Македонија
Дебата: Итен прекин на разговорите за името со Грција
Итен прекин на разговорите со Грција во однос на името на Македонија денеска побараа претставници на македонското малцинство во Албанија и Косово.
Итен прекин на разговорите со Грција во однос на името на Македонија денеска побараа претставници на македонското малцинство во Албанија и Косово. Во рамки на кампањата на „Македонското меѓународно движење за човекови права“ и „Австралиско-македонскиот комитет за човекови права“ за прекин на разговорите, тие побараа да прекинат дебатите во однос на тоа дали ние сме или не сме Македонци, а барањата на грчката страна ги нарекоа апсурдни и бесмислени. Според Едмонд Темелко, градоначалник на општина Пустец и претседател на Македонската алијанса за европска интеграција, промената на државното име на Македонија ќе значи и нивно бришење од националните регистри во Албанија, каде во одредени делови се признава нивното постоење. „Ние, Македонците во Албанија, сме жив нишан и сведок дека имаме поминато низ многу тешкотии, лоши работи, сиромаштии, притисоци. Тоа што не има одржано на тие простори, тоа што го има зачувано нашиот јазик, идентитет, култура, е македонскиот дух, нашата душа. Ние сме тоа што сме – Македонци. Доколку било каква работа се случи со името Македонија, ние Македонците во Албанија ќе бидеме избришани од регистрите како такви“, рече Темелко. Во иста линија размислува и Исмаил Бојда, претседател на Македонците со исламска вероисповед. Според него, никој нема мандат да разговара и договара промена на државното име Македонија. Таквиот евентуален чекор, според него, ќе претставува велепредавство. „Македонија нема обврска да договори примена на државното име. Обединетите Нации немаат мандат за промена на државно име на земја членка. Македонија изразила добра волја да разговара за државното име, но не под услов да го промени“, рече Бојда. Според Јана Лозаноска, магистер по меѓународно право, не може да се очекува решение во спорот поради разликите што меѓу Македонија и Грција постојат во однос на името како такво и евентуалните додавки, опсегот на употреба, како и јазичниот и националниот идентитет. Смета дека име на една држава не може да повлече територијални претензии кон друга. „Се работи за физичко разграничување на територијата на Античка Македонија, која постоела во минатото од државата Република Македонија, која егзистира во сегашноста и е создадена и заснована на постоечките демократски принципи и вредности и која има јасно утврдени граници и систем. Овие барања на грчката страна за промена на нашето име ќе беа поиздржани доколку ние се нарекувавме Античка Македонија. Во овој случај, целосно паѓаат во вода. Дополнително на тоа, барањата покажуваат дека Грција сака да оствари предност на името на својата провинција во рамки на своите граници во апстрактна смисла врз името на државата, но не само во апстрактна, туку и во функционална смисла, затоа што сака името на провинцијата да го крене над името на државата. Тоа во функционална смисла и во меѓународните односи е нешто што е комплетно апсурдно“, рече Лозаноска. Скоро решение на проблемот не очекува ниту грчкиот новинар Јоргос Пападакис. Главната причина за спорот ја гледа во желбата на Грција во рамки на нејзината територија да нема малцинство кое ќе се нарекува „македонско“. „Грција моментално бара од Македонија нешто за кое знае многу добро дека не е прифатливо, како што е да се додава придавка на името на Република Македонија и затоа го предлага тоа. Политичките елити во Грција знаат дека нема да има никој во Македонија што ќе прифати нешто слично. По повеќе од 15 години, колку што се бавам со прашањето на односите меѓу Македонија и Грција мојот заклучок е дека Грција само сака да нема македонско малцинство во Грција. Главната причина за сè што бара Грција од Македонија и од меѓународната заедница е дека Грците не сакаат да имаат едно малцинство кое ќе се нарекува македонско“, рече Пападакис. Дел од учесниците на денешната прес-конференција побараа властите да ги известат Обединетите нации дека државата своето членство во светската организација ќе го продолжи под името Република Македонија. /крај/ач
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Нема докази дека уапсените за убиството на докторот се сторителите
Нема докази дека лицата кои беа приведени за убиството на докторот во Железара се сторителите.
Од Обвинителството велат дека продолжуваат со дејствија, со цел идентификација на сторителите.
-До овој момент, со преземените дејствија од МВР и извршените вештачења од Институтот за судска медицина не се обезбедени докази кои даваат основано сомнение дека лицата лишени од слобода се сторители на кривичното дело. Од тие причини, јавниот обвинител, по истекот на времетраењето на определената мерка краткотраен куќен притвор, нема да предлага судот да определи нови мерки за претпазливост за трите лица кои беа задржани во врска со овој настан, велат од ОЈО.
Министерството за внатрешни работи, во координација со Основното јавно обвинителство Скопје, продолжува да презема дејствија за идентификација на сторителите на кривично дело.
Македонија
Постигната либерализација во товарниот транспорт за и од трети земји со Црна Гора
Министерството за транспорт и врски на Северна Македонија и Министерството за собраќај и поморство на Црна Гора потпишаа Протокол за либерализација на товарниот транспорт за и од трети земји.
Согласно Протоколот, либерализацијата ќе стапи на сила од 1 мај 2024 година и ќе има важност една година, период во кој ќе се прави анализа на состојбата во меѓународниот патен превоз, се со цел да се постигне конечно ослободување од системот на дозволи и во наредниот период.
Ова беше постигнато на состанокот на македонско-црногорската мешовита комисија за меѓународен патен превоз на патници и стока кој се одржа во Скопје.
До сега, двете земји врз база на реципроцитет разменуваа вкупно 300 дозволи за и од трети земји кои беа од огромно значење за товарниот транспорт.
Либерализацијата е чекор напред кон отстранување на сите админстративни постапки во однос на дозволите, процес што ќе придонесе за побрз и ефикасен транспорт како и зголемување на економската соработка меѓу Северна Македонија и Црна Гора.
Со Протоколот исто така двете страни се обврзаа да пристапат кон меѓусебно признавање на Сертификатите за професионална компетентност на возачите за учество во меѓународниот патен сообраќај. На состанокот се усогласија и процедурите во делот на превозот на патници меѓу двете земји.
Ова е прва средба на македонско-црногорската мешовита комисија за меѓународен патен превоз на патници и стока после тринаесет години, на која се донесоа низа мерки со кои значително се подобрува соработка меѓу Северна Македонија и Црна Гора во делот на патниот и товарниот транспорт.
Македонија
Воздухопловните сили на Италија од денеска ќе патролираат над македонското небо
Министерката за одбрана Славјанка Петровска и италијанскиот министер за одбрана Гвидо Крозето во Центарот за обука на пилоти во касарната „Страшо Пинџур“ во Петровец го потпишаа Техничкиот договор со кој Италијанските вооружени сили и официјално се вклучија во НАТО мисијата за воздухопловно патролирање над македонското небо.
Министерката Петровска по потпишувањето истакна дека со вклучувањето на Италија во оваа НАТО мисија, единството во Алијансата го гледаме на дело.
„Често споменуваме дека Алијансата е приказ на сојузништво и единство, но зборовите не можат да го отсликаат тоа што можеме да го видиме на дело – италијански и грчки воени воздухоплови, во координација со македонското воено воздухопловство гарантирајќи ја безбедноста на небото на Северна Македонија“, рече министерката.
Со Италија изградивме вистинско сојузништво и развивме силна соработка, рече Петровска, и додаде дека фактот дека италијански воздухоплови ќе ја гарантираат безбедноста на нашиот воздушен простор е приказ за целосна меѓусебна доверба.
Италијанскиот министер Крозето порача дека со денешното потпишување на овој историски договор, Италија заедно со Грција ја презема обврската за заштита на небото на Северна Македонија и дополни дека сојузништвото во Алијансата значи своите сили да се стават на располагање на други земји кога има потреба за такво нешто.
„Италија има чест што може да даде свој придонес во оваа насока и ѝ благодари на Северна Македонија за довербата“, рече Крозето.
Небото на Северна Македонија со официјалниот почеток на НАТО „air policing“ мисијата во нашата земја во декември 2021 година, и официјално стана дел од колективниот систем на Алијансата за воздушно патролирање. Досега, воздухопловното патролирање беше доверено на грчкото воено воздухопловство, а отсега тоа ќе се врши со воздухоплови на грчките и на италијанските воздухопловни сили, во координација со военото воздухопловство на Армијата на Република Северна Македонија.
Мисијата за воздухопловно патролирање на нашето небо ја раководи Сојузничката воздухопловна команда на НАТО, а тактичката контрола на мисијата е под раководство на Центарот за комбинирани воздухопловни операции во Торехон, Шпанија.