кандидат и ЗНАМ освоивме повеќе од 80.000 гласови. Регистриравме субјект кој постои нешто повеќе од три месеци и со граѓанската поддршка се етаблираше на трето место во политичкиот блок. Сметам дека тоа е одличен појдовен резултат за понатамошна борба. Јас не се сеќавам дека во историјата на плурална Македонија имало вакви примери, да имате партија со некаде три и пол илјади членови, а да освоите над 80.000 гласови. Искрено сум горд на секој тој еден глас што дојде, како поддршка за мене и ЗНАМ. И покрај тоа што трендовите се тие, десницата добива, а левицата губи, единствено десницата доживеа пораз во бастионот на асномска Македонија, а тоа е Куманово“, рече Димитриевски.
Порача на сите политичари дека треба да учат од овие избори оти граѓаните дале јасна насока каде сакаат да се движи државата, а посебна порака упати до Стево Пендаровски, кој освои повеќе 100.000 гласови помалку од Гордана Сиљановска-Давкова.
„Почитуван мој претседателе, разликата е огромна. Доколку сакате да опстане централната и левата идеја во државата, откажете се од оваа битка и оставете не да победиме во име на граѓаните во вториот круг“, порача Димитриевски.
Кога ќе завршат парламентарните избори, Димитриевски е уверен дека ЗНАМ ќе биде политички фактор за стабилност во државата без кој нема да може да се формира идната влада. Најави дека кога ќе ги почнат преговорите за формирање парламентарно мнозинство, на сите политички партии ќе им ги испорачаат нивните предлози за црвените линии на македонскиот народ.
Македонија
ДИК: Сиљановска Давкова освои 324 177, Пендаровски 161 393 гласа по обработени 89,97 отсто
Стево Пендаровски освои 161 393 гласа, 19,90 отсто, Гордана Сиљановска Давкова 324 177 односно 39,97 отсто од гласовите, Стевчо Јакимовски освои 7.499 односно 0,92 отсто од вкупниот број на гласовите.
Кандидатот Бујар Османи освои 110 903, односно 13, 68 отсто, Билјана Ванковска 35.949 односно 4,43 отсто од гласовите, Арбен Таравари 78.110 илјади односно 9,63 отсто, Максим Димитриевски 70,996, односно 8,75 отсто од гласовите се резултатите од обработените 89,97 отсто од гласовите, извести претседателот на Државната изборна комисија, Александар Даштевски.
Тој додаде дека изборниот процес поминал мирно и достоинствено и смета дека 99 отсто работите поминале како што треба.
Македонија
Касами: Добитници на овие избори сме ние, ДУИ има купено гласови
„Влен“ е легитимен претставник на Албанците и ги доби гласовите на Албанците, изјави Билал Касами на прес конференција.
„Добитници на овие избори сме ние, коалицијата „Влен“. ДУИ има купено гласови од загрозените гласачи кои имаат потреби од пари. „Влен“ ги доби гласовите на Албанците, вели Касами.
„ДУИ го загуби последниот легитимитет да зборува во име на Албанците, затоа на 8 мај ние ќе победиме. Овој резултат и во мандати не е голема разлика со ДУИ и на 8 мај овој резултат ќе биде во наша полза. ДУИ успеа да ја загуби последната можност, еден кандидат Албанец да биде избран на директни избори во 2024 година. Тие ќе бидат запишани со црни букви во историјата на албанскиот народ во Македонија. Ако биле заинтересирани Албанец да оди во вториот круг сигурно ќе беа координирани со нас и ќе беше возможно да биде избран Албанец. Затоа мислиме дека вредеше оваа борба“, рече Касами.
Тој се заблагодари на сите што го гласаа кандидатот Арбен Таравари и додаде дека ДУИ има изгубено гласови од помалите етнички заедници и од загрозените граѓани.
Таравари кажа дека коалицијата подоцна ќе разговара за тоа кому ќе ги даде гласовите во вториот круг на претседателските избори.