Македонија
Студентите се принудени да членуваат во СПУКМ
Студентите на дел од факултетите тврдат дека се принудени да членуваат во Студентскиот парламент и да плаќаат по 200 денари за да ја запишат новата студентска година.
Студентите на дел од факултетите тврдат дека се принудени да членуваат во Студентскиот парламент и да плаќаат по 200 денари за да ја запишат новата студентска година. На интернет страниците на Филозофскиот и Економскиот факултет во потребните документи за запишување на студенти на прв циклус на студии јасно стои дека за да се запишат новите студенти, ќе мора да платат по 200 денари на сметка на СПУКМ, и покрај тоа што студентскиот правобранител веќе утврди дека студентите не мора да ја плаќаат оваа членарина ако не сакаат. Активисти на независното студентското движење „Слободен Индекс“ за Макфакс велат дека ги потврдиле своите сомневања за барањата на Факултетите да станат членови на СПУКМ откако на „студентски прашања“ на Филозофскиот факултет во Скопје им кажале дека овие 200 денари мора да се платат за упис на новата година. И покрај нивната реакција дека студентите не мора да ги платат овие средства ги препратиле да се информираат кај Продеканот. Продеканот на Филозофскиот Факултет, Доц. Д-р. Никола Жежов вели дека факултетите не можат да решат дали да ја укинат оваа такса бидејќи тие не се правен субјект и само ги спроведуваат одлуките на Ректоратот. Макфакс контактираше и со Никола Главинче, Студентскиот правобранител кој вели дека постојат информации дека на некои факултети се уште се наплаќа ова членство, но дека во никој случај тоа не смее да биде обврзувачко. „До лани беше обврзувачки, но потоа беше укинато и сега студентите не мораат да ја плаќаат оваа такса доколу не сакаат. Одговорно тврдам дека не постои никаква одлука на Ректоратот за задолжително плаќање на таксата,“ рече Студентскиот правобранител за Макфакс. Иван Живковски, претседателот на СПУКМ, не е достапен за коментар. Министерот за образование и наука, Никола Тодоров на денешниот брифинг со новинарите рече дека се согласува оти студентите не треба да бидат принудени да станат членови на одреден Студентски Сојуз или Студентски Парламент, без притоа да бидат претходно прашани дали сакаат да членуваат во него, и дека ќе го провери ценовникот на факултетите на терен. „Секој универзитет има ценовник и треба да провериме дали тие средства кои ги наплаќаат се во рамките на ценовникот кој е одобрен или отстапуваат од него, а доколку отстапуваат ќе реагираме веднаш,“ рече Тодоров и додаде дека уште во текот на утрешниот ден ќе биде испратена инспекција на факултетите за да се утврди ситуацијата. Студентскиот правобранител на трибина организирана од СПУКМ во февруари 2009 година кажа дека студентите не мора да ја плаќаат членарината од 200 денари за СПУКМ и не мора да бидат нивни членови ако не сакаат. Во целата оваа работа каде институциите си ја префрлаат топката од едни на други единствени кои губат се студентите, кои покрај другите трошоци за студирање на одредени факултети не се информирани дека не мораат да плаќаат за членство во одреден студентски сојуз. Сега останува да се види дали Министерството за образование и наука ќе го одржи своето ветување и ќе испрати инспекција за да утврди дали постоело незаконско наплаќање за членство во СПУКМ. /крај/ко
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Димитриевски до Пендаровски: Разликата е огромна, откажете се од оваа битка и оставете нè да победиме во вториот круг
Денеска ЗНАМ заедно со сите свои пддржувачи ја испишува новата политичка историја на македонската политичка сцена, рече вечерва претседателскиот кандидат на ЗНАМ, Максим Димитриевски. Иако е јасно дека не влегува во вториот круг, Димитриевски првиот круг од изборите го смета за голем успех.
„Можам да потврдам дека се роди третата политичка сила во македонскиот политички блок во државата која што имаме намера во следниот период дополнително да ја потврдиме и надградиме, со цел еден ден граѓаните да имаат можност да изберат нешто ново“, рече Димитриевски.
На противкандидатите им честиташе за успехот и се заблагодари на можноста да води кампања за која рече дека не била еднаква за сите оти законот кој е во сила не дава еднаква можност за медиумско претставување на сите партии.
Рече дека е горд на секој глас што го добиле како партија регистрирана пред само три месеци.
„Факт е дека јас како кандидат и ЗНАМ освоивме повеќе од 80.000 гласови. Регистриравме субјект кој постои нешто повеќе од три месеци и со граѓанската поддршка се етаблираше на трето место во политичкиот блок. Сметам дека тоа е одличен појдовен резултат за понатамошна борба. Јас не се сеќавам дека во историјата на плурална Македонија имало вакви примери, да имате партија со некаде три и пол илјади членови, а да освоите над 80.000 гласови. Искрено сум горд на секој тој еден глас што дојде, како поддршка за мене и ЗНАМ. И покрај тоа што трендовите се тие, десницата добива, а левицата губи, единствено десницата доживеа пораз во бастионот на асномска Македонија, а тоа е Куманово“, рече Димитриевски.
Порача на сите политичари дека треба да учат од овие избори оти граѓаните дале јасна насока каде сакаат да се движи државата, а посебна порака упати до Стево Пендаровски, кој освои повеќе 100.000 гласови помалку од Гордана Сиљановска-Давкова.
„Почитуван мој претседателе, разликата е огромна. Доколку сакате да опстане централната и левата идеја во државата, откажете се од оваа битка и оставете не да победиме во име на граѓаните во вториот круг“, порача Димитриевски.
Кога ќе завршат парламентарните избори, Димитриевски е уверен дека ЗНАМ ќе биде политички фактор за стабилност во државата без кој нема да може да се формира идната влада. Најави дека кога ќе ги почнат преговорите за формирање парламентарно мнозинство, на сите политички партии ќе им ги испорачаат нивните предлози за црвените линии на македонскиот народ.
Македонија
ДИК: Сиљановска Давкова освои 324 177, Пендаровски 161 393 гласа по обработени 89,97 отсто
Стево Пендаровски освои 161 393 гласа, 19,90 отсто, Гордана Сиљановска Давкова 324 177 односно 39,97 отсто од гласовите, Стевчо Јакимовски освои 7.499 односно 0,92 отсто од вкупниот број на гласовите.
Кандидатот Бујар Османи освои 110 903, односно 13, 68 отсто, Билјана Ванковска 35.949 односно 4,43 отсто од гласовите, Арбен Таравари 78.110 илјади односно 9,63 отсто, Максим Димитриевски 70,996, односно 8,75 отсто од гласовите се резултатите од обработените 89,97 отсто од гласовите, извести претседателот на Државната изборна комисија, Александар Даштевски.
Тој додаде дека изборниот процес поминал мирно и достоинствено и смета дека 99 отсто работите поминале како што треба.
Македонија
Касами: Добитници на овие избори сме ние, ДУИ има купено гласови
„Влен“ е легитимен претставник на Албанците и ги доби гласовите на Албанците, изјави Билал Касами на прес конференција.
„Добитници на овие избори сме ние, коалицијата „Влен“. ДУИ има купено гласови од загрозените гласачи кои имаат потреби од пари. „Влен“ ги доби гласовите на Албанците, вели Касами.
„ДУИ го загуби последниот легитимитет да зборува во име на Албанците, затоа на 8 мај ние ќе победиме. Овој резултат и во мандати не е голема разлика со ДУИ и на 8 мај овој резултат ќе биде во наша полза. ДУИ успеа да ја загуби последната можност, еден кандидат Албанец да биде избран на директни избори во 2024 година. Тие ќе бидат запишани со црни букви во историјата на албанскиот народ во Македонија. Ако биле заинтересирани Албанец да оди во вториот круг сигурно ќе беа координирани со нас и ќе беше возможно да биде избран Албанец. Затоа мислиме дека вредеше оваа борба“, рече Касами.
Тој се заблагодари на сите што го гласаа кандидатот Арбен Таравари и додаде дека ДУИ има изгубено гласови од помалите етнички заедници и од загрозените граѓани.
Таравари кажа дека коалицијата подоцна ќе разговара за тоа кому ќе ги даде гласовите во вториот круг на претседателските избори.