Македонија
Тренчевска: Отворањето на двата групни домови во Демир Капија, потврда за продолжување на деинституционализацијата
„Со процесот на деинституционализација ги остваруваме нашите заложби за едно општество за сите, за еднакви права и можности за сите наши граѓани и сегрегацијата ја менуваме со интеграција. Различностите не се нешто од што треба да се плашиме и треба да научиме да живееме со нив“, рече министерката за труд и социјална политика, Јованка Тренчевска, на денешното отворање на две станбени единици за живеење со поддршка во општина Демир Капија.
Таа истакна дека министерството продолжува да ги вложува сите свои капацитети за реализација на државните стратешки приоритети, а тоа е Националната стратегија за деинституционализација 2018-2027 „Тимјаник“.
„Во овие нови променети услови, најблиски до семејните, ќе живеат наши сограѓани, со обезбедена 24-часовна поддршка од стручни лица, кои ќе се грижат за нивната социјална, здравствена и емотивна благосостојба, согласно нивните потреби. На овој начин ги интегрираме во секојдневните животни текови и им обезбедуваме еднакво учество во општеството на рамноправна основа“, рече Тренчевска.
Според градоначалникот на Демир Капија, Лазар Петров, отворањето на двете станбени единици како дел од проектот ОАСИС каде што и самата општина е партнер, ќе бидат синоним за интеграција, инклузија и заеднички соживот.
„Како општина и градоначалник во иднина ќе ги поддржуваме сите социјални услуги во општината, лицата со попреченост ќе бидат високо во нашата агенда и во иднина ќе се залагаме да овозможиме повеќе услови за надоградување и отворање нови иновативни социјални услуги засновани во заедницата, согласно општинскиот план за социјална заштита усвоен во 2021 година. Демир Капија е препознатлива и ќе остане во иднина како општина која нуди можности за сожителство, разбирање и почитување на сите човекови права,“ рече Петров.
Социјалната услуга, живеење со поддршка која ја дава Здружението „Хуманост“ како лиценциран давател, овозможува подобрување на квалитетот на животот на корисниците на оваа услуга, професионално, ефективно и ефикасно давање на услугата кон крајните корисници од страна на стручниот кадар, каде што корисникот секогаш е во центарот на вниманието, а во исто време се задоволуваат неговите потреби. На овој начин на нашите корисници им овозможуваме топол семеен дом и можност секој согласно своите интереси да си го најде своето катче“, рече Сашко Јованов, извршен директор на „Хуманост“, лиценциран давател на социјалната услуга живеење со поддршка во Општина Демир Капија.
„Сите објекти за рехабилитација и психосоцијално зајакнување на нашите сограѓани се проекти од големо значење. Тие ја одразуваат важноста што едно општество им ја дава на потребите на најранливите лица, а со тоа и на важноста на вредностите што ги промовира“, рече Кристина Василеска, преставник на невладината организација, KMOП.
Министерката Тренчевска изрази благодарност за поддршката на Делегацијата на Европската Унија, локалната самоуправа на Демир Капија и граѓанската организација „Хуманост“ како клучни партнери во процесот на деинституционализацијата.
Денес, помалку од 200 корисници се сместени во социјални установи или речиси за 60% е намален бројот на корисници. Тоа потврдува дека социјалните политики и активности и покрај сите предизвици на деинститционализацијата успешно се спроведуваат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Таравари по веста дека имал тајна средба со Ахмети: Тоа е лага, но навикнат сум на понудите на Ахмети и не би било изненадување доколку дојде до мене
Претседателскиот кандидат на албанската опозициска коалиција „Вреди“, Арбен Таравари ја демантира веста дека вчера тајно се сретнал и добил понуда од претседателот на Демократската унија за интеграција, Али Ахмети по резултатите од претседателските избори.
„Со жалење денеска од еден многу сериозен албански медиум дознав дека синоќа се сретнав со господинот Ахмети и други функционери на ДУИ, за да слушнам понуда од господинот Ахмети. Не, не е вистина“, пишува Таравари ан социјалните мрежи.
„Кој ја кажал оваа вест лаже“, додава тој во напишаното.
„Синоќа му честитав на мојот тим и мирно денес продолжуваме со нашата работа кон промена! Навикнат сум на понудите на Ахмети и мислам дека не би било изненадување доколку дојде до мене, но оваа вест е лажна“, потенцира Таравари.
Македонија
Тодоровска: Документите за историјата на македонската држава мора да се заштитат и чуваат соодветно зашто ние сме менливи и минливи, но Македонија мора да постои
Кандидатката за пратеник во ИЕ 1 во Собранието на Македонија на претстојните парламентарни избори, од редовите на Движењето ЗНАМ – За наша Македонија, Катерина Тодоровска, одржа прес-конференција, на која се задржа на тоа зошто Движењето се определило во своите основни документи да ги стави Илинден и АСНОМ.
Таа рече дека современата македонска држава е формирана благодарение на вековната борба на македонскиот народ и останатите жители, за самостојна држава, каде би биле свои на своето. Тодоровска објасни дека во историјата постојат формално, пишано, и неформално, непишано, право, како што го толкуваат историчарите.
„Создавањето на државите, без исклучок, во историјата се одвивало врз основа на стекнато право коешто ние го третираме како непишаното право. Тоа значи дека еден народ може да се повика на историско право за создавање на нова и опстојување на новата држава само врз основа на два принципа. Првиот е принципот на континуитет, т.е. доколку некој народ во минатото имал сопствена држава со сите законски и правно регулирани перформанси. Вториот е принципот на крвта, т.е. колку крв е пролеана за таа територија, за тој народ“.
Тодоровска рече дека ние како Македонци не можеме да се повикуваме по првиот принцип, бидејќи сме немале некоја царска лоза помогната од странски династии како што е тоа случајот во создавањето на државите на нашите соседи, а што се однесува до вториот, принципот на крвта, Илинденското востание и АСНОМ се најголемите и најкрвави показатели за потребата на македонското население да биде самостојно и е подготвено да се жртвува за својот сон – своја држава. За тоа, како што рече таа, сведочи и фактот што ниту една од странските држави не се потрудила ниту да помогне, ниту да ја смири состојбата кога цели села во крушевско по Илинден, заедно со жителите биле пеплосувани. Тодоровска додае дека Крушевската република и нејзниот Манифест се одраз и израз на најдемократска политичка творба во почетокот на 20. век. Следната жртва на македонскиот народ се годините од народно-ослободителната војна 1941-1944 година, која била крунисана со АСНОМ и неговите одлуки. Благодарение на АСНОМ биле донесени шесте најважни документи за формирање на македонската државна единица, меѓу кои и Решението за прогласување на АСНОМ за Врховно Законодавно и Извршно Народно претставничко тело, како и Прогласот на Првото заседание на АСНОМ до македонскиот народ и до целото население кое живеело во македонската држава.
„Документите за историјата на македонската држава од 12 век наваму, а со тоа и најзначајните документи од Илинден и АСНОМ се чуваат во Државниот архив. За жал, таа бесценета документација денес е сместена во несоодветни услови, нешто што ќе бара итна реакција на новата власт за нејзино враќање во наменската зграда. Сите ние што знаеме дека историјата е учителка на животот, но и патоказ за иднината, знаеме и колкава е важноста на бесценетата документација која говори за македонското минато во креирањето на иднината на македонската драва.
Затоа како совесни чувари на македонското минато, ние имаме обврска да ги зачуваме, покрај другите, и документите од овие два грамадни историски столбови на македонската историја, Илинден и АСНОМ“, рече Тодоровска и додаде дека Програмата “Проглас за достоинствена Македонија” на Движењето ЗНАМ – За наша Македонија се залага за обезбедување на патот од минатото кон иднината, вложувајќи се максимум за Македонија, преку максимум заштита на историските корени и националните интереси на македонската драва. Запрашана зошто сега се покренува ова прашање кога со уставните измени при промената на името делумно се редефинираше прогласот од АСНОМ, кои се позициите и што се бара, Тодоровска одговори:
„Едно е да се редефинира, друго е историја. Иторијата не трпи редефинирање, не трпи туширање. Најмалку пак трпи произволност. Она што е многу битно сега е да си ја заштитиме нашата документација. Да ги заштитиме сите темелни документи коишто ги имаме. Доколку се отвора Уставот треба да се говори многу искрено и многу отворено за сите прашања и сите грешки коишто се направени. Она што досега нам, како на историчари, најмногу ни пречи е ставот на партиите коишто имаат едно чувство дека се непогрешливи. Непогрешливоста не постои, секој од нас може да згреши, но секој од нас треба да си ја признае грешката, да си ја исправи грешката и на крајот ние сме сите менливи и минливи, но Македонија мора да постои“, потенцира Тодоровска.
Македонија
Ганиу до Груби: Терапијата ти ја препишува доктор Арбен, ќе ја примиш на 8 мај
По прозивките за оставка, градоначалникот на Чаир, Висар Ганиу му врати на Артан Груби.
„Артан, терапијата ти ја препиша доктор Арбен, ќе ја примиш на 8 мај’, му порача на социјалните мрежи Ганиу на Груби.
Ваквата реакција следува откако вицепремиерот и министер за политички систем од редовите на ДУИ, Артан Груби донесе куфер пред општина Чаир и побара оставка од политичарите од албанската здружена опозиција, по синоќешниот резултат од првиот круг на претседателските избор. Груби се појави со куфер пред општина Чаир и на албанската опозиција и порача да ги депонира оставките.