Македонија
Ставени темелите на фудбалско игралиште во прилепското село Тополчани
Во прилепското село Тополчани денеска е поставен камен темелник на фудбалско игралиште, кое е дел од проектот на Владата за изградба на 50 вакви игралишта
Камен темелникот го поставија министерот за транспорт и врски Миле Јанакиески, директорот на Агенцијата за млади и спорт Драган Ѓурчевски и прилепскиот градоначалник Марјан Ристески.Целта на проектот, според Јанакиески, е да се привлечат младите кон спортот и да постигнуваат врвни резултати. „ Владата продолжува со проектот 50 фудбалски игралишта. Ги повикувам родителите да им овозможат на децата да спортуваат на терените, зашто само преку спортот ќе се тргнат од лошите пороци“, вели Јанакиески.Посочувајќи дека спортскиот терен ќе им служи и на младите од околните села, градоначалникот на Прилеп, Ристески рече дека тоа е само дел од проектите што се реализираат во Тополчани, споменувајќи ја изградбата на асфалтен пат и подобрување на инфраструктурата во селото.„Едно такво фудбалско игралиште што е дел од владиниот проект наскоро ќе се отвори кај паркот на револуцијата во Прилеп, а градот ќе добие и олимписки базен“, најави Ристески.Директорот на Агенцијата за млади и спорт, Драган Ѓурчевски, нагласувајќи дека паралелно со изградбата на фудбалски игралишта се градат и спортски сали, рече дека Владата со тоа покажува колку го цени спортот и колку вложува во него.Спортското игралиште во Тополчани ќе биде со димензии од 120 на 80 метри според стандардите, со соблекувални и со модерни трибини за околу 500 гледачи. Тоа е 37-мо од 50-те фудбалски игралишта во земјата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Во Куманово не се гласа на три избирачки места, на едното се изгубил печатот
Прекин на гласањето има на три места во Куманово, информираше претседателот на Државната изборна комисија (ДИК), Александар Даштевски.
Како што појасни, на едното бил изгубен печатот. На останатите две, биле направени обиди да се замени уредот за биометриска верификација, пришто гласањето во едниот случај продолжило па прекинало, а во вториот не продолжило.
„Тоа се трите места за коишто имаме добиено писмено известување. Ќе видиме вечер за што точно се работи и ќе одлучиме“, рече Даштевски, одговарајќи на новинарски прашања.
Од ДИК појаснуваат дека се работи за прекин за повеќе од три часа, додека онаму каде што имало помали прекини, гласањето ќе се продолжи за онолку време колку што било прекинато.
На сите останати гласачки места, гласањето тече нормално и мирно, додаваат.
Пред полноќ се очекува да бидат обработени над 50 отсто од гласовите и ДИК да ги објави првичните неофицијани резултати.
Во однос на информациите за починати луѓе на избирачкиот список од ДИК обазложија дека оние коишто ќе починат 30 дена пред гласњето ги има на избирачкиот список, бидејќи тој е веќе заклучен. Велат дека списокот се ажурира неколкупати годишно во координација со Управа за водење на матични книги.
Македонија
Одѕивот до 17 часот изнесува 44,18 отсто – за околу 9 проценти повеќе во споредба со претходните претседателски избори
До 17 часот во првиот круг од претседателските избори, своето право на глас го оствариле 397.612 избирачи, или 44,18 отсто.
Како што соопшти претседателот на Државната изборна комисија (ДИК), Александар Даштевски, засега најголема е излезноста во Новаци, каде гласале 67,19 отсто, а најмала во Пласница – 15,5 отсто.
Засклучокот е дека гласањето се одвива мирно.
Во споредба со првиот круг од претседателските избори во 2019 година, до 17 часот, излезноста е поголема за околу 9 отсто.
Досега до ДИК се доставени 308 приговори, од кои 85 се усвоени, 27 отфрлени како неуредни, а 38 се одбиени. Останатите се во процес на обработка.
Македонија
Петмина си ги фотографирале гласачките ливчиња, полицијата ги фати
Пет лица во периодот од 11 до 14 часот, биле фатени од страна на полицијата оти ги фотографирале своите гласачки ливчиња додека го остварувале своето право на глас, објави МВР.
-Во 11.10 часот е пријавено дека во село Коџалија, општина Радовиш на избирачко место број 1602 С.А. од с.Коџалија го фотографирал гласачкото ливче. Се преземаат мерки за расчистување на случајот, по што ќе биде поднесен соодветен поднесок.
-Околу 12.15 часот е пријавено дека на избирачко место број 2683/1 во Скопје А.С. (40) од Скопје го фотографирал гласачкото ливче. Се преземаат мерки за расчистување на случајот, по што ќе биде поднесен соодветен поднесок.
-Околу 12.15 часот е пријавено дека А.И.(48) од Охрид на избирачко место број 1271 во Охрид го фотографирал гласачкото ливче. А.И. е приведен во полициска станица и по документирање на на случајот ќе биде поднесен соодветен поднесок.
-Во 12.35 часот е пријавено дека на избирачко место бр.0006 во Берово, Д.Т.(42) го фотографирал гласачкото ливче. Д.Т. е приведен во полициска станица и по документирање на на случајот ќе биде поднесен соодветен поднесок.
-Во 13.57 часот е пријавено дека на избирачко место 2555 во Скопје С.С. го фотографирала гласачкото ливче. Се преземаат мерки за расчистување на случајот, по што ќе биде поднесен соодветен поднесок, се наведува во извештајот на МВР.