Македонија
ЈСП со изменет режим поради протестот и блокадите на ВМРО-ДПМНЕ
Јавното сообраќајно претпријатие Скопје информираме дека денеска, среда (9.6.2021 година), во период од 15 до 17 часот, поради најавен протест и блокада на повеќе сообраќајници, голем дел од автобуските линии ќе имаат изменет режим на сообраќање од вообичаениот.
По изменета траса ќе сообраќаат:
Линии 2 и 2А
*во правец од Автокоманда кон Сарај, од Гази Баба продолжуваат по булевар „Никола Карев“ (Пластичарска), кај Амбасада на САД по улица „Лазар Личеновски“, околу Кале и кај мост „Гоце Делчев“ продолжуваат по својата редовна траса
*посочениот режим важи и во обратна насока на сообраќање
Линии 3 и 3Б
*во правец од Ново Лисиче кон центар, од Југодрво вртат лево кон Кјуби, кај Тутунски комбинат лево по булевар „Крушевска Република“ до Транспортен центар
*во правец кон Ново Лисиче од Транспортен центар кон Тутунски комбинат, Кјуби, десно по булевар „Кочо Рацин“ и од Југодрво по редовната траса кон Ново Лисиче
Линиите 4 и 4А
*во правец од Кисела Вода кон Тафталиџе, од рампа десно кај Тутунски комбинат по булевар „Крушевска Република“ кон НБРСМ, Југодрво, десно по улица „Мирче Ацев“, „Холидеј ин“, МНТ, булевар „Гоце Делчев“ и од Соборен храм по својата редовна траса
*во правец кон Кисела Вода, од булевар „Партизански одреди“ продолжуваат кон булевар „Гоце Делчев“, десно кон МНТ, улица „Кеј 13 Ноември“, Југодрво и по редовната траса
Линија 5
*во правец од Дексион кон Ново Лисиче, од улица „Митрополит Теодосиј Гологанов“ врти лево по булевар „Св. Климент Охридски“, булевар „Гоце Делчев“, МНТ, улица „Кеј 13 Ноември“ кон Веро Џамбо и продолжува по својата редовна траса
*во обратен правец, од Југодрво врти десно по улица „Мирче Ацев“, МНТ, булевар „Гоце Делчев“ кај Соборен храм лево по булевар „Св. Климент Охридски“, АМСМ и продолжува по својата редовна траса
Линија 7
*во правец од Лисиче кон Карпош, од Југодрво по улица „Мирче Ацев“, МНТ, булевар „Гоце Делчев“ и од Соборен храм продолжува по својата редовна траса
*во обратен правец, од булевар „Партизански одреди“ продолжува кон булевар „Гоце Делчев“, десно кон МНТ, улица „Кеј 13 Ноември“, Југодрво и продолжува по својата редовна траса
Линии 8, 19 и 59
*во правец од Влае кон Бутел, од булевар „Гоце Делчев“ продолжува на надвозник кај Стоковна куќа „Мост“, лево по улица „Лазар Личеновски“ околу Кале, булевар „Никола Карев“ и на детелинка Бит-пазар продолжуваат по својата редовна траса
*во обратен правец, од детелинка Бит-пазар, булевар „Никола Карев“, улица „Лазар Личеновски“ кон мост „Гоце Делчев“ и продолжуваат по својата редовна траса
Линија 9
*во правец од Скопје Север кон центар, преку Јаја паша на детелинка Бит-пазар на булевар „Никола Карев“, улица „Беласица“, НБРСМ, Југодрво, Билна аптека, лево по булевар „Крушевска Република“, кон Транспортен центар, улица „Беласица“, булевар „Никола Карев“ и се враќа на својата редовна траса
Линии 11, 11А, 15, 15А, 18, 21, 21А, 22, 32, 56, 60, 64А и 118
*во правец према Транспортен центар, од булевар „Гоце Делчев“, вртат десно кон МНТ, лево по улица „Кеј 13 Ноември“ и продолжуваат по својата редовна траса
*во обратен правец, од Југодрво вртат десно по улица „Мирче Ацев“, МНТ, булевар „Гоце Делчев“, кај Соборен храм лево по булевар „Св.Климент Охридски“, АМСМ и по својата редовна траса
Линија 12
*сообраќа до Стоковна куќа „Мост“, таму е почетна/крајна станица
Линија 16
*во правец од Пржино, од Југодрво сообраќа кон Веро Џамбо, улица „Беласица“ и од „Континентал“ по својата редовна траса
*посочениот режим важи и во обратна насока на сообраќање
Линии 17, 18А, 20, 35, 47, 47А, 61, 71 и 81
*од Транспортен центар, улица „Беласица“, булевар „Никола Карев“, Јаја паша и продолжуваат по својата редовна траса
*посочениот режим важи и во обратна насока на сообраќање
Линија 23
*во правец од Ченто кон Дом на печат, од Југодрво врти десно по улица „Мирче Ацев“, МНТ, булевар „Гоце Делчев“, кај Соборен храм лево по булевар „Св.Климент Охридски“, АМСМ, кружен тек до Дом на печат
*во обратен правец од Дом на печат, „Митрополит Теодосиј Гологанов“ врти лево по булевар „Св.Климент Охридски“, булевар „Гоце Делчев“, МНТ, улица „Кеј 13 Ноември“ кон Веро Џамбо и продолжува по својата редовна траса
Линија 24
*во правец од Кисела Вода кон Тафталиџе, од подвозникот десно кон Билна аптека, кај Тутунски комбинат лево по булевар „Крушевска Република“, НБРСМ, Југодрво, улица „Мирче Ацев“, МНТ, булевар „Гоце Делчев“, кај Соборен храм и продолжува по својата редовна траса
*во обратен правец, од булевар „Партизански одреди“ продолжува кон булевар „Гоце Делчев“, десно кон МНТ, улица „Кеј 13 Ноември“, Југодрво и продолжува по својата редовна траса
Линија 27
*во правец од Лисиче, од Југодрво врти десно по улица „Мирце Ацев“, МНТ, булевар „Гоце Делчев“ кај Соборен храм лево по булевар „Св.Климент Охридски“, АМСМ, кружен тек до Дом на печат
*во обратен правец од Дом на печат, улица „Митрополит Теодосиј Гологанов“ врти лево по булевар „Св.Климент Охридски“, булевар „Гоце Делчев“, МНТ, улица „Кеј 13 Ноември“ кон Веро Џамбо и продолжува по својата редовна траса
Линии 33 и 41А
*сообраќаат само до Транспортен центар
Линија 43
*во правец од Дом на печат, улица „Митрополит Теодосиј Гологанов“ врти лево по булевар „Св.Климент Охридски“, булевар „Гоце Делчев“, МНТ, улица „Кеј 13 Ноември“ кон Веро Џамбо, улица „Беласица“ и продолжува по својата редовна траса
*во обратен правец, од „Континентал“, улица „Беласица“, НБРСМ, Југодрво, МНТ, булевар „Гоце Делчев“, кај Соборен храм лево по булевар „Св.Климент Охридски“, АМСМ, кружен тек до Дом на печат
Линии 45, 52, 53, 54, 55, 55А, 62, 63, 63А, 65, 65Б, 65В, 66, 66А и 68
*од „Континентал“ по улица „Беласица“ до Транспортен центар
*посочениот режим важи и во обратна насока на сообраќање
Линија 50
*во правец од Хиподром, кај „Континентал“ врти по улица „Беласица“, НБРСМ, Југодрво, улица „Мирче Ацев“, „Холидеј ин“, улица „Кеј 13 Ноември“, Веро Џамбо и се враќа по улица „Беласица“
Линија 57
*во правец од Козле кон Радишани, од улица „Васил Ѓоргов“ пред Завод за вработување, врти лево кон улица „Митрополит Теодосиј Гологанов“ по траса на линија 5, продолжува по булевар „Св.Климент Охридски“, булевар „Гоце Делчев“ оди на надвозник кај Стоковна куќа „Мост“, лево по улица „Лазар Личеновски“ околу Кале, булевар „Никола Карев“ и на детелинка Бит пазар продолжува по својата редовна траса
*во обратен правец, од детелинка Бит пазар, булевар „Никола Карев“, улица „Лазар Личеновски“ кон мост „Гоце Делчев“, кај Соборен храм лево по булевар „Св.Климент Охридски“, улица „Митрополит Теодосиј Гологанов“ кај Треска лево кон улица „Васил Ѓоргов“ и продолжува по својата редовна траса
Линија 73
*од Саем, по улица „Беласица“, НБРСМ кон Југодрво
*посочениот режим важи и во обратна насока на сообраќање
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Со супервештачење ќе се бара вина кај лекарите за родилката од Дебар, која, по породувањето, се врати дома без јајчник, матка и бубрег
Судот нареди да се направи супервештачење за родилката од Дебар, Јалдз Веапоска, на која по породување во струшката болница ѝ беа извадени јајчник, бубрег и матка. Наредбата за супервештачење доаѓа откога судот доби целосно спротивни вештачења од Обвинителството и од одбраната. Вештачењето од Институтот за судска медицина, приложено од Обвинителството, посочи одговорност кај лекарите од струшката болница, а вештачењето нарачано од одбраната, кое го направи вештакот Драге Дабески, заклучи дека лекарите ѝ го спасиле животот на родилката.
„Со супервештачењето верувам дека, конечно,. вистината ќе излезе на виделина и правдата ќе биде задоволена. Вештакот на одбраната не најде лекарска грешка, ме убедува дека со вадење три органи по породувањето со царски рез, ми го спасиле животот иако вештачењето од Судска медицина покажа дека лекарите имаат вина. Јас здравјето не можам да си го вратам, органите ми се извадени и функционирам како половина човек, но очекувам супервештачењето на лекарите да им покаже дека има лекарска грешка и на пациентите да им порачам дека не треба да молчат, треба да се охрабрат и да се борат за вистината“, вели Вепоска за „Макфакс“.
Се пожали дека секое судење дополнително ја исцрпува, а извадените органи ја ограничуваат во мајчинството, во работата и во секојдневниот живот.
„Здравјето целосно ми е нарушено. Освен физички, имам и психички проблеми, се лекувам и од тоа. Особено тешко ги поднесувам судењата, ми треба време да закрепнам од нив. Работам со скратено работно време оти немам сила за осумчасовна работа. Како мајка не можам да им се посветам на децата онака како што треба оти постојано имам здравствени проблеми, еве сега тукушто ја испив терапијата“, рече Веапоска по денешното судење.
Судијата Јодран Јованов, кој го побара супервештачењето, е трет судија што го добива нејзиниот случај откога претхдните двајца се пензионираа. Следното рочиште е закажано за 3 јуни кога Вепоска очекува да биде готово и супервештачењето.
За извадените органи по породувањето со царски рез на Веапоска, обвинети за несовесно лекување се гинекологот Мухамед Асани, кој во 2020, кога беше направено породувањето, беше директор на болницата, син му Блертон Асани и докторката Лилјана Јовановска.
Македонија
МВР, ЈО и АНБ комплетно подготвени за претстојните претседателски избори
Во врска со претстојните избори, денеска, во просториите на Министерството за внатрешни работи, министерот Панче Тошковски одржа состанок, на кој присуствуваа дополнителниот заменик-министер Митко Бојмацалиев, директорот на Бирото за јавна безбедност, Сашо Тасевски, директорот на Агенцијата за национална безбедност, Зарко Милошевски, републичкиот јавен обвинител, Љупчо Коцевски, и претседателот на комисијата во Јавното обвинителство на РСМ за следење евентуални изборни нерегуларности, Џељаљ Бајрами.
На состанокот министерот Тошковски најпрвин се заблагодари за одвоеното време и досегашната успешна соработка на сите фактори одговорни за безбедно спроведување на изборниот процес и потенцира дека досега не се констатирани посериозни активности, кои се насочени кон нарушување. Исто така, побара од присутните секој во својот делокруг да сподели информации што се од интерес за спроведувањето на изборите и начинот на кој ќе постапуваат институциите за време на изборниот ден.
Од страна на дополнителниот заменик-министер за внатрешни работи, Бојмацалиев, беше потенцирана тенденцијата од година на година да имаме сè помирни избори, со исто очекување за годинешните изборни процеси, бидејќи МВР е подготвено да биде на висината на задачата да спроведе уште едни фер, слободни и демократски избори по европски терк.
Од страна на директорот на БЈБ беа презентирани информации во врска со оперативната акција претседателски и парламентарни избори 2024 година и во таа насока посочи дека од страна на оперативниот штаб и сите надлежни организациски единици се преземени сите потребни мерки и активности врз основа на претходно изготвен план и притоа не се констатирани никакви позначајни проблеми.
Од страна на АНБ се преземаат организирани и координирани мерки за прибирање сознанија за евентуални изборни нерегуларности, а во насока на безбедно спроведување на изборите.
Републичкиот јавен обвинител, претседателот на комисијата во Јавното обвинителство на РСМ за следење вентуални изборни нерегуларности, Џељаљ Бајрами, јавните обвинители на сите виши јавни обвинителства и основниот јавен обвинител на ОЈО Скопје информираа за активностите во рамките на Обвинителството, каде што определени се зајакнати дежурства за изборниот ден за покривање на целото подрачје на државата и со будно внимание ќе се следи процесот и навремено ќе се известува за сите настани и активности што се од интерес на јавноста, а поврзани со спроведувањето на изборите.
Македонија
ССМ повика на првомајски протест: Бараме враќање на трошоците за храна и превоз и минимална плата од 450 евра во првите 100 дена од новата влада
Сојузот на синдикатите на Македонија (ССМ) повика на првомајски протест за враќање на трошоците за храна и превоз и зголемување на платите во првите 100 дена од новата влада. Претседателот на ССМ, Слободан Трендафилов, најави дека пораките испратени од првомајскиот протест треба да бидат црвен аларм за сите оние што ќе го очекуваат гласот на работниците на 8 мај.
„Ние работниците излегуваме на протест и на Први мај ќе побараме враќање на трошоците за храна и превоз, право што го изгубивме во 2009 година поради бруто-системот за пресметка на платите во Македонија. Ќе бараме зголемување на платите, и тоа во првите 100 дена од новата влада, особено зголемување на минималната плата, на најмалку 450 евра, онолку колку што таа изнесува во регионот за да не се доведеме во ситуација нашите граѓани, работниците од Македонија, да градат туѓи економии и да работат за туѓи интереси“, рече претседателот Трендафилов.
Трошоците за храна и превоз што ССМ бара да се вратат во пресметките за плата изнесуваат 20 отсто од просечната плата. Според сегашните пресметки, ако од минималната плата се одбијат овие трошоци и давачките што сега се плаќаат, излегува дека работниците што имаат минимална плата, работат за 14.000 денари.
„Бараме 20 отсто од просечната плата за трошоци за превоз и за храна ако имаме предвид дека секојдневно поскапуваат не само реагенсите туку и трошоците за храна. Ако се има предвид синдикалната кошничка, над 20.000 денари изнесуваат трошоците за прехранување на едно четиричлено домаќинство. Зборуваме за леб и вода, не повеќе. Сметаме дека трошоците за храна и превоз треба да се вратат во платите на работниците ако имаме предвид дека 22.500 е минималната плата од март, доколку ги пресметате трошоците за храна и за превоз, во согласност со даночните ослободувања, ќе видите дека немате плата ниту 14.000 денари. Поради тоа, работниците го очекуваат од нас барањето за враќање на трошоците за храна и превоз“, рече Трендафилов.
Тој потсети на првомајскиот протест од 2018 година организиран со мотото „Гаси скара, касни плата“ за кое рече дека важи и денес оти доцнат платите во „Македонски шуми“, работниците во културата преку протести издејствуваа усогласување и исплата на платите, а повеќе од 20.000 работници, според податоците од Управата за јавни приходи, земаат плати пониски од минималната.
„Да не се лажеме, ако не излезете на протест, нема да добиеме ништо. Колку ќе дојдеме, колку ќе излеземе на протест, толку и ќе добиеме. Доколку очекувате во наредните пет години некој кога ќе ја води државата да ве слушне, сте се излажале. Денеска е моментот кога треба да излезете на улица и да кажете што барате од сите тие што очекувате да ја водат државата“, повика Трендафилов.
Заедно со протестот Трендафилов најави дека работниците ќе го бранат и Работничкиот дом од институциите што го презедоа. „Нека дојдат и нека си ја пробаат среќата“, порача тој.
Протестот ќе почне во 11 часот пред Работничкиот дом, ќе продолжи пред Собранието, пред Стопанската комора и ќе заврши пред Владата, каде што работниците ќе ги упатат пораките, ќе кажат зошто не се задоволни и ќе им кажат на оние што го чекаат гласот од нив дека треба да се погрижат повеќе за работниците.