Македонија
(Видео) Шекеринска на состаноци на министри за одбрана на НАТО – Алијансата во Брисел
Министерката за одбрана, Радмила Шекеринска, денеска во седиштето на НАТО во Брисел учествува на министерски состаноци на Северноатлантскиот совет на Алијансата. Ова е второ учество на министерката на состанок во формат министри за одбрана, по учеството на овој состанок на 13 и 14 февруари годинава, веднаш по потпишувањето на пристапниот протокол за членство и стекнувањето на статус – земја поканета за членство во Алијансата.
Шекеринска пред првиот состанок истакна дека нашата држава веќе е присутна на сите состаноци на Алијансата и дека активно учествуваме со свои ставови.
„Нашето учество на овие состаноци ја зголемува нашата моќ, нашата сила и нашето значење како држава, а тоа на граѓаните им нуди поголема безбедност и поголеми шанси за економски раст“, рече министерката.
Во контекст на ратификациониот процес кој се очекува да биде завршен до министерскиот состанок во декември, министерката го изрази своето задоволство што иако тој е тежок и комплициран, во случајот со Северна Македонија се движи исклучително брзо и ефикасно, без проблеми и одложувања.
„Денеска сум тука како земја која што е во процес на ратификација, но и фактот дека 19 земји – членки за многу кус временски период завршија со процесот на ратификување, го покажа политичкиот сигнал. И ние сметаме дека треба час поскоро да станеме земја членка, а во тоа сме ги убедиле и останатите земји – членки на Алијансата“, потенцираше министерката.
Шекеринска истакна дека на дводневниот министерски состанок ќе се дискутира за теми кои што се однесуваат на безбедноста која што влијае на НАТО земјите, меѓутоа и во еден глобален контекст. Тоа ,рече министерката, се теми како жариштата низ светот, но и односите со Русија, односите внатре во Алијансата во поглед на издвојување на средства за одбраната.
Шекеринска денеска на маргините на состанокот ќе има одвоени билатерални средби со колеги – министри за одбрана на земји – членки на Алијансата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Видео) Мицкоски: Не очекувам власта да престане со црната кампања
Црната кампања е карактерна особина на оваа влада. Не очекуваме дека ќе престане таа нивна црна кампања која изобилува со монтажи, со навреди, со многу измислици и клевети, вели претседателот на ВМРО-ДПМНЕ, Христијан Мицкоски при посетата на општина Гевгелија, запрашан од новинарите дали во пресрет на почеток на изборната кампања очекува фер кампања од власта.
Тој истакна дека, што се однесува до ВМРО-ДПМНЕ, нема да води црна кампања затоа што македонските граѓани знаат дека Македонија од осамостојувањето немала полоша влада, од оваа на СДСМ и ДУИ и затоа ќе води позитивна кампања со презентација на проекти и решенија за проблемите на граѓаните.
„Нашата цел е во оваа кампања да водиме позитивна кампања, односно да зборуваме за проекти и да зборуваме за решенија на проблемите на граѓаните, а не да се оптеретуваме со тоа, кој колку бил лош бидејќи сите граѓани знаат дека владата на СДСМ и ДУИ беше лоша. Односно, да бидам попрецизен, полоша влада од осамостојувањето на Македонија немало“, рече Мицкоски.
Македонија
Мицкоски: Владата на ВМРО-ДПМНЕ со обновливи извори на енергија ќе обезбеди поголемо и поквалитетно снабдување со електрична енергија
Претседателот на ВМРО-ДПМНЕ, Христијан Мицкоски од Гевгелија одговарајќи на новинарски прашања истакна дека идната влада предводена од ВМРО-ДПМНЕ ќе вложува во обновливи извори на енергија како што е ветерниот парк Богданци, со цел поголемо и поквалитетно производство на електрична енергија.
Во овој регион недалеку се гледа ветерниот пак Богданци кој го реализираше владата на ВМРО-ДПМНЕ, продолжуваме и понатаму исто во околината, втората фаза, но и други можности се испитуваат за одреден вид на јавно приватно партнерство помеѓу денешно ЕСМ и приватни инвеститори за изградба на вакви енергетски капацитети, со што ќе се зголеми производното портфолио од обновлива енергија во Македонија, рече Мицкоски.
Мицкоски додаде дека на тој начин ќе се обезбеди поквалитетно снабдување со електрична енергија до нашите граѓани, а воедно порача дека ќе се укине таксата за пристап до мрежа која ја наметна оваа власт.
– Она кое е важно, онаа наметната такса за пристап до мрежата која ја наметна октроираниот претседател на Регулаторната комисија за енергетика, целосно партизираниот Бислимовски, ќе биде укината. Цениме дека нема потреба од таков тип на оптоварување на граѓаните, изјави Мицкоски.
Македонија
Собранието ги изгласа измените на Законот за извршување на санкциите
Собранието со 78 гласа „за“ го донесе предлог-законот за измени и дополнување на Законот за извршување на санкциите.
Законот има цел решавање на безбедносните проблеми во казнено-поправните установи, создавање посигурна безбедносна средина како во затворите така и генералната и општата безбедност во државата, пред сè, преку воспоставување законска основа и формирање единици за затворско разузнавање и единици за интервенции, воспоставување систем за видеонадзор и користење боди-камери во установите, намалување на корупцијата во казнено-поправните установи, решавање на проблемот со пренатрупаноста и регулирање и унапредување на правата од работниот однос на сите категории вработени лица во КПУ и ВПУ, извести Министерството за правда.
Покрај зголемување на безбедноста на установите, унапредување на правата на осудените лица и децата, со овој предлог-закон се оди кон подобрување на статусот и на вработените во пенитенцијарниот систем. Постојат повеќе причини за донесување на предлог-законот за измени и дополнувања на Законот за извршување на санкциите, како, на пример, менување во голем дел на кривичното законодавство во земјата, со тоа и предлог-законот за измени и дополнувања на Законот за извршување на санкциите како важна алка во кривичното законодавство и кривичноправниот систем во целина, потоа менување на затвореничката структура во Македонија, а во голем дел појавата на сè поголем број радикализирани осудени лица, потребата од заострување на начинот на кој осудените лица по доставување на упатните акти имаа можност за менување на адресата на живеење и со тоа таканаречено избирање на казнено-поправна установа во која би ја издржувале казната и условите во неа, се додава во соопштението на Министерството за правда.