Односите меѓу Македонија и Канада, нашите стратешки цели – влез во НАТО и ЕУ, спорот околу името со Грција, како и можноста во идните години да дојде до укинување на визите за македонските граѓани кои сакаат да патуваат во Канада

Тоа биле главните теми на разговор на премиерот Никола Груевски со претседателите на Долниот дом на Парламентот и на Сенатот на Канада, Питер Миликен и Ноел А.Кинсела, пренесува МИА. Двајцата парламентарци, како што посочи Груевски по средбите, посебно се интересирале околу позициите на нашата држава во спорот со Грција, околу потеклото на спорот, како и човековите и малцинските права притоа посочувајќи дека голем број канадски граѓани со македонско етничко потекло имаат проблеми со враќање на своите имоти кај нашиот јужен сосед. „Ги информирав дека сме држава која практично ги исполни сите стандарди да влезе во НАТО, дека оваа есен се надеваме да добиеме позитивен извештај и препорака за почеток на финални преговори за полноправно членство во ЕУ, меѓутоа дека имаме блокада од Грција која не спречува да одиме напред, иако правиме многу реформи и прогреси“, изјавил премиерот Груевски. На своите соговорници Груевски им ја претставил и поволната бизнис-клима во Македонија, притоа укажувајќи им на фактот дека само за две години земјата успеа да се приближи напред на листата на ДУИНГ-бизнис за 26 позиции. Груевски со Миликен и Кинсела, како што рече, разговарал и за процесот на образование во Македонија и реформите што се направени во тој дел во однос на задолжителното средно образование, англиски јазик во прво одделение, компјутер за секој ученик и отворање нови универзитети. Притоа, го отвориле и прашањето за разгледување на можноста за поврзување на државните универзитети со некои од нивните и размена на студенти. По средбите со спикерите на Долниот дом на Парламентот и на Сенатот на Канада, премиерот Груевски заминува во Торонто каде се предвидени средби со бројната македонска заедница, како и со канадски бизнисмени. Во текот на четвртокот премиерто Грувски имаше средба со неговиот канадски колега Стивен Харпер со кого потпишаа Договор за социјално осигурување помеѓу Република Македонија и Канада, според кој околу 200.000 македонски иселеници во Канада ќе можат да ги остваруваат своите права од пензиското и инвалидското осигурување. За време на работната посета на Отава македонскиот премиер се сретна и со министрите за одбрана и за меѓународна трговија Питер Гордон МекКеј и Стоквел Деј. Во делегацијата предводена од премиерот Груевски е и министерот за надворешни работи Антонио Милошоски, кој имал одвоена средба со парламентарниот секретар во Министерството за надворешни работи на Канада, Дипак Обрај.