Македонија
Џафери не чувствува одговорност да им се извини на собраниските службеници
Собранискиот спикер Талат Џафери не чувствува одговорност да се извини на собраниските службеници кон кои се обратил со пцости, а се слушаше на снимката на Собранискиот канал. На брифингот со новинарите не ѝ даде збор ниту на генералната секретарка Цветанка Иванова. По низата прашањата за пцостите, тој одби да одговара конкретно, а потоа им порача на новинарите да прашуваат, но на други теми.
„Не сметам дека сум прекршил нешто, другото е мислење на јавноста. Јавноста си го кажа своето“, рече Џафери.
Тој беше прашан и дали им се извинил на службениците, на што одговори: „Ќе ви кажат службениците“.
По ова, рече дека не ги пцуел вработените: „Тоа е кон одговорноста, кон односот, кон работата“.
На посочувањата дека сите институции, вклучително и Собранието, имаат начин на однесување, тој рече: „Не чувствувам одговорност да се извинам“.
Исцрпно излагање претседателот Џафери имаше само за тоа како работат службениците. Според него, грешката е кај нив, а не кај него. Како што рече, службениците во работно време шетале во центарот на Скопје наместо да работат. Потоа посочи дека тие го згрешиле и материјалот за 71. седница.
„Немам објаснување во смисла на објаснување. Јас сум претседател на Собранието и со Деловник е пропишана мојата надлежност. Треба да створам предуслови и услови за работа. И ако некој мисли дека службата треба да ја помине на улицата Македонија, претпоставувам дека граѓаните не сакаат таква служба. А ние како раководство на Собранието сме ги направиле сите предуслови да створиме соодветни услови за службата. И статусно, и институционално материјално. Службеник во Собранието има 20 отсто повеќе плата од сите свои колеги во други институции“, изјави Џафери.
Своето однесување, за кое една недела не даде никаква изјава во јавност, го правдаше и со тоа дека тој како претседател спречил катастрофа на 71. седница по која им викаше на службениците.
„Доколку се оди до крај, за таква грешка се оди дома. Материјалот што се подготвил по гласање на дневниот ред, така како што беше подготвен, ја враќа седницата на почетокот. Ако не увидев на таква грешка, можеше да доведе во ситуација да не може да се поврати седницата. Таа не е лична работа, таа е одлука на Собранието. Собранието одлучува по дневниот ред. Такви материјали значеа седницата да се врати назад“, дообјаснува Џафери.
Собранискиот претседател беше прашан и како би реагирал доколку некој од новинарите упати пцости кон него. Тој рече дека ако така сметаат, да го направат тоа. Прашан дали во таква ситуација ќе го повика обезбедувањето да ги исфрли новинарите со такво однесување, Џафери додаде: 27 април 2017 година сум кажал дека нема да допуштам слики што сте навикнати да ги гледате. Тоа со обезбедувањето остави си го. Во мојот мандат Собранието е отворено за кој кога сака да влезе“.
На брифингот со новинарите Џафери објасни дека нема да испитува дали намерно се оставени вклучени микрофоните по седницата кога тој почнал да цуе.
„Не е целтада правиме лов на вештерки. Да ги ловам вработените на грешки. Суштината е а пропо статусот да ги извршуваат соодветно обврските. Ако продолжат ваквите грешки, ќе има соодветна постапка“, објасни Џафери.
За барањето оставка од страна на ВМРО-ДПМНЕ, Џафери рече: „Немаат со што да се занимаваат, па со мене. Треба да им ги затворам устите?“
Од новинарите доби и прашање зошто не ѝ дозволува на генералната секретарка на Собранието, Цветанка Иванова, да даде свое мислење за неговото однесување со пцуење: „Брифингот јас го организирам и спроведувам и ова Собрание не е приватна сопственост“.
Додека Џафери забрануваше Иванова да зборува, таа молчеше. И покрај обидот на новинарите да ѝ се дозволи да зборува, Џафери остана на својот став, а Иванова не се побуни.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Ангелов за ДУИ: Со пушка дојдоа на власт, со пенкало да ги отераме на буништето на историјата
Колку и да е убедлива, победата нема да биде комплетна доколку ДУИ не биде срушена од власт, вели претседателот на Достоинство, Стојанче Ангелов по првиот круг од претседателските избори.
„Затоа е потребна општа мобилизација за уште посилна победа на коалицијата “Твоја Македонија” предводена од ВМРО ДПМНЕ. Граѓаните ги отпишаа СДСМ, да запнеме сите заедно да ги отпишеме и ДУИ. Овојпат ДУИ мора да падне! Со пушка дојдоа на власт, со пенкало да ги отераме на буништето на историјата!“, порача Анеглов.
Ангелов пред еден месец соопшти дека неговата партија излегува од коалицијата предводена од СДСМ.
Тој со години се залагаше воените инвалиди и семејства на загинатите бранители да бидат обештетени, но немаше слух од своите коалициони партнери. Како што самиот рече, добивал поддршка од премиерот Димитар Ковачевски и министерката за одбрана Славјанка Петровска, но поради противењето на ДУИ тоа не се случило.
Македонија
Стевчо собра повеќе потписи од гласови – поразот на Јакимовски главна тема на социјалните мрежи
Кандидатот за претседател на ГРОМ и актуелен градоначалник на скопската општина Карпош Стевчо Јакимовски, на вчерашниот прв круг од претседателските избори освои само 8.103 гласови односно 0,90%. Тоа е помалку од бројот на собрани потписи за претседателска кандидатура, зад која му се потпишаа 10.000 граѓани.
Јакимовски во неговата општина освои 2.143 гласови, додека во родната Крива Паланка за Јакимовски гласале 182 граѓани.
Тој вчеравечер призна пораз и ѝ честиташе водство на Гордана Сиљановска-Давкова. Додаде дека не е задоволен од изборниот резултат.
Поразот на Јакимовски вчера беше главна тема на социјалните мрежи.
Стевчо Јакимовски ни комшиите не го гласале. Пошо да го гласаа ќе тепаше у прв круг.
— Ракун (@HumoroidM) April 24, 2024
И доктортот Нико Беќаровски за него објави хумористичен статус.
„Стефчо Јакимовски собра повеќе потписи од гласови“, напиша тој на фејсбук.
Стевчо Јакимовски во првиот круг заврши последен по бројот на гласови на претседателските избори.
Македонија
Почина менаџерот Велибор Џаровски-Џаро
На 75 години денеска почина менаџерот Велибор Џаровски- Џаро по кусо боледување, потврди семејството. Тој важи за една од најпознатите менаџери на просторите на бивша Југославија.
Тој соработуваше со најголемите југословенски естрадни ѕвезди, а беше познат и како „крал на местенките“ во фудбалот.
Соработуваше со големи музички ѕвезди како Здравко Чолиќ, Мишо Ковач, Маја Оџаклиевска, Оливер Драгојевиќ, „Бијело дугме“, Тереза Кесовија, Лепа Брена.
Своевремено има изјавено дека организирал 5.000 концерти и бројни турнеи во повеќе од тридецениската кариера како менаџер.