Македонија
Студентите на Штипскиот Универзитет плаќаат 710 денари за парламенти
На студентите на Универзитетот „Гоце Делчев“ во Штип, во потребните документи за упис им се бара и потврда за уплатени 710 денари – за студентски парламент, студентски правобранител и студентски активности.
На студентите на Универзитетот „Гоце Делчев“ во Штип, во потребните документи за упис им се бара и потврда за уплатени 710 денари – за студентски парламент, студентски правобранител и студентски активности. На интернет сајтот на Правниот факултет при Универзитетот стои дека ако студентите сакаат да запишат 3-ти, 5-ти и 7-ми семестар, треба да ги платат и овие 710 денари за парламентите кои се невладини организации. Жиро сметката за уплата е на Универзитетот „Гоце Делчев“ – Штип. На сајтот никаде не е наведено дека оваа потврда не е задолжителна. Ристо Кустуранов, секретар при Ректоратот на Универзитетот, на прашање на Макфакс дали знае дека студентите никој не може да ги принуди да бидат членови на невладини организации, изјави дека овие пари не оделе само за студентските парламенти туку и за други активности. „Тоа не е само за студентските парламенти, тие пари одат и за спортски активности, и за интернет, и за други студентски активности,“ рече Кустуранов, иако на сајтот стои дека на студентите плаќаат плус 390 денари за спортски активности. Тој додаде дека доколку студентските парламенти донесат одлука да не се наплаќа оваа потврда, тие ќе ја спроведат. „Наплаќањето на овие средства не е до нас, тие си имаат парламент, тие ќе си донесат одлука, ако решат да не се плаќа нема да се плаќа. Тоа си се нивни пари и тие си ги трошат наменски за свои активности“, рече Кустуранов. Макфакс, кој ја отвори темата со изнудената членарина од студентите на Универзитетот „Св. Кирил и Методиј“ – Скопје, веќе пишуваше дека студентите со години плаќале стотици илјадници евра за членарина во студентските парламенти, во кои не биле информирани дека не мораат да членуваат бидејќи тие се невладини организации. Ако хипотетички се направи груба пресметка дека 30.000 студенти годишно на УКИМ плаќале по 200 денари за членство во студентските парламенти, тогаш секоја година на нивна сметка студентите „донирале“ по најмалку 100.000 евра. По бурните реакции во јавноста и неколку неделни натегања на институциите, Претседателот на Студентскиот парламент на УКИМ, Иван Живковски изјави дека на секој студент кој ќе поднесе барање до матичниот студентски парламент при својот факултет ќе му биде вратена членарината од 250 денари. Студентската членарина стигна и до Уставниот Суд на Република Македонија, откако активистите на неформалното студентско движење „Слободен Индекс“ поднесоа претставка за незаконското наплаќање за членство на студентите во Студентските парламенти.крај/ко
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Ванковска: Преспанскиот и бугарскиот договор се колонизаторски договори
Професорката Билјана Ванковска и претседателски кандидат на Левица во Фејсбук статус истакнува дека има разочарани млади луѓе кои мислат дека кога политичарите говорат за прашањата за Преспа и другите договори, тоа е само губење време и одвлекување на вниманието од реалните проблеми на земјата, сиромаштијата, невработеноста, корупцијата и сл..
„Точно е! Мнозинството граѓани едвај врзуваат крај со крај, очајни се од непостоење здравствен или образовен систем, сакаат развој а не вртење кон минатото.
Она што овие млади (а инаку умни) луѓе уште не го научиле е дека геополитиката (која ни ја наметнаа) е тесно поврзана со геоекономијата. Би очекувала својот критички ум да го свртат кон, на пример, поврзаноста на нашата колонијална положба со Преспа и Митилинеос. Или дури и со Бехтел и Енка… и уште многу ситни и не толку ситни зделки на македонските компрадорски елити кои нѐ продадоа како на сточен пазар, ни ги одзедоа и идентитетот и достоинството, ама и ги наполнија своите џебови врз база на бајките за ЕУ интеграција со смена на името и уставот.
It’s all about geopolitics, stupid!“, пишува Ванковска.
Според неа, Преспа и Бугарскиот договор не се само национални, идентитетски прашања, туку и класни и социоекономски. Ние, додава таа, сме во класично ропство, а принудени да аплаудираме на колонизаторите кои не се тука за наше добро, туку за свои интереси.
Македонија
ВМРО-ДПМНЕ: Идната наша влада ќе изгради нов објект за Клиничкиот центар во Скопје и ќе ја доизгради Клиничката болница во Штип
Идната влада на ВМРО-ДПМНЕ ќе изгради нов објект за Клиничкиот центар во Скопје и ќе ја доизгради Клиничката болница во Штип, велат од ВМРО-ДПМНЕ.
„Главен фокус на идната влада во здравството ќе биде укинување на дуализмот. Ќе се спроведе спојување на клиниките во еден интегриран Универзитетски Клинички центар „Мајка Тереза“. Интегриран Клинички центар во Скопје ќе значи подобри услуги за пациентите и намалување на трошоците при јавните набавки, кои ќе бидат вршени централизирано. Владата предводена од ВМРО-ДПМНЕ ќе го заокружи целиот процес со Клиничкиот центар во Скопје со изградба на нов објект“, дополнуваат од ВМРО-ДПМНЕ.
Како што велат, истовремено владата ќе биде силно фокусирана и на довршување со градбата на Клиничката болница во Штип.
„По изградбата на Клиничката болница истата ќе биде опремена со најсовремена опрема и истата ќе се доекипира со соодветен медицински кадар. Владата на ВМРО-ДПМНЕ ќе го има здравјето на граѓаните на прво место, затоа континуирано ќе вложуваме во здравството. Време е да ја вратиме државата на народот“, завршуваат од ВМРО-ДПМНЕ.
Македонија
Целосен молк од страна на Пендаровски, Ковачевски и СДС за улогата и начинот на ангажирање на спорниот странски консултат Асаф Еисин, велат од ВМРО-ДПМНЕ
Целосен молк од страна на Пендаровски, Ковачевски и СДС за улогата и начинот на ангажирање на спорниот странски консултат, Асаф Еисин, кои е вклучен во кампањата на Стево Пендаровски и СДС, велат од ВМРО-ДПМНЕ.
„Како и секогаш Пендаровски, Ковачевски и СДС кога се фатени во скандал или криминал се служат само со навреди, лаги и манипулации наместо да дадат конкретни одговори на релевантни прашања поврзани со скандалот. Повеќе од десетина дена, откако признаа дека се среќавале со контроверзниот израелски консултат Еисин, нема одговор како тој е ангажиран во нивната кампања, како го исплаќаат и дали тој е ангажиран за црна кампања, кампања на поделби и етикетирања. Јавноста заслужува одговори како овој балкански мешетар СДС и Ковачевски го исплаќаат, бидејќи во ниту еден извештај за финансиско работење неговиот ангажман не е заведен, и дали истиот е плаќан со црни пари, кеш на рака, од криминалните тендери на власта, пари украдени од граѓаните“, дополнуваат од ВМРО-ДПМНЕ.
Како што посочуваат, од СДС треба да одговорат, дали покрај ангажирањето на Еисин, во Македонија се дојдени и две други лица, кои се локална поддршка на консултантот на Еисин, кои се сместени во центарот на Скопје во еден хотел и веќе активно работат на црната кампања на СДС за претстоините избори.
„Ги повикуваме надлежните институции веднаш да се одважат и да се ангажираат за расчистување на овој скандал, да го откријат финансирањето на консултантот и вклучувањето на странски државјани во кампањата за изборите. Време е за промени. Следува одговорност за секој сторен криминал, за секој скандал и за секое крадење на народни пари“, завршуваат од ВМРО-ДПМНЕ.