Во рамките на нејзината кампања, денеска кандидатката за претседателка на Македонија, Гордана Сиљановска-Давкова, во неформална и пријатна атмосфера се сретна со нејзиниот универзитетски колега и поранешен претседател на Република Македонија, професор д-р Ѓорѓе Иванов, во неговиот роден град Валандово,

Соговорниците, како што е наведено во соопштението, имаа можност да поразговарат на многу теми и да споделат искуства за кампањите, како и за двата мандати на поранешниот претседател кои беа исполнети со многу предизвици.

Тие заклучија дека размената на искуства и мислења се значајни за престојниот период во Македонија.

После шест и половина години порази, омаловажувања и срам кои ги трпеа граѓаните во Македонија поради власта на ДУИ и СДС, редно е да ја ослободиме Македонија од овие пранги и да ја направиме и горда заедно со народот. Да ја вратиме Македонија повторно на народот, изјави претседателот на ВМРО-ДПМНЕ, Христијан Мицкоски на денешниот митинг во Гевгелија.

Мицкоски истакна дека денеска постојат граѓани од прв ред и тоа се тие кои орбитритраат околу раководството на ДУИ и нивните измеќари од СДС и тие ги уживаат сите привилегии, за нив не важат закони, местат тендери, го ограбуваат народот, никому сметка не полагаат за тоа што го прават изминативе 6 и половина година и останатите граѓани се од втор ред.

Затоа се создава чувство кај младите, кај граѓаните дека не е само економската причина зошто се напушта Македонија, туку и дека нема правда, бидејќи неправда има насекаде. Несигурност, немање перспектива бидејќи има граѓани од прв ред за кои ништо не важи и сите останати се од втор ред, додаде Мицкоски.

Мицкоски нагласи дека во минатото СДС продаваа лага за живот и дека ќе донесат едно општество за сите, а сега состојбата е што „Фридом хаус“, реномирана институција вели дека споредено со состојбата пред 6 и половина, 7 години, уназадуваме и според ниво на корупција и според ниво на демократија.

„Што значи дека слободата е помала, а грабежот на народот не е помал, а парите завршија кај неколкумина во нивните џебови. Тие така го замислуваат животот и општеството за сите. Редеа чевли пред влада и викаа дека се ќе сторат да ги вратат младите кои се иселија, но никој не дојде по своите чевли, но затоа 10 пати повеќе се иселија. Ниту ги вратија младите, и денеска имаме цикличен хибриден режим“, изјави Мицкоски.

Мицкоски посочи дека СДС велеа ќе донесат европско здравство, во лажната кампања за референдумот, а во првите 5 држави во светот сме според смртноста за време на пандемијата.

„Тој кој беше најодговорен за здравствениот систем, министерот денеска редејќи ги сите тие неуспеси, необезбедувајќи основни услови, одлучува повторно да се врати во политика и ја злоупотребува професијата лекар и народот, рече Мицкоски.

Говорејќи за Стево Пендаровски истакна дека 5 години никаде го немаше, ниту со земјоделците, ниту со пензионерите, ниту со младите, но затоа „ќе го слушнете како ја навредува професорката Силјановска Давкова или како ако не е претседател ќе се исели и како ќе каже дека Гоце Делчев е Бугарин“.

„Тоа е Стево Пендаровски, човекот кој 5 години не даде став, 5 години анализираше и ќе го слушнете на митинзи како вели не правел криминал и го осудувал криминалот. Дали сте го слушнале Пендаровски изминативе 5 години да ги спомене Али Ахмети, Артан Груби, Бујар Османи, Талат Џафери и дали за него се чесни политичари? Бидејќи нема никаков глас да каже нешто за нив кои ја практикуваат политиката по принципот „како до сега“.

Мицкоски посочи дека од една страна е Стево Пендаровски кој на граѓаните им вика дека не сака очи да им види ако не го гласаат, а од друга страна е Гордана Силјановска Давкова, жена борец, сопруга, мајка која во парламентот покажа како треба да се брани македонскиот идентитет.

„Секогаш е во врвот во првите тројца дискутанти во Собранието цени 4 години и не само во Парламентот, туку и како професор и експерт таа беше дел од Совет на Европа и Венецијанска комисија и реномирани институции каде и ден денес ја цитираат колеги во нивните научни трудови. А како професор студентите во неколку наврати ја бираа како најинспиративен професор. Затоа ве повикувам на масовна излезеност на 24 април, а потоа и на 8 мај, да ја направиме Македонија горда повторно и твоја, достоинствена“, рече таа.

„Сериозно навлеговме во кампањата следната среда е првиот круг на претседателски избори, мислам дека на сите им е јасно и мислам дека сите гледаат дека ВМРО-ДПМНЕ убедливо ќе победи, Гордана Силјановска Давкова ќе е нов претседател на Македонија“, истакна Александар Николоски, потпретседател на ВМРО-ДПМНЕ и носител на листа на ИЕ4 од митингот во Валандово.

„Мислам дека она што е клучно за периодот кој што доаѓа е да се обратиме до сите што ги познаваме, да поразговараме и да ги поканиме да излезат на гласање. Исто така сите оние кои што се надвор од Македонија во дијаспората доколку се во можност да дојдат и да гласаат, затоа што секој глас ни е потребен секој човек ни е потребен за победата да биде убедлива и никој да не ја оспорува владата предводена од ВМРО-ДПМНЕ“, нагласи Николоски.

Николоски додаде и дека тажната вистина е дека кога одиме во дијаспората, бевме и во Франција и во Австрија и Швајцарија помеѓу нашите и за жал се повеќе наши луѓе гледаме таму. Луѓе кои што минатата кампања ги гледав овде во Валандово, сега за жал ги видов во дијаспората, тие за жал се иселиле. Тоа е тажната вистина на ова темно владеење на ДУИ и СДСМ овие 7 години. И на тоа мора да ставиме точка, на тоа мора да ставиме крај.

„Затоа што овие избори се пресвртница и од овие избори ќе биде определена иднината на Македонија. Ние сакаме просперитетна и развиена Македонија. Ние сакаме Македонија во која што владее правото, ние сакаме Македонија која што ќе напредува“, истакна Николоски.

Николоски посочи и дека СДСМ веројатно не ни размислуваат за такви работи единствено што размислуваат е како да приграбат нешто за себе. А овие од ДУИ многу добро знаат што сакаат но тоа што го сакаат не е во корист ниту за Македонија ниту на Македонците, тоа е во корист на една мала клика околу врвот на партијата која што мисли само за себе и за оние околу нив. Затоа ни е потребна масовна излезност. Затоа следната среда треба да излезете сите, да ги поканете сите да излезат да гласаат и да ставиме крај тоа да е вовед во големата победа на 8 мај.

„Го гледам Стево Пендаровски на почеток беше нервозен сега покрај нервозен и навредува не знам што ќе се случи до крајот на кампањата. Од СДСМ едниот скоро и да го снема, никој не се сеќава дека беше премиер на Македонија а уште помалку мислам дека луѓето знаат дека е претседател на СДСМ се вика Димитар Ковачевски. Единствено по што ќе биде запаметен е дека заедно со другар му Бујар Османи го потпишаа таканаречениот француски предлог со кој што решија да ја распродаваат македонската историја и култура“, нагласи Николоски.

Тој истакна дека во 4-та изборна единица носител е Венко Филипче.

„Кој што гледам дека освен што злоупотребува пациенти и ја злоупотребува сопствената професија ништо друго и не прави. Но не ми одговори па би сакал да го прашам од тука дали е вистина дека има ангажирано пи ар агенција која што треба да работи на промоција на неговиот имиџ, дали името на таа пи ар агенција е „Рејтинг“ сопственост на Никола Спасов син на поранешниот генерален секретар на СДСМ, Ѓорѓи Спасов и дали таа пи-ар агенција ја плаќа по минимум 100 евра по објавен текст за Венко Филипче. И финалното прашање од каде доаѓаат тие пари, кој ги обезбедува тие пари и како тие пари преку агенцијата Рејтинг стигнуваат до медиумите“, кажа Николоски.