Сообраќајот на државните патишта се одвива по претежно суви коловози, освен на осојничавите места каде коловозите се влажни.Виадукт Трејд известува дека денес и утре (19.02.2019 и 20.02.2019) ќе се изведуваат градежни активности на регионален пат Р1102, делница Велес – Градско. Сообраќајот ќе се одвива наизменично во двата правци.

Интензитетот на сообраќај на патните правци надвор од градските средини е умерен. На граничните премини нема подолги задржувања за влез и излез од државата.

АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде се бележи појава на утринска магла, а исто така зголемена е и можноста од појава на одрони.

На денешната редовна, 122. седница, Владата го разгледа и утврди новиот текст на предлог-законот за агенција за национална безбедност. Донесувањето на предлог-законот за агенција за национална безбедност ќе овозможи реформирање на Управата за безбедност и контраразузнавање, која нема повеќе да биде орган во состав на Министерството за внатрешни работи, односно се предлага основање агенција за национална безбедност како модел за реформа на безбедносно-разузнавачкиот систем во Република Северна Македонија.

Целта на предложениот закон е надминување на недостатоците утврдени во извештаите за Република Северна Македонија на Европската комисија преку воспоставување модел за реформа на безбедносно-разузнавачкиот систем со кој Управата за безбедност и контраразузнавање нема повеќе да биде орган во состав на Министерството за внатрешни работи, туку се предлага основање агенција за национална безбедност со цел заштита на националната безбедност на државата, односно независноста, суверенитетот, уставното уредување, основните слободи и права на човекот и граѓанинот гарантирани со Уставот на Република Северна Македонија, како и други работи од интерес на националната безбедност на државата.

Апелациониот суд в четврток на јавна седница ќе одлучува за затворските казни на бизнисменот Сеад Кочан и управителот на фирмата „Силекс неметали“, Василије Авировиќ, во предметот „Труст“ на СЈО. Судија известител за предметот е Лирие Елези-Арулау.

Со оглед на фактот дека лани Собранието изгласа измени во Кривичниот законик, со кои се намалува казната затвор за ова кривично дело, со кое беа осудени обвинетите од четири на три години, се воведе и можноста за добивање условна казна.

Бизнисменот Сеад Кочан, сопственик на „Трансмет“, беше осуден на шест години затвор и забрана за вршење дејност во траење од три години затоа што со лажни документи учествувал и добил тендери за ископ на јаглен и јаловина во РЕК „Битола“ на АД ЕЛЕМ, со што добил имотна корист од 17 милиони евра.

За истото кривично дело на три години затвор и забрана за вршење дејност во траење од три години беше осуден синот на пратеничката Владанка Авировиќ, Василије.

Судот одлучи да го конфискува имотот во вредност од 17 милиони евра, кои треба да бидат вратени во државниот буџет.