Македонија
Џафери-Мускат: Треба заеднички да се работи на зајакнување на економската и трговската соработка
Денешната средба на претседателот на Собранието на Република Македонија, Талат Џафери, со премиерот на Република Малта, Јозеф Мускат, кој е во прва официјална посета на Република Македонија, помина во пријателска и конструктивна атмосфера и на истата беа разменети повеќе информации и мислења околу идната соработка на двете земји, како на политички така и на економски план.
Претседателот на Собранието изрази надеж дека средбите на високо ниво меѓу двете страни во наредниот период ќе се интензивираат и тоа ќе претставува можност за продлабочување на севкупната соработка на сите полиња.
Џафери нагласил дека Република Македонија со Република Малта нема отворени прашања на политички план и односите се коректни и пријателски, но во иднина треба заеднички да се работи на зајакнување на економската и трговска соработка, затоа што постојат сите предуслови и потенцијал за тоа, соопштија од Кабинетот на претседателот на Собранието.
Џафери, како што соопштија од неговиот кабинет, изрази благодарност за досегашната поддршка од страна на Малта за нашите евроинтеграциски процеси и истакна дека за нас е добредојдена помошта и искуството што може да го добиеме од Република Малта.
Од Кабинетот на Џафери информираат дека претседателот го информирал гостинот за силната определба на нашата држава за развивање соработка и добрососедски односи со сите земји во нашето опкружување и во таа насока изрази надеж дека најдоцна до средината на јануари 2019 година ќе се завршат собраниските процедури околу уставните амандмани и со тоа ќе се заокружи и овој процес на отворање на вратите кон НАТО и ЕУ.
„Претседателот на Владата на Малта, Јозеф Мускат, изрази задоволство од топлиот и пријателски прием на кој наиде во Република Македонија и изрази надеж дека добрите и пријателски односи ќе продолжат да се развиваат и во иднина. Исто така, премиерот на Малта искажа спремност на неговата земја да даде поддршка на Република Македонија на планот на интегрирање во ЕУ и тоа со конкретни програми и планови, доколку тоа биде побарано од нив, како на технички така и на административен план“, стои во соопштението.
На крајот на средбата, претседателот Џафери искористил можност уште еднаш да упати преку својот гостин покана до претседателот на парламентот на Малта да ја посети Република Македонија и воедно ги повика парламентарците на двете земји да ја интензивираат и зајакнат нивната комуникација и соработка. Двајцата соговорници се согласија дека ќе дадат максимален придонес за продлабочување на идната соработка на секој план.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Променливо облачно и посвежо време со повремени врнежи од дожд, максимални температури до 18 степени
Променливо облачно и посвежо со повремени врнежи од дожд, претежно во јужните делови. Ќе дува слаб до умерен ветер од северен правец. Минималната температура ќе биде во интервал од 0 до 6, а максималната ќе достигне од 10 до 18 степени.
Во Скопје променливо облачно и посвежо со слаб до умерен ветер од северен правец. Минималната температура ќе се спушти до 4, а максималната ќе достигне 17 степени.
За време на викендот ќе се задржи променливо облачно и посвежо време. Во недела на повеќе места ќе има врнежи од дожд кои повремено ќе бидат пообилни и услови за појава на изолирана нестабилност со грмежи. Поради спуштање на постудена воздушна маса на планините врнежите повремено ќе преминуваат во снег и на повисоките планини ќе се формира нова снежна покривка.
Македонија
Таравари од централниот митинг во Струга: Зголемување на минималната плата до 800 евра за борба против имиграцијата
Кандидатот за претседател од редовите на ВЛЕН, Арбен Таравари, ја изрази својата заложба за борба против имиграцијата преку зголемување на минималната плата во нашата земја. Во рамките на идната влада се планира зголемување на платите и до 800 евра, со што ќе се создадат нови можности младите мажи и жени да останат и да придонесат за развојот на државата.
Преку грантови за технологија и иновации, Таравари рече дека владата има за цел да ги поддржи нивните креативни идеи, фокусирајќи се на развојот на земјата како атрактивна алтернатива за младите.
„Иселувањето кај нас е над секоја норма, бројките се алармантни. Не можеме да останеме рамнодушни на оваа ситуација. Така како следна влада на ВЛЕН ќе донесеме одлука за покачување на платите. Ќе се заложиме минималната плата до крајот на нашиот прв владејачки мандат да биде 800 евра. Преку грантови за технологија и иновации, ќе ги поддржиме младите мажи и жени со нивните креативни идеи, кои првенствено служат за нашиот развој како држава. Ова ќе биде дополнителна причина да ја гледаат иднината овде со нас, недалеку од нивните домови, недалеку од нивниот роден град“, рече Арбен Таравари на централниот митинг во Струга.
Македонија
(Видео) Силјановска -Давкова: На 9 мај ќе го славиме Денот на победата над фашизмот и Денот на Европа, но ќе славиме и за Македонија
„На 9-ти мај ќе го прославуваме Денот на победата над фашизмот и Денот на Европа! На 9-ти мај, ќе ја славиме Македонија како твоја и Македонија како горда! Ви ветуваме дека ќе докажеме дека нема да ве срамиме, дека нема да ги заборавиме државните и нациолнални интереси, кои тие не само што ги заборавија, туку и ги погазија! Молам за доверба!“, рече Горданa Силјановска -Давкова, кандидат за претседател на Македонија.
„Верувајте ми, има моменти во историјата! А таков е овој, кога мора да сме заедно! Кога како никогаш досега, потребна ни е вашата поддршка! Без вас не може да направиме единство! Без вас Македонија не може да биде ниту твоја, ниту горда! Без вас не може да дојдеме до победа! Вие го имате првиот и последниот збор! Ви веруваме!
Денес е Денот на светското културно наследство. Охрид е незаменлив и ценет, драгоцен дел од него. Охрид е споменик и дом на европското христијанство! Да го чуваме! Не заборавајте: Без Охрид, Македонија нема да биде почитувана!
Час поскоро, активирајте го универизтетот на Плаошник! Оваа власт не знае што е култура, за неа културата е бизнис. Ако започна изградбата во времето на ВМРО-ДПМНЕ, мора да доврши.
Во насока на јакнење на културниот туризам ќе покренам организирање на меѓународен форум – Плаошник форум, на кој ќе се дискутира соработката на цивилизациите, религиите и културите. Сето ова во соработка со УНЕСКО и Министерството за култура! Упатувам порака дека: Плаошник може да биде центар на дијалог на цивилизациите! Дијалог на религиите! Центар на културен дијалог! Затоа сум горда на него!“, додаде Горданa Силјановска -Давкова.