Македонија
Крстичевиќ: За мене Македонија е Македонија
Пратеникот на владејачката партија во Западна Австралија, Антонио Крстичевиќ по денешната средба со претставници на македонското Собрание вети конкретна поддршка и лобирање за Македонија и македонското население од Австралија во тамошните институции.
Пратеникот на владејачката партија во Западна Австралија, Антонио Крстичевиќ по денешната средба со претставници на македонското Собрание вети конкретна поддршка и лобирање за Македонија и македонското население од Австралија во тамошните институции.
Крстичевиќ директно не коментираше дали би дошло до евентуална промена на ставот на Австралија, која земјава ја признава под привремената референца „Поранешна Југословенска Република Македонија“, но најави конкретна поддршка за Македонците од Западна Австралија.
„Од моја гледна точка, Македонија е Македонија и македонскиот народ доаѓа од овој регион. Имам многу добри пријатели кои што се Македонци и сум имал многумина што се од Западна Австралија. Сум бил во македонски клубови и на фестивали. Со нетрпение очекувам да го проширам тоа искуство. Истовремено, се надевам дека тоа ќе го пренесам на другите претставници на западно-австралискиот и австралискиот парламент, со цел повеќе да се запознат со Македонците, македонската култура, македонската историја и да разберат од каде доаѓа македонскиот народ, во однос на минатото и во однос на тоа каде би сакале да бидат во иднината“, рече Крстичевиќ.
Олеснувањето на визниот режим со Австралија и стипендирањето на македонски студенти од страна на австралиската влада, покрај признавањето на уставното име на Македонија се дел од прашањата, кои, според пратеникот Илија Димовски, се од особена важност за Македонија и за кои била искажана подготвеност да бидат започнати разговори на министерско ниво. Димовски, кој во улога на претседател на пратеничката група за соработка со парламентот на Австралија се сретна со Крстичевиќ, најави дека Македонија ќе продолжи да бара поддржувачи на своите интереси во Австралија.
„Парламентот ќе продолжи да бара пријатели меѓу политичарите во Австралија и ќе се обидеме и понатаму да бидеме упорни во објаснувањето на целиот проблем за името“, изјави Димовски.
Претходно, Крстичевиќ, во рамки на шестдневната посета на Македонија, се сретна со претседателот на македонското Собрание, Трајко Вељановски. /крај/ач
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Во Куманово не се гласа на три избирачки места, на едното се изгубил печатот
Прекин на гласањето има на три места во Куманово, информираше претседателот на Државната изборна комисија (ДИК), Александар Даштевски.
Како што појасни, на едното бил изгубен печатот. На останатите две, биле направени обиди да се замени уредот за биометриска верификација, пришто гласањето во едниот случај продолжило па прекинало, а во вториот не продолжило.
„Тоа се трите места за коишто имаме добиено писмено известување. Ќе видиме вечер за што точно се работи и ќе одлучиме“, рече Даштевски, одговарајќи на новинарски прашања.
Од ДИК појаснуваат дека се работи за прекин за повеќе од три часа, додека онаму каде што имало помали прекини, гласањето ќе се продолжи за онолку време колку што било прекинато.
На сите останати гласачки места, гласањето тече нормално и мирно, додаваат.
Пред полноќ се очекува да бидат обработени над 50 отсто од гласовите и ДИК да ги објави првичните неофицијани резултати.
Во однос на информациите за починати луѓе на избирачкиот список од ДИК обазложија дека оние коишто ќе починат 30 дена пред гласњето ги има на избирачкиот список, бидејќи тој е веќе заклучен. Велат дека списокот се ажурира неколкупати годишно во координација со Управа за водење на матични книги.
Македонија
Одѕивот до 17 часот изнесува 44,18 отсто – за околу 9 проценти повеќе во споредба со претходните претседателски избори
До 17 часот во првиот круг од претседателските избори, своето право на глас го оствариле 397.612 избирачи, или 44,18 отсто.
Како што соопшти претседателот на Државната изборна комисија (ДИК), Александар Даштевски, засега најголема е излезноста во Новаци, каде гласале 67,19 отсто, а најмала во Пласница – 15,5 отсто.
Засклучокот е дека гласањето се одвива мирно.
Во споредба со првиот круг од претседателските избори во 2019 година, до 17 часот, излезноста е поголема за околу 9 отсто.
Досега до ДИК се доставени 308 приговори, од кои 85 се усвоени, 27 отфрлени како неуредни, а 38 се одбиени. Останатите се во процес на обработка.
Македонија
Петмина си ги фотографирале гласачките ливчиња, полицијата ги фати
Пет лица во периодот од 11 до 14 часот, биле фатени од страна на полицијата оти ги фотографирале своите гласачки ливчиња додека го остварувале своето право на глас, објави МВР.
-Во 11.10 часот е пријавено дека во село Коџалија, општина Радовиш на избирачко место број 1602 С.А. од с.Коџалија го фотографирал гласачкото ливче. Се преземаат мерки за расчистување на случајот, по што ќе биде поднесен соодветен поднесок.
-Околу 12.15 часот е пријавено дека на избирачко место број 2683/1 во Скопје А.С. (40) од Скопје го фотографирал гласачкото ливче. Се преземаат мерки за расчистување на случајот, по што ќе биде поднесен соодветен поднесок.
-Околу 12.15 часот е пријавено дека А.И.(48) од Охрид на избирачко место број 1271 во Охрид го фотографирал гласачкото ливче. А.И. е приведен во полициска станица и по документирање на на случајот ќе биде поднесен соодветен поднесок.
-Во 12.35 часот е пријавено дека на избирачко место бр.0006 во Берово, Д.Т.(42) го фотографирал гласачкото ливче. Д.Т. е приведен во полициска станица и по документирање на на случајот ќе биде поднесен соодветен поднесок.
-Во 13.57 часот е пријавено дека на избирачко место 2555 во Скопје С.С. го фотографирала гласачкото ливче. Се преземаат мерки за расчистување на случајот, по што ќе биде поднесен соодветен поднесок, се наведува во извештајот на МВР.