Македонија
Шилегов: Никогаш да не згасне споменот за нашите ослободители
Делегации од земјава и странство денеска положија цвеќиња пред Споменикот на ослободителите, на платото пред Владата, во чест на 13 Ноември – Денот на ослободувањето на Скопје. Цвеќиња денеска положи и делегација на Град Скопје, составена од градоначалникот Петре Шилегов, претседателката на Советот на Град Скопје, Љубица Јанчева, и секретарот на Град Скопје, Викторија Аврамовска-Мадиќ.
„Секој град има посебни датуми во својата историја. Некои градови го слават денот на своето основање, некои го слават денот на својот заштитник, но зар има поголема, повеличествена прослава од тоа да се чествува слободата?! Слободата што ја извојувавте вие, ценети наши борци. Вие што ја жртвувавте својата младост за ова што го живееме денес. Искрено, се радувам што Скопје не слави некакви легендарни основања и митски војсководци, туку го слави највисокиот идеал на секој човек – слободата! Но, ниедна борба за слобода не е лесна, а најмалку нашата. Многу борци ги положиле своите животи за нашата подобра иднина, а меѓу нив и оние чија дејност целосно била поврзана за Скопје: Орце Николов, Вера Јоциќ, Цветан Димов, Раде Јовчевски-Корчагин, Александар Урдаревски, Страшо Пинџур, Мирче Ацев, Дане Крапчев, Боро Петрушевски… Овој наш град го загуби речиси целото свое еврејско население, а во текот на војната животите ги загубиле 4.654 граѓани на Скопје, од кои 956 во борбите, а 3.698 како жртви на фашистичкиот терор“, потсети градоначалникот Шилегов во своето обраќање пред присутните пред Споменикот на ослободителите.
Тој повика уште еднаш да ја оддадеме нашата длабока почит кон сите оние што го дале својот живот за слободата на градот и кон сите преживеани борци, кои се тука да нè потсетат за тој 13 ноември пред 75 години.
„Да не потсетат на многубројните херојски борби, кои со нескриен слободарски дух се водеа тој ден на скопските улици и уште еднаш како и во секоја наредна година да ги пренесат спомените на новите генерации што доаѓаат, како идни граѓани на овој град. 13 Ноември нè обврзува на почит и верност кон овој град за да не заборавиме колку е скапа слободата. Ако сите го сакаме овој град како што го сакаа нашите ослободители, тогаш Скопје несомнено ќе биде поубаво место за живеење. Нека ни се честити 75 години слободно Скопје и никогаш нека не згасне споменот на нашите ослободители“, рече денеска Шилегов.
Пред Споменикот на ослободителите на Скопје цвеќиња и венци денеска положија и делегација на Градскиот одбор на Сојузот на борците од НОАВМ; делегација на Советот на Град Скопје; делегација од кабинетот на претседателот на Република Северна Македонија; делегација од Владата и од Собранието на Република Северна Македонија; делегации на дипломатскиот кор, политичките партии, oпштините на Град Скопје, јавните претпријатија и културните установи на Град Скопје; делегација на Црвениот крст и граѓани на Скопје.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Османи: Имало информации дека Израел го нападнал Иран, меѓутоа сѐ уште не се потврдени
САД денеска препорачаа до своите граѓани да не ги напуштаат Тел Авив и главните центри на Израел поради можни напади, а не е исклучена можноста и македонското МНР да упати порака за претпазливост до нашите државјани таму.
„Во текот на денот и ние ќе ги информираме нашите граѓани иако постојано сме во комуникација со оние што се таму“, изјави министерот за надворешни работи, Бујар Османи.
Како што рече, нема нови пријави од наши граѓани што се наоѓаат во Израел и во регионот на Блискиот Исток за евентуална евакуација.
По објавата на западните медиуми дека Израел утрово го нападнал Иран, Османи изјави дека постојано се следи состојбата, а утринава повторно разговарал со нашиот амбасадор во Израел.
„Имало некои информации дека во текот на ноќта Израел го има нападнато Иран, меѓутоа сѐ уште не се потврдени и затоа не ве информирав во врска со ова прашање. Меѓутоа, тоа се информациите од утринскиот разговор што го имав со нашиот амбасадор, но немаме барање ниту преку СОС-телефонот ниту преку нашата Амбасада за евакуација“.
Сите државјани што имаат потреба од евакуација може да стапат во комуникација со нашата Амбасада во Тел Авив на дежурниот телефон 972 549 267 378, како и СОС-дежурните телефони на МНР – 075 273 732 и 075 268 376 со цел подготовки за евентуална евакуација.
Македонија
Османи со конкретен акциски план за оддржлив економски раст на Северна Македонија
Кандидатот за претседател на Европскиот фронт, Бујар Османи, со конкретен акциски план за економски раст на Северна Македонија преку постигнување национален конзензус и формирање национален совет во серијата средби со разни фактори на државата тој реализира средба со претставници на Стопанската комора на Северна Македонија.
„Ќе предложам како Претседател на државата да се создаде национален совет за економски раст, со кој ќе претседава Претседателот како креатор на државен консензус а во кој ќе учествуваат поголемите политички партии од двете етнички заедници, но и претставници на заедниците под 20 %, регулаторите, бизнис заедницата, синдикатите, Организацијата на потрошувачите, Академијата, невладините организации и останатите интересни групи, како еден вид на државен управен борд, со цел постигнување на државен консензус по однос на клучните параметри и регулативи за еден забрзан и оддржлив развој“, презентира Османи дел од својата визијата за земјата.
„Овој борд или овој национален совет би имал пет работни групи: една за ефикасна администрација, ефикасни институции и професионална администрација, втора за оддржливи финансии, третата работна група за дигитализација, четврта за човечки капитал и петта, за инфраструктура. Во секоја од работните групи покрај експертите од чинителите кои што ги спомнав, би имало и меѓународни експерти и би имало наши претставници од дијаспората кои што се интегрирани во нивните општества со цел да се пренесат нивните искуства. Овие работни групи ќе предложат политики, закони, регулативи, параметри до овој национален совет, овој државен совет за постигнување државен консензус, кој што ќе ги одобри. Очекувам во првите шест месеци да се направи првиот предлог. Тогаш политичките партии ќе ги усвојат тие закони и тие регулативи, без расправа. Владата заедно со опозицијата ќе ги имплементира и ќе ги мониторира“, истакна Османи.
Според Османи, нашата економија е жртва на постојаните циклички политички кризи, а со преговорите со Европската Унија, земјата, покрај државниот консензус за ЕУ, мора да има и економски државен консензус во однос на општите параметри.
“Дали групата за оддржливи финансии ќе предложи дефицитот да не биде повеќе од 3 % и тоа ќе биде усвоено од страна на овој борд, што значи и од позицијата и од опозицијата и од чинителите, тогаш секој мора да го почитува и без расправа тоа да го имплементира. Ако надворешниот долг не треба да биде над 60% сите чинители ќе го почитуваат тоа. Исто како што е со регулативите и директивите на ЕУ, тие се фиксни, тие не се преговараат, тие само се имплементираат. Затоа сметам дека оваа ќе биде еден нов квалитет во постигнување на еден оддржлив и забрзан раст” заклучи Османи.
Преку изборната програма, Декалогот на Европскиот претседател, Османи предвидува и директно учество на Претседателот во пет надворешно-политички иницијативи, во кои заедно со бизнис заедницата ќе ги претстави економските потенцијали на државата надвор од земјата.
Македонија
Богојески: Хејтери во политиката ми го злоупотребуваат прекарот Бунтур наследен од прадедо ми од Илинденското востание
Колку време трае кампањата за претседателските, а сега и за парламентарните избори, толку време сум цел на напади и говор на омраза од политичките противници, реагира Петар Богојески, лидер на партијата Македонски концепт, која на претстојните избори е дел од коалицијата „Твоја Македонија“, предводена од ВМРО-ДПМНЕ. Богојески вели дека многумина од политичарите во кампањата му го злоупотребуваат прекарот Бунтур наследен од прадедото.
„Родум сум од Крушево, но малкумина знаат дека сум директен внук по машка линија на Димитар (Миту) Бунтурот, ополченик и борец за ослободување на Македонија во балканските и во Првата светска војна за што е носител на златен Медал за храброст. Внук сум на Петар Богојески-Бунтурот, чие име го носам, учесник во НОБ на Караорман и носител на златен Медал на трудот на Југославија. По мајчина линија, пак, внук сум на првоборецот Кицо Петрески, загинат на Сремскиот фронт, и на Борис Петрески, ранет на истото место. Од таму доаѓа и мојот прекар Бунтур, кој често во јавноста се злоупотребува од хејтери во политиката“, вели Богојески.
Богојески уверува дека нападите нема да го вратат од намерата за рестарт на Македонија по изборите, но нагласува дека не може да ја разбере фрустрацијата на оние што секојдневно го навредуваат на лична основа.
„Кратко истражување на јавниот простор веднаш ги отркива фактите и честите деманти на речиси сите обвинувања. Последните клевети за примање мито за да се вклучиме во коалицијата ‘Твоја Македонија’, создавањето лажни профили со моето име и споделувањето лажни изјави и слично се веќе основа за вклучување на ОЈО во целиот процес. Буквално, освен клевета и навреда, украден ми е личниот идентитет и во мое име се објавуваат лажни изјави, што е кривично дело. Зошто токму јас сум предмет на тие хибридни напади? Кој се плаши од мојата вистинска факторизација на политичката сцена во земјата“, посочи Богојески.
Последната клевета од вицепремиерот и главен активист на ДУИ, Артан Груби, кој ја обвини Македонски концепт за руска партија, Богојески ја оцени како трагикомична. „Тоа веќе е трагикомично, со оглед на јавните прозападни ставови на мојата партија, и тоа години и години. Но, зошто токму ДУИ толку многу се плаши од Македонски концепт? Дали мојата чистота како човек, моето потекло и бескомпромисното поведение на борец за каузата се причина за тој страв кај ДУИ?“, прашува Богојески. Како сопруг и татко на две деца, вели дека не му е сеедно што политичката пресметка со навреди завршува и пред очите на семејството, па јавно прашува дали е тоа нивото на македонската политика или се може и подобро.
ПР-текст